Read Tangkhul Naga JOHN 10 Bible Online

JOHN 10 - Tangkhul Naga bible

JOHN 10

¹Jishuna athumli hānga, “Kachangkhat eina ina nathumli kahāngna, kaja yaoshangli khamong eina marāzangla apong khangatei eina yakkālaga kharā mipa chi khalena kala khangaponana.

² Kha khamong eina kazanga mi chi yaokahomana.

³Ngavei khamayonana ali shomi; yaobingna awui akhon shai, kala yaobingli kachichāwui aming eina hoda thānshoka.

⁴Ana homshokserhailaga athumwui mangali thānzata kala yaobingna awui thi shurra, kaja athumna awui akhon machuta.

⁵Athumna makatheiali mashurphāphāmana, kha athumwui eina yāma, kaja athumna awui akhon mamachutmana.”

⁶ Jishuna chānjam hi athumli hānga, kha khi kahāngkhala kaji athumna matheirarmana.

⁷Chieina Jishuna hāngluishita, “Kachangkhat eina ina nathumli kahāngna; ina yaobingwui khamongna.

⁸ Ili rida kharā khangateibing saikora khale kala khangaponabingna, yaobingnala athumwui akhon manganāmana.

⁹I khamongna; kachikathāna iwui eina zangakha ali huimira, kala shok-zangda wonnui samphangra.

¹⁰Khale china leekhavai, sāthat khavai kala sāshimān khavai rai, ina rākhami hiya athum kharing samphang khavai, kala chi pemtha̱da samphang khavaina.

¹¹ “I kaphā yaokahomana. Kaphā yaokahoma china yaobingwui vang manglā chihomi.

¹²Yaokahoma makhaninga kaja masākakhuia mi china kharang rārāli da kathei eina yaobingli chihohailaga yāmhaowa, kala kharang china yaobingli tukkhayāngda kashamyānghaowa.

¹³Masākakhuia mi china yaobingli mashivamada yāma.

¹⁴I kaphā yaokahomana; ina iwui yaobingli thei kala iwui yaobingnala ili thei,

¹⁵ Avāna ili kathei thada inala iwui Avāli thei; kala ina yaobingwui vang imanglā chihomi.

¹⁶ Yaoshang hili makazang yao khangateila lei. Ina athumlila houngphalungra, kala athumna iwui akhon shāra. Chieina yaoshang akhamāngra, yaokahomala akhamāngra.

¹⁷“Hiwui vang eina Avāna ili leishi kaja ina iwui manglā samphanglui khavai imirin chigata.

¹⁸ Khipānakha iwui eina makhuithuimana kha iningsasak eina kachigatna. Ina manglā chigatkashap kala khuiluikashapwui pangshap lei. Hi iwui Avāwui eina samkaphangna.”

¹⁹ Tui hiwui vang Jihudibingwui ngachaili ning ngakai khangarok leiluishithaowa.

²⁰ Athumwui ngachaili kachungkhana hānga, “Ali chipee zanghaida pāhaira. Khisāda awui tui nganākhala?”

²¹ Kha kaikhana hānga, “Chipee kazanga mi akhana hithada mamatuimara, chipeena mik khangapeopawui mik rakngasakpairala?”

²²Hi Jerusalemli Dharkat Phanit kasā atamna,

²³ chi sikachāngna. Jishuna khorumshimli khalei Solomonwui yāngkhupli zatsai.

²⁴Chieina Jihudibingna ali rākuinamda hānga, “Nana ithumli karankha ningmaong ngasakrakhala? Na Khrista china jiakha tharlak eina hānglu.”

²⁵ Jishuna ngahānkai, “Ina nathumli hānghaira, kha nathumna mashitsangmana. Ina iwui Avāwui ming eina kasāsā china iwui vang shākhina.

²⁶ Kha nathumna mashitsangmana, khiwui vangkhala kaja nathum iwui yaonao maningmana.

²⁷Iwui yaobingna iwui akhon shai; ina athumli thei, kala athumna ili shura.

²⁸ Ina athumli makashimān kharing mi, chieina athum mathilākmara, kala athumli khipānakha iwui eina mangapaithuimara.

²⁹Ili khame iwui Avāna saikorali reimei, kala athumli khipānakha iwui Avāwui pāng eina mangapaikhuirarmara.

³⁰ Iwui Avā eina I akhana.”

³¹ Chieina Jihudibingna ali horthatkida lunggui ngamuikhui.

³²Jishuna athumli hānga, “Ina nathumwui mangāli iwui Avāwui eina kaphā ot kachungkha chitheimi kahaiwui vang ili lunggui eina horki kajila?”

³³ Jihudibingna ngahānkai, “Nana kaphākasāwui vang lunggui eina horki kaji maningmana, kha Vareli kachipatwui vangna. Na mikumona, laga nakhalatta Vare sākhui.”

³⁴ Jishuna ngahānkai, “Varena hāngkahai nathumwui ain lairikli kapi kahai lei; ‘Nathum kameonaobingna.’

³⁵Kathara lairikli kapi kahai hi mashimānda mashunga kaji ithumna thei, kala Varena chikathābingli kameonao hoi, chikathābingli ana awui chānpao miya.

³⁶Ili Varena kapangkhuilaga chihokharāna. Chithākha I Varewui Naomayarana da kahāng hili Vareli kachipat khi leikhala?

³⁷Ina iwui Avāwui ot masaakha ilila mashitsangalu.

³⁸Kha ina iwui Avāwui ot sāda leilakha ili mashitsanglala iwui otsak chili shitsanglu. Chithākha iwui Avāna ili lei kala ina iwui Avāwuili lei kaji nathumna theishingkhuipaira.”

³⁹ Athumna Jishuli tukkhui khavai akhashida salui, kha ana athumwui eina nganaishokhaowa.

⁴⁰ Jishuna Jordankong kānlaga Johnna ra̱hikmikasapam chili vāpamhaowa.

⁴¹Chili mi kachungkha awuili rāda ali hānga, “Johnna machut masāmana, kha ana mipa hiwui maramli kahāng saikora mashungsera.”

⁴² Apam chili mi kachungkhana Jishuli shitsanghaowa.