Read Tangkhul Naga JOHN 11 Bible Online

JOHN 11 - Tangkhul Naga bible

JOHN 11

¹ Lazarus kaho Bethanyli kapāna mi akha kazāhaowa. Bethany hi Mary eina achonva̱ Marthawui kha̱na.

² Mary hi Prohowui pheili nganamkaphā thao neomilaga awui kuisam eina mitkhamiva̱ china. Kazākasā Lazarus hi apāna.

³Chonnaoni hina Jishuli pao chihovāda hānga, “Proho, nawui leikashe ngasota kazāhaira.”

⁴ Jishuna pao chi kashā eina hānga, “He thitchangki kajiwui kazāt maningmana, kha Vareli tekmatei khavaiwui vangna, chieina Varewui Naomayarana tekhamatei samphang khavaiwui apongna.”

⁵Jishuna Martha eina agatuiva̱ kala apā Lazarusli leishilāka.

⁶Kha Lazarus kazāda lei kaji shālala Jishuna apam chili khanithang pamsangluihaowa.

⁷Chiwui thili Jishuna sākhangatha̱bingli “Judeali latungusa” da hānga.

⁸ Chieina sākhangatha̱bingna ngahānkai, “Ojā, achonthangcham nali Jihudibingna lunggui eina horkida sai, laga chili latungusa kajila?”

⁹ Jishuna hānga, “Thangkhali pung tharāda khani maleimala? Mina ngashunshong zatakha phei mangaphokmana, kaja ana apuk-apagawui kahor chi thei.

¹⁰Kha ngayāshong zatakha phei ngaphoka, kaja kahor chi awuili maleimana.”

¹¹ Jishuna hithada hānglui, “Ithumwui ngasota Lazarus pivāhaira, kha ina ali kapiwui eina amathotkhuira.”

¹²Sākhangatha̱bingna ngahānkai, “Proho, a pivā kahai ngasāsaakha raihaora.”

¹³Kha Jishuva Lazarus thihaira kaji kahāngna. Athuma khangachā kapi-eili da phaningkasāna.

¹⁴Chieina Jishuna meisā eina hānga, “Lazarus thihaira.

¹⁵Kha chili I maleikasā chi nathumwui vang phālakhaira, kaja nathum shitsangpai khavaina. Ithum awuili vāusa.”

¹⁶ Thomas, Ngashira kaho china awui ngasotnao sākhangatha̱bingli hānga, “Ali ngasoda thirum khavai ithumla ngasovausa.”

¹⁷Jishuna vākashung tharan Lazarusli chifada matithang kāhairasai.

¹⁸Bethany hi Jerusalemwui eina kilometer kathum shakha tai.

¹⁹ Chieina Judeanao kachungkhana Martha eina Maryli apā thikahaiwui vang ringphā ngasak khavai rai.

²⁰Marthana Jishu rārāli kaji kashā eina angarokkhui, kha Maryva shimli pamhaowa.

²¹Marthana Jishuli hānga, “Proho, na hili leisāsi kaja ipā mathilakmara.

²²Kha chithālala arui eina tangda Varena nawui kapopo chi sāmira da ina thei.”

²³Jishuna ali hānga, “Napā ringluira.”

²⁴ Marthana “Khanaowa zimiksholi a ringluira kaji ina thei” da ngahānkai.

²⁵ Jishuna ali hānga, “Iya ringkhaluia kala kharingana. Kachikathāna ili shitsangakha thihaisālala ringra;

²⁶ kala kachikathāna ringda ili shitsangakha mathilakmara. Hi na shitsangla?”

²⁷ Ana “Mha, Proho, apuk-apagva̱li rāki kaje Varewui Naomayara Khrista chi nalaka” da ngahānkai.

²⁸Marthana hi hāngkahaiwui thili agatuiva̱ Maryli ngathumda hokhuilaga hānga, “Ojā hili leili, kala ana nali phāda lei.”

²⁹Maryna chi shakhaleoda shoksamphanga.

³⁰Jishu kha̱lungli marāshungla Marthana asamkaphangpam chili leikasāna.

³¹Maryli suiphanepta ngasopamkasā Jihudibing china Mary shokkahai theida shurshoka. Athumwui ningli Mary chikhurpamli achapki kajina da phaningsai.

³² Maryna Jishuli vākashung eina khuktizangda hānga, “Proho, na hili leisāsi kaja ipā mathilākmara.”

³³Jishuna Mary eina ali shurkazangbingwui kachap chi theida awui ning saza̱nahaowa.

³⁴Kala athumli hānga “Kali chifahailikhala?” “Rāyanglu, Proho,” da athumna hānga.

³⁵ Jishuna chapa.

³⁶Chieina Jihudibingna hānga, “Yanglu, ana kayākha ali leishihaokhala?”

³⁷ Kha athum kaikhana hānga, “Mik khangapeoli rak-khangasaka ana Lazarus mathi khavai khikha masārarmarala?”

³⁸Jishuna ning saza̱nahaoda lungphek eina shungnam kahai chikhur chili vai.

³⁹“Lungphek chi khalangshoklu” da Jishuna kasoi. Thikahaipawui achonva̱ Marthana ngahānkai, “Proho, nganamshihairara, kaja chifada matithanghaira.”

⁴⁰Jishuna ali hānga, “Nana shitsangakha Varewui tekhamatei theira da ina mahāngmala?”

⁴¹ Athumna lungphek chi khalangshok kahai eina Jishuna kazingram yangkāda hānga, “Iwui Avā, nana ili shākhamiwui vang nali ningshi.

⁴² Nana ili shāmichinga da thei, kha hili khaleibingna nana ili kashirātna kaji shitsang khavai kahāngna.”

⁴³Hi hāngchanghailaga ana panglāk eina vaoda hānga, “Lazarus, shoklu.”

⁴⁴ Kathe china aphei, apāng kala amai kachon eina neiphinserhailaga shokrāsai, Jishuna athumli hānga, “Khalāmihailaga ali zatngasaklu.”

⁴⁵Marywuili kharā Jihudi kachungkhana Jishuna kasā chi theida ali shitsanghaowa.

⁴⁶Kha athumwui ngachaili kaikhana Jishuna sākahai chi Phariseebingli unghāngchithei.

⁴⁷Chieina Phariseebing eina pāngmon akhokabingna hangva̱naoli ngasoda kaziplaga hānga, “Kathausikhala? Mipa hina machut kachungkha sāda lei.

⁴⁸Ithumna ali hithada chihohaiakha mi kachiva̱ ali shitsanghaora, kala Rome shorkarna rāda ithumwui khorumshim kala yur hi shimān ngasakhaora!”

⁴⁹ Athumwui ngachaili Caiaphas kaho chikum Pāngmon Kharei sākasapā china hānga, “Nathum kayākha mangma̱haokhala?

⁵⁰Yur katonga shimānki kajile mibingwui vang mi akha thikhangasak phamei kaji nathum matheimala?”

⁵¹Kachangkhat hi awui ning eina kahāng maningmana, kha chikum ana Pāngmon Kharei sāsāhaoda Jihudi yurwui vang Jishuna thimira kaji hāngkhamarānna.

⁵² Kala athumwui vangmāng maningla, Varewui mibing chaiyāng eina leikasābingli akha sāda ungkazip ngasakra kajina.

⁵³Chithang eina thuida Jihudi akhavābingna Jishuli shaothat khavai khangarān sāphoka.

⁵⁴Chiwui vang eina Jishuna Judeali phonglāk eina mazatla, lamhāng ngalemli khalei Ephraim kaho keinung chili sākhangatha̱bingli ngasoda apama.

⁵⁵ Chitharan Makānkhami phanit nganaiuda mi kachungkha zātkhān masāranglakha pheokhamatharwui kachigat sākhavai, kha̱ kha̱wui eina Jerusalemli kai.

⁵⁶ Athumna Jishuli phāda, khorumshimli kaziprumlaga akha eina akha ngahān ngaroka, “Khi phaningkhala? A zātkhānli marāzangmarala?”

⁵⁷Jishuli tukkhui khavai kachikathāna a khaleipam theiakha hāngmilu da pāngmon kharei kala akhavābingna hukhum sahairasai.