Read Tangkhul Naga JOHN 14 Bible Online

JOHN 14 - Tangkhul Naga bible

JOHN 14

¹Jishuna hānga, “Wuk makhanangalu; Vareli shitsangmalu, kala ilila shitsanglu.

² Iwui Avāwui shimli pamkhavai kā kachungkha lei; chi maningsi kaja ina nathumwui vang pam angaranura da hāngrala?

³Kala nathumwui vang pam angarānhailaga nathumli rāhokhuiluira, chieina I khaleipamli nathumla leira.

⁴Kala ina vāki kaji shongfa nathum thei.”

⁵ Thomasna hānga, “Proho nana vāki kaji shongfa ithum matheimana, chili vākhavai shongfa chi kathada ithumna theirakhala?”

⁶ Jishuna ngahānkai, “I shongfana, khamashungana, kala kharingana; iwui eina maningla Avāva̱wuili khipākha marāpaimana.

⁷Nathumna ili theisāsi kaje iwui Avālila theihairara, arui hiwui eina thuida nathumna awui apongli theihaira, mik einala theihaira.”

⁸Philipna hānga, “Proho, Avā chi ithumli chitheimilu, ithum ningyangunglakhaora.”

⁹ Jishuna ngahānkai, “Hirankha nathumli ngasopamhaira, laga ili matheirangla, Philip? Kachikathāna ili theihaiakha Avāli theikahaina. Chithākha khisāda Avāli chitheilu da hāngkhala?

¹⁰I Avāwuili lei kala Avā iwuili lei kaji hi mashitsangmala? Ina khamatui hi iwui eina kashok maningmana, kha ili khalei Avāna kasā otsakna.

¹¹ I Avāwuili lei kala Avā iwuili lei kaji hi shitsanglu. Chi maningkha ina sākahai otbing chiwui vang shitsanglu.

¹²Kachangkhat ina nathumli kahāngna, kachikathāna ili shitsangakha ina kasā ot chi ala sāshapra, hakkhamei ot eina tangda sāra, kaja I Avāwuili vāhaora.

¹³ Kala nathumna iwui ming eina kapopo chi ina sāmira, chieina Avāva̱wui tekhamatei chi Anaomayarawui mangā eina theikhuipaira.

¹⁴Nathumna iwui ming eina kapopo chi ina mira.

¹⁵ “Nathumna ili leishiakha iwui ningkhami mayonra.

¹⁶ Ina Avāli pora kala ana nathumli katang mavaila ngasopamki kaje Machinme akha mira, khamashungwui Manglā china nathumli ngasopamchingra.

¹⁷Chi apuk-apagva̱na masamphangkhararra khamashungwui Manglāna. Kachiwui vangkhala kaja apuk-apagva̱̱na ali mik einala matheimana, ning einala theikakhuila maleimana. Nathumna ali thei, kaja ana nathumli ngasopamda lei kala nathumwui lungli leira.

¹⁸“Ina zatkahai tharan ina nathumli ngachakyāng eina mahorhaimara; I rāluira.

¹⁹ Hunkhawui thili apuk-apagva̱̱na ili matheiluimara, kha nathumna theira; kala ina kharingwui vang nathumla ringra.

²⁰Chithang I Avāwuili lei, nathum iwuili lei kala I nathumwuili lei kaji nathumna theira.

²¹“Kachikathāna iwui ningkhami khuisangda mayonakha a ili leikashena. Ili leikashe chili iwui Avānala leishira; inala ali leishida I khalatta ali phongmira.”

²² Judas (Iscariot makhaninga)na ali hānga, “Proho, na khalatta apuk-apagva̱li maphongmila ithumli phongmira kaji hi kathada sāpairakhala?”

²³ Jishuna ngahānkai, “Ili leikashe mi china iwui tui khuisangra kala iwui Avāna ali leishira, kala iwui Avā inina awuili rāda ali ringrumra.

²⁴Kachikathāna ili maleishiakha iwui tui makhuisangmara. Kala nathumna shākahai tamkachithei chi iwui eina kharā maningmana, kha ili kashirāta Avāwui eina kharāna.

²⁵“Hibing hi ina nathumli ngasopamlakha hānghaira.

²⁶Iwui ming eina Avāna shirātki kaje Manglā Kathara, Machinme china ot saikora nathumli tamchitheira, kala ina hāngkahai saikora phaningung ngasakra.

²⁷ “Ina nathumli chingri kahai haikhamina; I khalattawui chingri kahai nathumli khamina. Okathuina khami thada nathumli khami maningmana. Wukmakhananglakalu; khangacheela mangacheealu.

²⁸‘Ina thuihailala rāluishitra’ da ina kahāng chi nathumna shāhaira. Nathumna ili leishiakha, ina Avāwuili vaura kaji hili ringphāngayilaka, kachiwui vangkhala kaja ana ili reikhameina.

²⁹ Hi mashokranglakha nathumli ina kahāngna, chieina chi kashok tharan nathumna shitsangra.

³⁰ Ina nathumli kasāngkha mangazekrarluimara, kachiwui vangkhala kaja okathui hiwui khamunga rārāda lei. Ana iwuitungli khikha masārarmara,

³¹ kha iwui Avāna kakaso athishurda kasāna, chieina ina iwui Avāli leishiya kaji okathuina theira. “Ngakarthuilu, ithum zatusa.