Read Tangkhul Naga JOHN 16 Bible Online

JOHN 16 - Tangkhul Naga bible

JOHN 16

¹“Nathum makonglui khavai saikora hi ina hānghaira.

² Athumna nathumli synagoguewui eina kashamshokra; makahatla nathumli shaokathata china awui otsak chi Vareli otram khangatha̱na da kaphaning atam rāra.

³Athumna Avālila ilila makatheiwui vang chikathā ot sāra.

⁴Kha ina nathumli hibing hi hāngkahaina kaja athumwui atam chi kharā tharan, athumwui pongli ina nathumli hānga kaji phaningungra. “Ina haokaphokli saikora hi nathumli mahangmana, kaja I nathumli ngasosai,

⁵ kha ara I ili kashirāta chili ungura, kha nathum khipākhana ‘Kali vāra̱khala?’ da mangahānmana.

⁶Kha ara ina hikathāthā kahāngwui vang nathum wukkakhanangna pemhaira.

⁷ Kha khamashung tui ina nathumli kahāngna, nathumwui vanga I kathuina phāmei, kaja I mathuiakha Machinme chi nathumwuili marāmara, kha ina thuihaiakha ali chihorāra.

⁸Ana kharā tharan apuk-apagawui mibingna moreiwui, khamashung khangarongwui kala bicharsakwui pongli theinguida khalei chi ana chitheimira;

⁹ moreiwui pongli jiakha, athum ili mashitsangthuwa;

¹⁰ khamashung khangarongwui pongli jiakha athum theiyonhaira, kaja ina Avāwuili vāda nathumna ili matheiluimara;

¹¹ bicharsakwui pongli jiakha, apug-apaga hiwui khamungali bichar sāhaira.

¹²“Ina nathumli kachungkha hāngkhavai lei, kha nathum arui nganākhuikida saknāhaora.

¹³Khamashungwui Manglā chi kharā tharan, ana nathumli khamashung katonga chitheira. Ana a khalattawui sāshap eina mamatuimara kha ana shākakhui chi matuira kala rāki kaji chi ana nathumli chitheira.

¹⁴ Ana ili tekmatei ngasakra kaja ina kahāng chi ana khuilaga nathumli hāngchitheira.

¹⁵Avāwui khalei katonga iwuina, chiwui vang eina ina kahāngna kaja ana iwui eina khuilaga nathumli hāngchitheira kajina.

¹⁶ “Kasha̱kha leilaga nathumna ili matheiluimara; kala kasha̱khawui thili nathumna ili theiluira.”

¹⁷Chieina sākhangatha̱bingna ngazek ngaroka. “Kasha̱kha leilaga nathumna ili matheiluimara, kala kasha̱khawui thili nathumna ili theiluira” da kahāng hi khisawi kajikhala? Kala “I Avāwuili ungura” dala hānga.

¹⁸Athumna hānga, “'Kasha̱kha’ kajiwui kakhalat khikhala? Ana khi kahāngkhala da ithum matheimana.”

¹⁹Athumna Jishuli ngahānkhuikhangai chi Jishuna theida hānga, “Kasha̱nakha leilaga nathumna ili matheiluimara; kala kasha̱khawui thili nathumna ili theiluira” da ina kahāng hiwui pongli ngazek khangarokla?

²⁰ Kachangkhat eina ina nathumli kahāngna, nathumna chapta sifaakha apuk-apagana mana̱ra; nathum wukhanangra, kha wukakhanang chi khamathān onhaora.

²¹ Sha̱naona naokhara̱ tharan wukhananga kaja awui kachot atam rāhaowa, kha nao pharā kahai tharan kachot saikora malaiserhaowa, kachiwui vangkhala kaja okathuili nao akha pharāhaida ringphāhaowa.

²²Chi tākam eina aruihon nathum chotta lei, kha ina nathumli samphangluira, kala nathumwui ning khamathānna pemhaora. Chi kathā khamathān chi nathumwui eina khipānakha mangapaithuimara.

²³Chitharan nathumna ili khikha mapomara. Kachangkhat ina nathumli kahāngna, nathumna iwui ming singda iwui Avāli kapo saikora ana mira.

²⁴ Aja eina tangda nathumna iwui ming singda mapolakranga; polu, samphangra, chi eina nathumwui ringkaphā kāshungra.

²⁵ “Ina nathumli chānjam eina kahāngna; kha chānjam eina mahāngluila Avāwui pongli ngatartei eina hāngkhavai atam rāhaira.

²⁶Chitharan nathumna iming singda Ali pora; ina nathumwui vang pomira kaji maningmana,

²⁷kaja Avā ā khalattana nathumli leishilāka, kachiwui vangkhala kaja nathumna ili leishi kala I iwui Avāwui eina kharāna kaji nathumna shitsanga.

²⁸I iwui Avāwui eina okathui hili kharāna; kala ara okathui hiwui eina iwui Avāwuili ungluihaora.”

²⁹Awui sākhangatha̱bingna hānga, “Yanglu, chānjamtui eina maningla ara nana phonglāk eina hānghaira.

³⁰Nana theisera kaji ara ithumna theihaira, kala ngahānlui khavai maleiluimana. Hi eina na Varewui eina rai kaji ithum shitsanghaira.”

³¹Jishuna athumli ngahānkai, “Nathum ara shitsanghairala?

³² Nathum chaiyāng eina kachichāwui shimli unghaida, ili ngachakyāng eina nothāhaoki kaji atam chi rārāli kala kharāla rāhaira. Tha-ilala imāng majimana, kaja iwui Avāna ili ngasoda lei.

³³ Ina nathumli hi hānghaira, iwuili nathumna chingri kahai samphangra. Okathuili nathumna kachotkachāng samphangra, kha ningai mathānlu, ina okathuili yuihaira!”