Read Tangkhul Naga JOHN 17 Bible Online

JOHN 17 - Tangkhul Naga bible

JOHN 17

¹Jishuna hi hāngkup kahaiwui thili kazingram yangkāda hānga, “Avā, atam chi rāhaira; Nanaomayarali tekmatei ngasakmilu, chieina Nanaomayarana nali tekmatei ngasakra,

²khikhalajila nana mikahai mikumo saikorali katang makhavai kharing mikhavai nana ali pangshap mihaira.

³Katang makhavai kharing kaji hi akhamāng kaje khamashunga Vareli kala nana kashirāta Jishu Khristali mikumona kathei hina.

⁴Nana ili sālu da mikahai ot chi sakuphaida okathui hili ina nali tekmatei ngasakhaira.

⁵ Chieina ara Avā, apuk-apagva̱̱ masāranglakha nali ngasoda ina tekhamatei eina leikasā chieina nawui mangāli ili tekmatei ngasakmilu.

⁶“Apuk-apagvawui eina kapangkhuida nana ili khami mibing chili ina naming theingasakhaira, athum nawuina, kala athum chi nana ili mida athumna nawui tui nganai.

⁷Ara nana ili mikahai saikora hi nawui eina kharālaka da athumna theihaira;

⁸khikhalajila nana ili khami paokaphā chi ina athumli mida athumna samphanghaira. Chieina I nawui eina rai kaji hi mashunga da athumna theihaira, kala nana ili kashirātna kaji athumna shitsanghaira.

⁹ “Ina athumwui vang seihā sali; ina apuk-apagawui vang seihā masāmana, kha nana ili mikahaia athumwui vang kasāna, kaja athum nawuina.

¹⁰Iwui khalei saikora nawuina, kala nawui saikora iwuina kala iwui tekhamatei athumwui eina theingasakhaira.

¹¹ Ara I apuk-apagva̱li maleiluimana, kha athuma apuk-apagva̱li lei, kala I nawuili rārāli. Tharkhamathenga Avā, nana ili mikahai athumli nawui mingwui pangshap china mayonmilu. Chieina na eina I akha kasā thada, athum akha ngasāpaira.

¹² Nana ili mikahai athumli ina ngasoda leilakha namingwui pangshap eina ina athumli mayonmi, ina athumli mayonmida leilakha, kathara tui chi ungshung khavai shimānphalungki kajepa maningla khipākha mashimānmana.

¹³Ara I nawuili rārāli, kala ina okathuili hi kahāng hiya, iwui ringkaphā chi athumna ningli pemting eina samphang khavaina.

¹⁴ Ina nawui pao chi athumli mi, chieina okathuina athumli ningkachaihaowa kaja ina okathui hiwui makhaning thada athumla okathui hiwui maningmana.

¹⁵Athumli okathuiwui eina khuithui khavai kapo maningmana, kha athumli makaphāwui eina mayonmi khavai kapona.

¹⁶Ina okathui hiwui makhaning thada athumla okathui hiwui maningmana.

¹⁷Khamashung chieina athumli namingli dharchikatmilu, kaja nawui tui chiya khamashungana.

¹⁸Nana okathui hili ili kashirāt thada, athumli ina okathuili kashivātna.

¹⁹Kala athumna khamashung eina chigatshap khavai I khalatta nali kachigatna.

²⁰“Ina hibingwui vāngmāng seihā kasā maningmana, kha athumwui tui shāda ili shitkasanga athumwui vangla seihā kasāna,

²¹ chiya athum akha sāpaira; Avā, nana iwuili, kala ina nawuili khalei thada, athum iniwuili leiranu, chithākha apuk-apagva̱na nana ili kashirātna kaji shitsangra.

²²Nana ili khami tekhamatei chi ina athumli mihaira, chieina na eina I akha kasa thada, athum akha sapaira,

²³ina athumli kala nana ili leida athum tongtingda akha sapaira, chieina nana ili kashirātna kala nana ili leikashi thada athumlila leishiya kaji apuk-apagva̱na theira.

²⁴ “Avā, nana ili mikahaia athum, apuk-apagva̱ masāranglakha nana ili leishida mikahai tekhamatei chi yangkhui khavai, I khalaleipamli athumlila leingasakngai.

²⁵He, khamashung khangaronga Avā, apuk-apagana nali matheiranga, kha ina nali theihaira, kala china, nana ili kashirātna kaji thei.

²⁶Ina athumli naming theingasakhaira, kala chithada theingasakchingra. Chieina nana ili leikashi chi athumwuilila leira, kala inala athumwuili leira.”