Read Tangkhul Naga JOHN 19 Bible Online

JOHN 19 - Tangkhul Naga bible

JOHN 19

¹Chiwui thili Pilatena Jishuli shaongasaka.

² Kala shipaibingna ka̱shatthing eina wungkuihon sākhuilga akuili ngahonmi; kala mengchin kahai kachon akha ngavaimi;

³kala “Jihudiwui Awungali okpeimeiranu” da hānglaga athumna maili kākapheya.

⁴ Pilatena kayāngli shokluishitta yaruili hānga, “Awuili ina khayon khikha masamphangmana da nathumna theikhavai ina ali hili khuishokta lei.”

⁵Chieina Jishuna ka̱shat kuihon ngahonda kala mengchin kahai kachon ngavaida kayāngli shoka. Pilatena athumli hānga, “Yanglu, mi chi hina!”

⁶Pāngmon akhokabing kala kathānabingna ali kathei eina “Krushli shaoshānhaolu! krushli shaoshānhaolu!” da vaokazama. Pilatena athumli hānga, “Chithākha nathumna rākhuilaga krushli shaoshānlu, kaja iya awuili khikha khayon masamphangmana.”

⁷ Jihudibingna ngahānkai, “Ana Varewui Naomayarana da kahāngwui vang a thingayiphalunga kaji hi ainli kapihaida lei.”

⁸Chi shālaga Pilate ngacheemeihaowa.

⁹Ana kārotli zangluishitta Jishuli hānga, “Na kachiwui eina kharākhala?” Kha Jishuna mangahānkāthuwa.

¹⁰Chieina Pilatena hānga, “Na ili mangahānmarala? Nali chihomikashap kala krushli shaoshānkashap pangshap iwuili lei kaji na matheimala?”

¹¹ Jishuna ali ngahānkai, “Varena nali khami chiwui vangmāng nana iwuitungli pangshap khaleimaya. Chieina ili nawui pāngli horsangkhame mibing chiwui morei hakmei.”

¹² Pilatena tui chi shālaga Jishuli chihomi khavai khangarān sai. Kha Jihudibingna “Nana ali chihomihaiakha, na Caesarwui ngasotnao maningmana, awunga sākhavai khangarān kasā mi chi Caesarli yangkashina” da vaowa.

¹³Pilatena chi shālaga Jishuli khuishoka kala Hebrew tuili Gabbatha kaho Lungham bichar pamkhong chili shokpama.

¹⁴ Chithang chi Makānkhami phanitwui vang khangarān kasā zimikshona kala pung katharuka atamna. Pilatena Jihudibingli hānga, “Yanglu, nathumwui awunga!”

¹⁵Athumna vaoda hānga, “Ali khuithuihaolu, ali khuithuihaolu, krushtungli shaoshānhaolu!” Pilatena hānga, “Nathumwui Awungali krushli shaoshān ngasakngaila?” Pāngmon akhokabingna ngahānkai, “Ithumwui awunga Caesar maningla khangatei maleimana.”

¹⁶Chieina Pilatena Jishuli krushli shaoshān khavai athumwui pāngli horsangmihaowa. Chieina athumna Jishuli khuithuihaowa,

¹⁷ kala awui krush phungda Mikuira̱ kaho apam chili vai, chi Hebrew tuili Golgotha hoi.

¹⁸Apam chili athumna Jishuli krushli shaoshāna, kala khangatei mi khanilila lākharip, Jishuna alungli zangda krushli shaoshānruma.

¹⁹Pilatena tuipeng akha kapikhuilaga krushli shāphai; tui chi hithai: “Nazarethwui Jishu, Jihudiwui Awunga”

²⁰Jihudi kachungkhana chi kapā samphanga, kaja Jishuli shaokashān apam chi keinungwui eina matānāmana. Kapi kahai chi Hebrew, Latin kala Greek tui eina kapihai.

²¹Jihudiwui pāngmon khareibingna Pilateli hānga, “‘Jihudiwui Awunga’ da makapimialu, kha mipa hina ‘I Jihudiwui Awungana da hānga’ da kapilu.”

²²Pilatena ngahānkai, “Ina kapi kahai chi kapi kahaina.”

²³Shipaibingna Jishuli krushli shaoshān kahaiwui thili awui kashankachon khuida akhum mati sālaga shipai ava̱va̱na akhum ava̱va̱ khui. Phahon katuma chila khui. Kha awui phahon katuma che amalak mavaila ato eina thuida aze tāshungda rakrumhaisai.

²⁴ Chieina athum akha eina akha ngazek ngarokta “He maserkhākhaisa, khipāwui ngasānikhala, ka̱lā yanghaosa” da mayāngaroka. Hi kathara tuili hāngkahai, “Athumna iwui kashankachon ngayara; kala iwui phahon katumawui vang ka̱lā yangra” kaji chi ungshung khavaina.

²⁵ Shipaibingna chithada sai. Kha krush ngalemli Jishuwui ava̱, ava̱gatui Cleopaswui preiva̱ Mary, kala Mary Magdalene athum nganingsai.

²⁶ Jishuna ava̱ eina leikashiya sākhangatha̱ akha chi nganingkasā theida ava̱va̱li hānga, “Sha̱nao, yanglu, nanao mayarali!”

²⁷Chiwui thili sākhangatha̱pa chili hānga, “Chi nava̱na.” Chithang eina thuida sākhangatha̱pa china ava̱va̱ chi ashi shimli thanunghaowa.

²⁸ Chiwui thili Jishuna ot kuphaira kaji theida, Kathara lairikwui tui chi ungshung khavai, “I ra̱changhaira” da hānga.

²⁹Chili drakhāthei kathur tengkotkha haisai; chieina athumna chonshi akha thing akhali khalapshānhailaga atheira̱ chumkhuilaga Jishuwui khamorli sangmi.

³⁰Jishuna atheira̱ chi manglaga “Ngachanghaira” da hānglaga kui mashunzangda thihaowa.

³¹ Chithang chi Khangaran kasā zimiksho sāhaoda, sabbaththang (kaja sabbath hi haklāk kahai zimikshona) kathi angun chi krushli kāngyuilaga mahaingaithuda athumna aphei sāteklaga krushwui eina khuithuihai khavai Jihudibingna Pilateli poi.

³²Chieina shipaibingna nganaimeikap kaje chiwui aphei sātekhaowa, kala chiwui thili Jishuwui lākhavāk khaleipāwuila sāteka.

³³Kha Jishuli vākhayang eina a thihaira̱kasā chi theihaida masātekmana.

³⁴ Kha shipai akhana Jishuwui arapli kazei eina runga, kala chichangli ashee eina tara̱ manātta longshoka.

³⁵ Hi mik eina katheia mipa china shākhi khamina— awui shākhi chi mashunga kala a khamashung tui matui kaji ana thei—chieina nathumnala shitsangpaira.

³⁶ Kathara lairikli “Awui ara̱kui akhala matek ngasakmara” da hāngkahai chi ungshung ngasaka.

³⁷ Kathara tui khangatei akhalila hithada hānga, “Athumna rungthat kahaia chili athumna yangkāra.”

³⁸ Hiwui thili Arimatheawui Joseph, Jihudibingli ngacheehaida ngathumda Jishuwui sākhangatha̱ sākasapā china Jishuwui aphasā makhuipairakhala da Pilateli apoi. Pilatena awui phasā khuipaira da mayāmihaoda Josephna vālaga aphasā chi akhui.

³⁹ Jishuli thangngayākha rasamkaphanga Nicodemusla myrrh eina aloes khamanāta nganamkaphā thao pound shākha sha̱kha khuiphungda Josephli ngasovai.

⁴⁰ Anina Jishuwui phasā chi khuitālaga Jihudiwui kachizan khangachā athishurda khamanaka kachon eina romkhui kala nganamkaphā thao neomi.

⁴¹Jishuli shaokathat apam chili yāmgui akha leisai, kala chiwui alungli khipālikha machizanlakrang kasā kashophutkakhui chikhur kadhar akha leisai.

⁴²Akhama kathā Jihudiwui Sabbath zimiksho sāhaogada kala chiwui ngalemli chikhurla leisāda Jishuli chili chizanhaowa.