Read Tangkhul Naga JOHN 2 Bible Online

JOHN 2 - Tangkhul Naga bible

JOHN 2

¹ Kakathumathang Galileeli khalei keinung Canali ngalā shakazā akha leisai, kala Jishuwui ava̱la chili leisai.

²Ngala shakazā chili Jishulila, awui sākhangatha̱binglila hoi.

³ Drakhāra̱ yaongakān kahai eina ava̱va̱na Jishuli hānga, “Ashi drakhāra̱ maleithura.”

⁴ Chieina Jishuna hānga, “Ina khi sangayikhala kaji nana mahangphalungki kajina, iwui atam marāranga.”

⁵Chieina ava̱va̱na raobing chili hānga, “Ana kahahāng chi sālu.”

⁶ Apam chili Jihudiwui khangachā athishurda pheokhamatharli shichin khavai tara̱ liter shāshā kazanga ngankhā tharuk haisai.

⁷Jishuna raobing chili hānga. “Hambing hi tara̱ chipemhaolu.” Athumna ham chiwui akhamong kāshungda chipemserhaowa,

⁸kala Jishuna hānglui, “Ara sokkhuida zātkhān kashina chili khuivāmilu.” Chieina athumna ali khuivāmi.

⁹Zātkhān kashina china mazapkhayang eina drakhāra̱ onhairasai. Drakhāra̱ hi kachiwui eina kharākhala da ana matheimana (kha tara̱ sokkakhuiana chi thei). Chieina mākhām kahaia chili hokhuida hānga,

¹⁰“Mi kachiva̱na mangkaphā rida khami khangachāna, kala mibingna penlak eina mangkahaiwui thili mamangphākhamei khamina. Kha nashe aruila mangkaphā haifada lei.”

¹¹ Jishuna matakhak kahai sakhare chi Galileeli khalei Canali sai, apam chili awui tekhamatei ana phongshoka kala awui sākhangatha̱bingna ali shitsanga.

¹² Chiwui thili Jishu kala ashava̱, achinā ngarā kala awui sākhangatha̱bingna Capernaumli vai kala chili khani kathumthang apamsanga.

¹³ Jihudiwui Makānkhami Phanit chi nganaihaoda Jishuna Jerusalemli vai.

¹⁴ Khorumshimlungli sei, yao, kha̱na̱ yorkasā kala lupā kakaibingna leih sākasā thei.

¹⁵Chieina ana khara̱wui lijei sākhuilaga yao kala sei saikora khorumshimwui eina kashamshokmihaowa, kala lupā kakaibingwui tablela phalatmida lupākha̱bing chi heitha̱miserhaowa.

¹⁶ Kala kha̱na̱ khayorbing chili ana kasoi, “Ot saikora hi hiwui eina khuishokhaolu! iwui Avāwui shim hi leihngapha̱ masā ngasakpaimana.”

¹⁷ Awui sākhangatha̱bingna kathara lairikli hāngkahai, “Nawui shimwui vang iwui ningkatong hi mei thada chuida lei” kaji phaningunga.

¹⁸ Jihudiwui kathānabingna hānga, “Nana hi kasāwui mashun leiya da chithei khavai khi machut leikhala?”

¹⁹ Jishuna ngahānkai, “Khorumshim hi sākhaihaolu, laga ina kathumthangwui alungli sakāluira.”

²⁰Chieina Jihudibingna hānga, “Khorumshim hi sakakāli zingkum hangmatida tharuk zanga, laga nana kathumthangwui alungli sākāra kajila?”

²¹ Kha Jishuna khorumshim da khamatui chiya awui phasāli kahāngna.

²² Chieina ana kathiwui eina ringshoklui kahai tharan, hiwui pongli ana hāngkahai chi sākhangatha̱bingna phaningungda kathara tui kala Jishuna hāngkahai chili shitsanga.

²³Makānkhami phanitwui atamli Jishuna Jerusalemli leilakha, mi kachungkhana ana kasā matakhak kahai ot chi theilaga awui mingli shitsanghaowa;

²⁴kha Jishuna athumli mashitsangmana, kaja athum saikorali ana theisera,

²⁵ mi khipānakha athumwui pongli ali hāngmi khavai darkar masāmana kaja a khalattana athumwui ningli khi leikhala kaji thei.