Read Tangkhul Naga JOHN 20 Bible Online

JOHN 20 - Tangkhul Naga bible

JOHN 20

¹ Haptāwui kharethang, ngathorthākva̱ kazing mahornāranglakha, Mary Magdalenena chikhurli vai, kala chikhur chiwui lungsham chi khalangshokhairakasā chi athei.

²Chieina ana ngasamungda Peter kala Jishuna leikashi sākhangatha̱pa chili unghānga, “Athumna Prohowui angun chikhurwui eina khuithuihaira kala kali haihaokhala kaji matheimana.”

³ Chieina Peter eina sākhangatha̱pā china chikhurli ayang khavai vai.

⁴Anina ngasamvai, kha sākhangatha̱ akhapāna Peterli thākmeihaoda vāshungrihaowa.

⁵Kala ana hamzangda yangkazang eina khamanaka kachon chi thei, kha chikhurwui alungli mazangmana.

⁶Simon Peterna naoda rālaga mangasāmlakla chikhurlungli zangyanga, kala neikhavai khamanaka kachon chi thei,

⁷kala kuili neimi kahai kachon chi chili maleila khaluilaga ngateida leisai.

⁸Chikhurpamli rāshungkhare sākhangatha̱ akhapā chila zangyanga, kala chi theilaga ana shitsanghaowa.

⁹ Kathara lairikli hāngkahai, “A kathiwui eina ringshokphalungra” kaji hi matheirangsai.

¹⁰Chieina ani shimli unghaowa.

¹¹Maryna chikhur ngalemli chappama kala chapsasui eina chikhurli yangkazang tharan,

¹² kazingrao khani Jishuli chipethaikasā apam chili akhana kuishakli, akhana pheivāk, kachara sāri ngavaida pamkasā chi thei.

¹³ Anina hānga, “Sha̱nao, khisāda chapkhala?” Maryna ngahānkai, “Iwui Proholi athumna khuithuihaowa, kala kali haihaokhala kaji matheithuwa.”

¹⁴ Ana chi hānghailaga ngareikhaung eina Jishu chili nganingsai, kha chi Jishuna kaji ana matheimana.

¹⁵Jishuna hānga, “Sha̱nao, khisāda chaplikhala? Khipāli kaphākhala?” Yāmgui khamayonapā-eili da phaningda Maryna hānga, “Amei, phasā chi nana khuihaida leiakha kali ahaihaokhala, ili kahāngmilu, ina akhuira.”

¹⁶Jishuna hānga, “Mary!” Chieina Maryna ngareiungda Hebrew tui eina “Rabboni!” ji. Hiwui kakhalatna “Ojā” kajina.

¹⁷ Jishuna hānga, “Ili masāza̱alu, kachiwui vangkhala kaja I Avāwuili makāranga. Kha ichināngarāli vāda, ina iwui Avā kala nathumwui Avā, iwui kala nathumwui Vareli kaura, kaji unghāngmilu.”

¹⁸ Chieina Mary Magdalenena Proholi ana kathei kala Prohona hithada unghānglu kaji chi sākhangatha̱bingli unghānga.

¹⁹ Haptāwui kharethang ngazin sākhangatha̱bingna Jihudiwui akhavābingli khangacheewui vang khamong rarhailaga kazipamsai. Chili Jishuna athumwui ngachaili rānganingda hānga, “Nathumli chingrihairanu.”

²⁰Laga awui pāngmayā eina ari chithei. Sākhangatha̱bing chi Proholi theilaga khamathānna pemhaowa.

²¹ Chieina Jishuna hāngluishita, “Nathumli chingrihairanu. Avāna ili kashirāt thada ina nathumli kashivātna.”

²² Chiwui thili Jishuna athumli khakkhārorda hānga, “Manglā Kathara chi khuilu.

²³ Nathumna kachikathāwui morei pheomiakha athumli pheomihaira; nathumna mapheomiakha athumli mapheomithura.”

²⁴ Jishuna kharā tharan Thomas, Ngashira kaho, sākhangatha̱a chi maleisāmana.

²⁵Chieina khangateibingna “Ithum Proholi theihaira” da hānga. Kha Thomasna hānga, “Awui pāngmayāwui yotpichon imik eina matheiranglakha kala yotpi khamāli ipāngmareng eina masāza̱ranglakha, arili ipāng eina makhamāza̱ranglakha I mashitsangmara.”

²⁶Haptā akha shānglaga kazipluishita, kala Thomasla chili zanga. Khamong rarser kahaina, kha Jishuna athumwui ngachaili rānganingda hānga, “Nathumli chingrihairanu.”

²⁷ Kala Thomasli hānga, “Napāngmareng hili rāhailu, kala ipāngli yanglu, napāng katingrāda iwui arili khamāyanglu. Ning khamaong masaalu, kha shitsanglu.”

²⁸Thomasna ngahānkai, “Iwui Proho, iwui Vare!”

²⁹ Jishuna ali hānga, “Ili theihaoda ara nana shitkasangla? Mik eina matheila shitkasanga athum chi sokhamina.”

³⁰ Jishuna sākhangatha̱bingwui mangāli matakhak kahai ot khangatei kachungkha sai, kha hili makapiserhaimana;

³¹ kha Jishu hi Varewui Naomayara, Khrista china da nathumna shitsang khavaiwui vang kala shitkasangda awui mingli kharing samphang khavai hibing hi kapi kahaina.