Read Tangkhul Naga JOHN 3 Bible Online

JOHN 3 - Tangkhul Naga bible

JOHN 3

¹ Chitharan Phariseewui mi akha Nicodemus kaho Jihudiwui kathāna akha leisai.

² Thangngayākha ana Jishuli rahānga. “Ojā, nava Varena chihokharā ojā akhana da ithumna thei. Sakahai machutbing hi Varena ngasokhami maningla khipānakha masārarmana.”

³ Jishuna ngahānkai, “Kachangkhat eina ina nali kahāngna, mapharāluishitakha khipānakha Vare wungram matheirarmara.”

⁴Nicodemusna, “Mi akhana sārhailaga kathada pharāluishitpairakhala? Ana ava̱wui wuklungli zangluishitlaga kakhane sāda pharāluipairala?” da ngahāna.

⁵ Jishuna ngahānkai, “Kachangkhat eina ina nali kahāngna, kachikathāna tara̱ eina kala Manglā eina kapharā maningakha Vare wungramli mazangrarmara.

⁶ Phasāna kapharā chi phasāna kala Manglāna kapharā chi manglāna.

⁷Ina nali kahāng hi mamatakhakhaialu, ‘nathum pharāluishitphalungra.

⁸ Masina awui phankhangaili phana, kala chiwui akhon nathumna shālaga kachiwui eina phankharā kala kachivāk phanvāhaokhala kaji nathum matheimana. Manglāna kapharā mi kachiva̱ chithāpapama.

⁹“Kathada hi sapairakhala?” da Nicodemusna ngahāna.

¹⁰Jishuna ngahānkai, “Na Israelwui ojā akhalaga chi matheimala?

¹¹ Kachangkhat eina ina kahāngna, ithuma ithumna kathei chi matui kala mik eina theikahai chi shākhi mi, kha nathumna ithumwui shākhi hi makhuisangmana.

¹²Ina okathuiwui ot hānglaga nana ili mashitsangakha kazingramwui ot hāngda nana kathada ili shitsangrakhala?

¹³ Kazingramwui eina katā miwui Naomayara chi maningla khipākha kazingram kākahai maleimana.”

¹⁴ Mosesna lamhāngli phara̱li khāngkakā chithada miwui Naomayaralila khāngkāphalungra.

¹⁵Kala ali shitkasanga mi kachiva̱ katang makhavai kharing samphangra.

¹⁶ Khikhalajila Varena apuk-apagva̱li leishinā kahaiwui vang awui Naohonaotong chi mi, chieina ali shitkasanga mi kachiva̱ mashimānphalungmara kha katang makhavai kharing samphangra.

¹⁷ Okathuili bichar sākhavai Varena Anaomayarali chihokharā maningmana, kha awui mangā eina apuk-apaga hi huikhui khavaina.

¹⁸Ali shitkasanga chili bichar masāmana, kha mashitkasanga chili bichar sāpinghaira, kaja ana Varewui Naohonaotong chiwui mingli mashitsangthuwa.

¹⁹ Kala bichar chi hithai: kahor chi okathuili rāhaira, kha mikumona tangkhamangli leishitha̱haowa kaja athumwui otsak maphāmana.

²⁰Makaphā kasā mina kahorli ningkachai kala athumna kahorli marāngaimana, kaja awui otsak mathei ngasakngaimana.

²¹ Kha khamashung khangarong kasaa china awui otsak chi Varewui ningkachāngna da mathingrik eina theikhavai kahorli rai.

²² Chiwui thili Jishula, awui sākhangatha̱bingla Judea ngaleili vai. Apam chili athumli ngasopamda ra̱kahikla ra̱hikmi.

²³Johnnala Salimwui ngalemli khalei Aenonli ra̱hikmisai. Kaja apam chili tara̱ tarākha leisai. Mi kachungkha rāda ana ra̱hikmi.

²⁴ Kaja John phātopli mazangrangsai.

²⁵Chitharan Johnwui sākhangatha̱bing eina Jihudi akha dharmawui pheokhamatharwui pongli ngayāt khangarok shokka.

²⁶ Chieina athumna Johnli ahānga, “Ojā, Jordan kongwui zimikshovāk nali ngasokasā, nana awui maramli shākhi khamipā china hili ra̱hikmida leili, kala mi sorkhangasai awuili vāda lei.”

²⁷ Johnna ngahānkai, “Kazingramwui eina khami maningakha khipānakha khikha masamphangrarmana.

²⁸ ‘I Khrista maningmana kha ali rimeida ili chihokharāna’ da ina hāngkahai chiwui shākhi chi nathumna.

²⁹ Khām kahaiva̱ leikahaia chi khām kahaiana. Khām kahaiawui khamashita, awui ngalemli nāshungda khalei china khām kahaiva̱wui akhon kashā eina mathāna. Chithada sāda iwui ringkaphā chi ara kāshunghaira.

³⁰A mataisangphalungra, kha iya teosangphalungra.”

³¹ Atungshongwui eina katā china saikorali reimei. Okathuiwui eina kharā china okathuiwuina, kala okathuiwui apongli matui, kha kazingramwui eina kharā a china saikorawuitungli lei.

³² Jishuna awui kathei kashā chi hānga, kha khipānakha makhuisangmana.

³³Awui shākhi khuikasanga china Vare hi khamashungalaka kaji hāngshapa.

³⁴Varena kashivāta a china Varewui tui matui kaja Varena Manglā chi khavāt maleila ali mi.

³⁵Avāva̱na Anaomayarali leishiya kala ot saikora awui pāngli horsangmi kahaina.

³⁶ Naomayara chili shitkasanga mi chi katang makhavai kharing lei; kahāng makhanganaa chi kharing kaho matheimara, kha Varewui malungkhavāt awuitungli lei.