Read Tangkhul Naga JOHN 5 Bible Online

JOHN 5 - Tangkhul Naga bible

JOHN 5

¹Chiwui thili Jihudiwui phanit akha leisai kala Jishuna Jerusalemli vai.

²Jerusalemwui Yao-Ngavei ngalemli yāngkhup phangā khalei ra̱khong akha lei, Hebrew tuili Beth-zatha hoi.

³Hili kakazābing kaja mik khangapeo, phei katek kala sheikasha̱bing sorngasaida pamsai— (athumna tara̱ khangatha̱ ngaraipama.

⁴Kaja mararakli Prohowui kazingrao tāda ra̱khong chiwui tara̱ chi ngatha̱ ngasaka. Tara̱ chi ngatha̱ kahaiwui thili zangkharena kazāt khikhikharanu kharai samphanga).

⁵Apam chili zingkum thumrāda chishat kazākahai mi akhala leisai.

⁶Atam chirankha ngaraikapam chi Jishuna theida “Na raingaila?” da ngahāna.

⁷Kakazāpa china ngahānkai, “Amei, tara̱ ngatha̱khaleoda ra̱khongli ili khuizangmi khavai khipākha maleimana; ina zangkida sālala kateina rikhuichinghaowa.”

⁸ Jishuna ali hānga, “Ngakarthuilu, nawui khomphānao chi khuiphungda zatulu”

⁹Chili ngalāngda mipa chi raihaowa kala awui khomphānao khuiphungda zatuwa. Hi shokthang zimiksho chi Sabbathna.

¹⁰ Chieina Jihudibingna raikahaia mi chili hānga, “Aja Sabbathna, nana nawui khomphānao khuikaphung hi masāpaimana.”

¹¹Ana ngahānkai, “Ili raikhamepana, nawui khomphānao khuiphungda zatulu” da hānga.

¹²Athumna “Nali nawui khomphānao khuiphungda zatlu kachipa chi khipākhala?” da ngahāna.

¹³Kha na ali raikhame mipa chi khipākhala da matheithuwa, kaja apam chili mi ngazināhaida Jishu thuihairasai.

¹⁴ Khaleilaga Jishuna ali khorumshimli samphangda hānga, “Yanglu, ara na phāhaira. Morei masāluialu, chithākha nawuitungli khikha zakshikhamei mashokluimara.”

¹⁵Chieina mipa chi zatthuihaowa kala ana ali raikhami chi Jishuna da Jihudiwui akhavābingli ahānga.

¹⁶Hiwui vang eina Jihudibingna Jishuli rekharekphoka kaja ana sabbath zimiksholi kazāt raimihaowa.

¹⁷ Kha Jishuna ngahānkai, “Iwui Avā ot sāchingda lei, ila sāphalungra.”

¹⁸ Hi kashā eina Jihudiwui akhavābingna ali shaothat khavai lungsanmeihaowa kaja ana Sabbathwui ain sakakhaimāng maningla Vareli a khalattawui Avāva̱na jihaowa, kala a khalatta Vareli ngaraichā ngasakhaowa.

¹⁹ Chieina Jishuna athumli hānga, “Kachangkhat eina ina nathumli kahāngna, Anaomayarana a khalattawui ning eina kasā khikha maleimana, kha Avāva̱na kasā chi theida kasāna.

²⁰ Avāva̱na Anaomayarali leishihaoda awui kasāsā saikora chitheisera. Ana hili hakkhamei ot eina tangda ali chitheira, chieina nathum matakhakhaora.

²¹ Avāva̱na kathebingli ringkhangasak thada Anaomayaranala ana ringngasakkhangaibingli kharing kaho chi mira.

²²Avāva̱na khipālikha bichar masāmara, kha bichar saikora Anaomayarali mihaira.

²³ Chieina mi saikorana Avāva̱li khayākashi tākam eina Anaomayaralila khayāshira. Kachikathāna Anaomayarali khayāmashiakha ali kashirāta Avāva̱li khayāmakashina.

²⁴ “Kachangkhat eina nathumli kahāngna, iwui tui shāda ili kashirātali shitkasanga a chi katang makhavai kharing lei. Ali bichar masāmara, kha kathiwui eina kharingli kanshok kahaina.

²⁵ Ina kachangkhat kahāngna, atam rārāli, kathebingna Varewui Naomayarawui akhon shāki kaji atam rāshunghaira kala kashābingna ringra.

²⁶Avāva̱ khalattawuili kharing khalei thada Anaomayaralila kharing chi mihaira,

²⁷kala bichar sākhavai ali pangshap mihaira, kachiwui vangkhala kaja a miwui Naomayarana.

²⁸Hili matakhak kahai masaalu, kaja kathebingna chikhurwui eina awui akhon shāda,

²⁹ kaphā sākahaibingna kharingwui ringkhalui kala makaphā sākahaibingna bicharwui ringkhaluiwui vang shokki kaji atam rārāli.

³⁰ “I khalattawui sāshap eina khikha masārarmana, kha Varena kahāng athishurda ina bichar kasāna, chieina iwui bichar khamashungana; kaja iwui ningkachāng masāla ili kashirātawui kaphaningmāng kasāna.

³¹ “Ina I khalattawui vang shākhi saakha ina kahāng hi akachang maningmana da hāngpai.

³²Kha khangatei akhana iwui vang shākhi mida khaleina, kala chipāna iwui pongli shākhi mida khalei hi khamashungana da ina thei.

³³ Nathumna Johnwuili mi chihovāda theihaira kaja ana khamashung chili shākhi mi.

³⁴ Ina mikumowui shākhi samphangkhangai maningmana kha nathumli huikhui khavaiwui vangna.

³⁵John hiya sharkahai kahora thaomei kathāna, kala nathumna kasha̱khawui vang kahor chili pamngai.

³⁶ Kha iwui vang ina khami shākhi china Johnna khami shākhili hakmei, kaja iwui Avāna sālu da mikahai ina sāda khalei ot hina ili iwui Avāna kashirātna kajiwui shākhina.

³⁷Ili kashirāta iwui Avāna iwui shākhina. Nathumna awui khon mashālakranga, azakla matheilakranga.

³⁸Nathumli awui tui marāzangranga, kaja ana chihokharāpa chi nathumna mashitsangmana.

³⁹ Nathumna kathara lairikli phai, kaja katang makhavai kharing chi chili samphangra da phaninga; kala iwui vang shakhi sakhami chi chibing china,

⁴⁰kha kharing samphang khavai nathumna iwuili marāngaimana.

⁴¹Ina mikumowui masot maphāmana.

⁴²Kha nathumwui wuklungli Varewui leikashi maleimana kaji ina thei.

⁴³ Ina iwui Avāwui ming eina rai, kha nathumna ili makhuisangmana. Khangatei akhana a khalattawui ming eina raakha nathumna ali khuisangra.

⁴⁴Nathum akha eina akha sochikat khangarok ningchānga, kha Varewui kaso chi samphang khavai maphāmana. Chithākha nathumna kathada shitsangpairakhala?

⁴⁵ Ina iwui Avāwui mangāli nathumli khayon mira da maphaningalu. Kha nathumna kachihāna Mosesna nathumli khayon mira.

⁴⁶Nathumna Mosesli shitsangsi kaja ilila shitsangra, khikhalajila ana iwui pongli kagapina.

⁴⁷ Kha nathumna awui kapi kahai chili mashitsanglaga ina hāngkahai chili kathada shitsangrakhala?”