Read Tangkhul Naga JOHN 6 Bible Online

JOHN 6 - Tangkhul Naga bible

JOHN 6

¹ Chiwui thili Jishuna Galilee shamadru vāklaida khalei Tiberias ngayili vai.

²Kakazānaobingli matakhak kahai otsak eina raimi kahai chi theida mi kachungkhana ali shurrai.

³Jishuna kaphung akhali kāda awui sākhangatha̱bingli ngasoda apama.

⁴Chitharan Jihudiwui Makānkhami phanit chi nganaihairasai.

⁵ Jishuna kapeiungda mi kachungkha rakharā chi kathei eina ana Philipli hānga, “Mi hiyākhali mizā khavai kashakazā kali alorakhala?”

⁶Hi Philipli chāng yangkida kasāna, kachangkhat khi sarakhala kaji ana thei.

⁷Philipna ngahānkai, “Mi hiyakhali kateteo mizā khavai lupā shakhani eina lolala kalikha matangmara.”

⁸ Khangatei sākhangatha̱ akha, Simon Peterwui agato Andrewna hānga,

⁹ “Naoshinao akhana khamui phangā, khai khani da khuiphungda lei, kha mi hiyākhali china kali tangra?”

¹⁰“Mi katongali pamzang ngasaklu,” da Jishuna hānga. Kaja chili khawo kachungkha phorsai. Chieina mi katonga pamzanga, saikora chi mayarnao thingphangā shākhana.

¹¹Jishuna khamui chi khuida seihā samihailaga kapambing chili yaowa. Khaih chila khuida chi tākam eina sai, kala mi saikora thoserhaowa.

¹²Athum thoting kahai eina Jishuna sākhangatha̱bingli hānga, “Shaineng chi ngamuikhuilu, kateokhala mashimān ngasakalu.”

¹³Chieina khamui phangā chi mibingna shailaga shaineng luk tharāda khani pemda ngamuikhui.

¹⁴ Matakkhak kahai ot kasā chi theilaga mibingna, “Kachangkhat okathuili rāki kaje marān chi alaka” da hānga.

¹⁵ Mibingna Jishuli tandi eina awunga sāngasak khavai rārāli kaji theihaoda Jishuna kaphungvāk thuiluishithaowa.

¹⁶ Kazing khaying eina sākhangatha̱bingna shamadruvāk tāhaowa,

¹⁷kala marikong tonglaga shamadru kānda Caperna-umvāk latunga. Ngayāhailala Jishuna athumwuili maunglakthuwa.

¹⁸Chitharan siphan zingrot ungda tara̱ ngaphaokazamhaowa.

¹⁹Athumna kilometer phangā tharuk huivā kahaiwui thili Jishuna tara̱tungli zatta marikhongvāk rākharā chi athumna theida ngacheelakhaowa.

²⁰Kha Jishuna athumli, “Mangacheealu, ina” da hānga.

²¹Jishuna marikhongli kākatong eina athum ringphālakhaowa, kala ngalāngda athumna vāki kaji apam ngalei kathengli vāshunghaowa.

²²Akhama kathā shamadru vāklaida leikasābingna marikhong akhamāng leikasā chi thei, kala Jishuna sākhangatha̱bingli mangasola athummāng marikhong tonglaga thuikahai chila thei.

²³Chitharan Tiberiaswui eina kharā marikhongbing chi, Prohona seihā sālaga mi kachungkhali khamui mikashai apam chiwui ngalemli rāngasāma.

²⁴Mibingna Jishula, sākhangatha̱bingla chili mazangmana kaji theida marikhong chili kātonglaga Capernaumli Jishuli phāvai.

²⁵Mibingna shamadruwui lākhavāk Jishuli kāsamphangda hānga, “Ojā, na katharan hili rāshung kajikhala?”

²⁶Jishuna ngahānkai, “Kachangkhat eina ina nathumli kahāngna, nathumna ili kaphā hi machut kathei chiwui vang maningmana, kha khamui shaida katho samkaphangwui vangna.

²⁷ Shimānki kaji kashakazāwui vang ngalang mazāralu, kha miwui Naomayarana nathumli miki kaji katang makhavai kharinga kashakazāwui vang ngalangzarlu, kachiwui vangkhala kaja Varena awui mayākhamiwui mahor ali nammihaira.”

²⁸Chieina athumna ngahāna, “Varewui ot sākhavai ithumna khi sāngayikhala?”

²⁹ Jishuna athumli ngahānkai, “Ana shirātkharāpa chili shitkasang hi Varena sāngasakkhangai chilaka.”

³⁰ Athumna ngahānkai, “Ithumna theilaga nali shitsang khavai nana khi machut leikhala? Nana khi sahairakhala?

³¹ Ishawo ishayi ngarāna lamhāngli manna zai kaji kathara lairikli hithada hānghaida lei; chiya, ‘Ana athumwui zākhavai kazingramwui eina khamui mi.’”

³²Jishuna hānga, “Kachangkhat eina ina nathumli kahāngna, nathumli kazingramwui khamui khame chi Moses maningmana, kha iwui Avāna kazingramwui eina khamina.

³³Kaja kazingramwui eina tālaga apuk-apagali kharing manglā khami chi Varewui khamuina.”

³⁴ Athumna Jishuli hānga, “Amei, ithumli khamui chi michinglu.”

³⁵Jishuna hānga, “I kharingawui kashakazāna, ili kharā mi chi mathaimara, kala ili shitkasanga mi chi mara̱changlakmara.

³⁶ Kha ina kahāng hina kaja nathumna ili theihailala mashitsangmana.

³⁷ Avāna ili khamibing saikora china ili rāra, kala ili kharā mi chili ina mahorhaimara.

³⁸ Kaja ina kazingramwui eina katā hi I khalattawui ningkachāng maningmana, kha ili kashirātawui ningkachāng sākhavaina.

³⁹ Ili kashirātana ili sāngasakkhangai chi hina; chiya, ana ili mikahai saikora chi akhala mashimān ngasakla khanao zimiksholi ina athumli ringshok ngasakserphalungra.

⁴⁰ Hi iwui Avāwui ningkachāngna kaja Anaomayarali theilaga ali shitkasangbingli katang makhavai kharing samphang ngasakra. Kala khanaowa zimiksholi ina ali ringshok ngasakra.”

⁴¹“I kazingramwui eina katā kashakazāna” da Jishuna kahāngwui vang Jihudibingna kapupta matui.

⁴² Chieina athumna hānga, “Mipa hi Josephwui naomayara maningmala? Ashi ava̱ eina avāva̱li ithum thei. Chithākha ana kathada kazingram eina katāna jikhala?”

⁴³Jishuna ngahānkai, “Nathum kapupta mamatuialu.

⁴⁴ Ili kashirāta iwui Avāna rākhangasak maningla khipākha ili marārarmara, raakha ina ali khanaowa zimiksholi ringshok ngasakra.

⁴⁵ Marānbingna hithada kapihaida lei: ‘Athum saikorali Varena tamchitheira.’ Avāva̱li nganāsangda awui eina tamkakhuia mi kachiva̱ iwuili rai.

⁴⁶ Varewui eina kharā chi maningla khipākha Avāva̱li matheiranga; Varewui eina kharā amāngna thei.

⁴⁷Kachangkhat eina ina nathumli kahāngna, shitkasanga mi chi katang makhavai kharing samphanga.

⁴⁸I kharingawui kashakazāna.

⁴⁹Nathumwui avāngarana lamhāngli manna zai, kha thihaowa.

⁵⁰Kazingramwui eina katā kashakazā chiya zālaga makathi china.

⁵¹I kazingramwui eina katā kharinga kashakazāna. Kachikathāna hi zaakha a katang mavaila ringra kala apuk-apaga ringkhavai ina miki kaji kashakazā chiya iwui asāna.”

⁵² Chieina Jihudibingna ngayāt ngarokta hānga, “Mipa hina kathada awui asā ithumli mishaipairakhala?”

⁵³Chieina Jishuna athumli hānga, “Kachangkhat eina ina nathumli kahāngna, miwui Naomayarawui asā mashaiakha kala ashee mamangakha nathumwuili kharing kaho maleimana.

⁵⁴Iwui asā kashai kala iwui ashee khamang a china katang makhavai kharing samphangra, kala ali khanaowa zimiksholi ringshok ngasakra.

⁵⁵Kaja iwui asā hi shaikhavailaka kala iwui ashee hi mangkhavailaka.

⁵⁶ Iwui asā kashaia kala ashee khamanga chi ili lei kala I ali lei.

⁵⁷Ili kharinga Avāva̱na kashirātna kala awui vang I kharingna. Chithada sāda iwui asā kashaia chi iwui vang eina ringa.

⁵⁸ Hi kazingramwui eina katā khamui china, navā ngarāna shailaga thikahai khamui kathā maningmana. Kashakazā hi kazā mi chi katang mavaila ringra.”

⁵⁹ Hi ana Capernaumwui synagogueli tamchitheida kahāng tuina.

⁶⁰Jishuwui athi kashura kachungkhana hi shāda hānga, “Tamkachithei tui hi saknāli, khipāna nganākhuipairakhala?”

⁶¹ Sākhangatha̱bingna kapumkakaseo chi theida Jishuna hānga, “Nathumla mamayāngaimala?

⁶² Nathumna miwui Naomayarana rida ana pamkasā awui apamli kāluishit kaji theisi kaja khi phaningra?

⁶³ Manglā china kharing chi khamina, asā hiya aremana; ina nathumli hāngkahai tui chi manglā kala kharingana.

⁶⁴ Kha nathum kaikhana mashitsangmana.” Kaja haokaphokwui eina athum mashitsangmana kala khipāna ali hatrakhala kaji Jishuna thei.

⁶⁵ Chieina Jishuna hānga, “Hiwui vang eina nathumli hānghaira kaja Avāva̱na khamayāpā chi maningla khipākha iwuili marārarmara.”

⁶⁶Chiwui thili athi kashura mi kachungkha mashurluithuwa.

⁶⁷Jishuna tharāda khani chili hānga, “Nathumla ngalanthuingaila?”

⁶⁸ Simon Peterna ngahānkai, “Proho, ithum khipāwuili varakhala? Namāngli makashimān kharing tui chi lei.

⁶⁹Ara ithum shitsanghaira, kala ithumna theihaira, Varewui Tharkhamathengapa chi nalaka.”

⁷⁰ Jishuna ngahānkai, “Ina nathum tharāda khanili kapangkakhui maningmala? Kha nathumwui ngachaili akhava chipeena.”

⁷¹ Hi ana Simon Iscariotwui naomayara Judas, tharāda khaniwui ngachaili ali hatki kajipawui pongli kahāngna.