Read Tangkhul Naga JOHN 8 Bible Online

JOHN 8 - Tangkhul Naga bible

JOHN 8

²Akhama kathā ngathorthakva Jishuna khorumshimli latunga. Chili yarui katongana ali rākuinampama kala pamzangda athumli tamchitheiphoka.

³Chitharan phophākasā sha̱nao akha ain kathembing eina Phariseebingna tukrāda saikorawui mangāli nganing ngasaka.

⁴Athumna Jishuli hānga, “Ojā, sha̱nao hi phophā mahunglakha tukkakhuina.

⁵Hikatha sha̱naoli lunggui eina horthatphalungra da ithumwui ainli Mosesna kasohaida lei. Nana khi phaningkhala?”

⁶Jishuwui khayon tukkhui khavai athumna kahāng kasāna. Kha Jishuna kui mashunzangda pāngmareng eina ngaleili kapi.

⁷Athumna ngahānshon kaji eina Jishuna nganingkāda hānga, “Morei masālak kaje mi china sha̱naopava̱ hili lunggui eina thamrithuiranu.”

⁸Chieina ana hamzangluishitta ngaleili kapiluishita.

⁹Athumna tui chi shālaga athum ava̱va̱ ngamenthui mamānhaowa; khararra eina thuida khangano tāshungda thuiserhaida sha̱naopava̱ chimāng Jishuwui mangāli nganingda leisai.

¹⁰Chieina Jishuna yangkāda sha̱nao chili hānga, “He sha̱nao, athum kali vāserhaokhala? Nali khayon mikhavai khipākha maleithula?”

¹¹“Khipakha maleilakmana, Amei” da ana ngahānkai. “Phai, chithākha inala nali khayon mamimana. Zatulu, laga morei masāluialu.”

¹² Jishuna athumli hāngluishita, “I okathuiwui kahorna, ili kashura china tangkhamangli mazatluilakmara kha kharingwui kahor samphangra.”

¹³ Phariseebingna hānga, “Na khalattawui vang shākhi khamina, nana kahāng chi khamashung maleimana.”

¹⁴Jishuna ngahānkai, “Ina khalattawui shākhi milala iwui shākhi hi khamashungana, kachiwui vangkhala kaja I kachi eina rākhala kala kachili vāra̱khala kaji ina thei. Kha nathum I rākhavaila, vākhavaila matheimana.

¹⁵ Nathumna okathuiwui apong eina bichar sai, iya khipālikha bichar masāmana.

¹⁶ Ina bichar sāsālala chi khamashungana, kaja imāng maningla ili kashirāta iwui Avā inina kasāna.

¹⁷ Nathumwui ainli shākhi khani ngaraichā eina miakha aniwui kahāng chi khamashungana da kapihai.

¹⁸Ina iwui vang shākhi mi kala ili kashirāta Avāva̱nala iwui vang shākhi mi.”

¹⁹ Chieina athumna, “Nashavā kachili leikhala?” da ngahāna. Jishuna ngahānkai, “Nathumna ilila iwui Avālila matheimana, ili nathumna theisi kaja iwui Avālila theihairasaki kajina.”

²⁰ Jishuna saikora hi khorumshimwui lan haikhavai kāli tamchitheida kahāngna. Kha khipānakha ali matukkhuimana, kachiwui vangkhala kaja awui atam marārangsai.

²¹ Jishuna athumli hāngluishita, “I thuihaora; nathumna ili phāra, phālala nathum nathumwui moreili thihaora. Ina vāki kaji chili nathum mavārarmara.”

²²Chieina Jihudiwui akhavābingna hānga, “Mipa hina ‘Ina vāki kaji chili nathum marārarmara’ jili. A khalatta ngaronthihaora kajila?”

²³ Jishuna ngahānkai, “Nathuma azingwui einana, iva atungwui einana; nathumva okathui hiwuina, iva okathui hiwui maningmana.

²⁴ Nathum nathumwui moreili thira da ina hānghaira, kaja ‘I chi ilaka’ kaji mashitsangakha nathum nathumwui moreili thira.

²⁵“Na khipākhala?” da athumna ngahāna. Jishuna ngahānkai, “Ina haokaphokwui eina nathumli hāngkahaina.

²⁶Nathumli hāngkhavai kala bichar sākhavai kachungkha lei; ili kashirāta chi khamashungna, kala ina awui eina shākakhui chi okathuili kahāngna.”

²⁷Jishuna Avāva̱wui pongli kahāngna kaji athumna matheimana.

²⁸ Chieina Jishuna athumli hānga, “Nathumna miwui Naomayarali khāngkakā chitharan ‘I chi ilaka’ kaji theinaora, kala iwui sāshap eina maningla, Avāva̱na tamchithei kahai chi kahāngna kaji theikhuira.

²⁹Ili kashirāta chi ili ngasodalei; imāngli ana mahorhaimana, kaja ina awui ningyāngkhaung chi sāchinga.”

³⁰ Jishuna hi kahāng kashā mi kachungana ali shitsanga.

³¹ Chieina ali shitsang kahai Jihudibingli Jishuna hānga, “Nathumna iwui tamkachithei khuisangakha kachangkhat nathum iwui sākhangatha̱bingna.

³² Nathumna khamashung chi theikhuira kala khamashung china nathumli ningkhān ngasakra.”

³³ Athumna ngahānkai, “Ithum Abrahamwui ara̱-azāna, kala khipākhawui rao masālakranga. Chieina ‘Nathumli ningkhān sāngasakra’ kajiwui kakhalat khikhala?”

³⁴ Jishuna hānga, “Kachangkhat eina ina nathumli kahāngna, morei kasā mi kachiva̱ moreiwui raona.

³⁵ Rao akhana shimkhur chiwui mi mangasāchingmana, kha naomayara chi shimkhur chiwui ngasāchinga.

³⁶Chieina Anaomayarana nathumli ningkhān ngasakakha, nathum ningkhān kachangkhathaira,

³⁷nathum Abrahamwui naotunna kaji ina thei, laga nathumna iwui tamkachithei mamayāmada ili shaothat khavai sai.

³⁸Ina iwui Avāli ngasoda theirum kahai chi nathumli kahāngna, kala nathumna navā ngarāwui eina shākakhui chi kasāna.”

³⁹Athumna ngahānkai, “Abraham chi ithumwui avāva̱na.” Jishuna hānga, “Nathum Abrahamwui nao kachangkhatsi kaja ana kasā thada nathumla sāra.

⁴⁰Kha Varewui eina shākhuilaga nathumli khamashung tui chi khamatui ili nathumna shaothat khavai ngarānda lei. Abrahamna hithada masālakmana.

⁴¹ “Nathumna navā ngarāwui thada sāda lei.” Athumna ngahānkai, “Ithum shāmnao maningmana. Ithumwui Avāva̱ Vare akha lei.”

⁴² Jishuna athumli hānga, “Vare hi nathumwui Avāva̱na jisi kaja ili leishiki kajina, kaja I Varewui eina kharāna, kala I hili leili. I khalatta marāmana. Varena chihokharāna.

⁴³Kathada ina kahāng nathum bhap matāthukhala? Chiya nathum iwui tui khanganā makhāngkhararwui vangna.

⁴⁴ Nathum nathumwui avāva̱ chipee chiwuina, chieina nawui sākhangaiva nathumwui avāwui ningkachāng kasā china. Haokaphokwui eina a mi khayumana, kala khamashung ot masālakmana, kaja awuili khamashung maleimana. Kakapik hi awui khangachāna, kaja a kakapikana kala kakapik saikorawui avāva̱na.

⁴⁵Kha ina khamashung tui khamatuiwui vang nathumna ili mashitsangmana.

⁴⁶I morei sāhaira kaji nathum khipāna hāngshaprakhala? Ina khamashung tui hāngakha, nathum khisāda mashitsangmakhala?

⁴⁷Varewui mi china Varewui tui nganai; nathum Varewui mi maningthuda awui tui makhanganāna.”

⁴⁸ Athumna Jishuli ngahāna, “Na Samarianaona kala nali chipee zangdalei da ithumna kahāng hi mamashungmala?”

⁴⁹Jishuna ngahānkai, “Ili chipee mazangmana, iya iwui Avāli khayāshi, kha nathumna ili khayāmashimana.

⁵⁰Chitha-ilala I khalattawui khayākakā maphāmana; chi kaphā Akha lei, kala ana bicharwo sāra.

⁵¹Kachangkhat eina ina nathumli kahāngna, iwui tui khanganāpa chi mathilakmara.”

⁵²Jihudibingna ali hānga, “Ara ithumna theikachangkhathaira kaja nali chipee ngasoda lei. Abraham thihaira, marānbingla thihaira, kha kachikathāna nawui tui nganaakha mathilakmara da nana hāngda lei.

⁵³ Thikahaia ithumwui avāva̱ Abrahamli kala thikahaia marānbingli na hakmeilā? Na khipāna kajikhala?”

⁵⁴Jishuna ngahānkai, “Ina khalattali tekmatei ngasakta leiakha, iwui tekhamatei chi khikha maningmana; ili tekmatei khangasak chi nathumna nathumwui Varelaka da kahānga a chilaka.

⁵⁵Nathum ali matheilakranga, iya theihaira. Ina theihailaga matheimana jisi kaja ila nathum thada kakapikana. Kha iya ali thei kala awui kahāng nganai.

⁵⁶ Nathumwui avāva̱ Abrahamna iwui kharā zimiksho theira da ringphai; kala ana chi theida ringphakhaihaowa.”

⁵⁷ Jihudibingna hānga, “Na zingkum hangphangā makāranga, laga na Abrahamli thei kajila?”

⁵⁸Jishuna hānga, “Kachangkhat eina ina nathumli kahāngna, Abraham mapharāranglakha I leisai.”

⁵⁹ Chieina athumna lunggui ngamuikhuilaga Jishuli horkida sai; kha Jishuna khorumshimwui eina ngathum sāda shokhaowa.