Read Tangkhul Naga JOHN 9 Bible Online

JOHN 9 - Tangkhul Naga bible

JOHN 9

¹Jishuna rākhamakān tharan kapharāwui eina mik khangapeo akha thei.

² Sākhangatha̱bingna ngahāna, “Ojā, mik ngapeoda kapharā chi khipāwui moreikhala, awuika ava̱ avāwui moreikhala?”

³ Jishuna ngahānkai, “Awui mik khangapeo chi awui moreiwui vang maningmana, ava̱ avāwui moreiwui vangla maningmana. Kha Varewui pangshap awui eina theingasak khavaina.

⁴ Ngashun horda leilakha ili kashirātawui ot chi ithum sāphalungra. Ngayā kharā tharan khipānakha masārarmara.

⁵ I okathuili leilakha eina tangda ina okathuiwui kahorna.”

⁶ Chi hānghailaga, Jishuna ngaleili machora̱ mashosangda ngalei chi manātkhuilaga mipā chiwui mikli neomi,

⁷ kala hānga, “Siloam (hiwui kakhalata chihokhava kajina) ra̱khongli apheohaolu.” Chieina ana apheotāhailaga amik theida ungrārāsai.

⁸Awui theisābing kala ali rida theikasabingna ngahāna, “Mipa hi kayāngli pokapampa chi maningmala?”

⁹Kaikhana “Chipana” da hānga, kha kaikhana “Maningmana, azak khangaruina” da hānga, Chieina ana hānga, “I chipā chilaka.”

¹⁰“Kathada namik kathei samphanghaokhala?” da athumna ngahāna.

¹¹Ana ngahānkai, “Jishu kaho china imikli leipā kateokha neomilaga Siloam ra̱khongli apheotāhaolu, da hānga. Chieina ina vālaga apheotākhaleoda theihaowa.”

¹²“A kali leikhala?” da athumna ngahāna. Kha ana matheimana jihaowa.

¹³Chieina mik ngapeokasāpa chili Phariseebingwuili khuivai.

¹⁴Jishuna leipā neomilaga mik theikhangasak chi Sabbath zimikshona.

¹⁵Chieina mipa chili kathada kathei samphanghaokhala kaji Phariseebingna ngahānluishita. Ana ngahānkai, “Ana imikli leipā kateokha neomilaga ina pheotākhaleoda kathei samphanga.”

¹⁶ Pharisee kaikhana hānga, “Hi kasā mipa hi Varewui eina kharā maningmana, kaja ana Sabbath mamayonmana.” Khangatei kaikhana hānga, “Morei kaphunga mina kathada hiyākha hakkhamahā ot sāshaprakhala?” Hithada athumwui ngachaili ning kaikhangarok shokhaowa.

¹⁷Chiwui thili Phariseebingna mipā chili ngahānluishita, “Nali ana mik theingasaka jihaira. Phai thākha a hi khipākhala?” Chieina ana, “A marān akhana” da ngahānkai.

¹⁸Chithālala Jihudibingna mipa chiwui ava̱-avāli mangahānranglakha mik ngapeosālaga ara theihaira kaji mashitsangngaithuwa,

¹⁹kala anili hokhuida hānga, “Hi naniwui naola? Ali mik ngapeoda pharāla? Kathada ana kathei samphanghaokhala?”

²⁰Ava̱ eina avāva̱ china ngahānkai, “A iniwui naolaka, kala mik ngapeoda pharālāka.

²¹kha ana kathada theihaokhala kaji ini matheimana, kala khipāna rakngasakhala kajila matheimana. Ali ngahānlu, a khararnaona, ana ngahānkāmishapra.”

²² Ava̱ eina avāva̱na Jihudibingli khangacheewui vang chithada hāngkahaina, kaja Jishuli Khristana da hāngkaphata chili synagoguewui eina aming katathaora da Jihudibingna mayā khangarok sahairasai.

²³Chiwui vang anina “A khararnaona, ali ngahānlu!” da hāngkahaina.

²⁴Athumna mik ngapeoda kapharā mi chili kakhane holuishitta hānga, “Vareli masot milu. Mipa chi morei kaphunga mina da ithumna thei.”

²⁵Ana hānga, “Mipa chi morei phunga, maphungmana kaji I matheimana; ina kathei akhava, I mik ngapeosai, ara theihaira.”

²⁶Athumna ngahāna, “Ana nali khi samikhala? Namik kathada rakngasakkhala?”

²⁷Ana ngahānkai, “Ina nathumli hānghaira, kha nathumna manganāsangmana. Chi khisāda nganāngaishonhaokhala? Nathumla awui sākhangatha̱ sangaila?”

²⁸ Athumna ali zeida hānga, “Na awui sākhangatha̱na; ithuma Moseswui sākhangatha̱bingna.

²⁹Mosesli Varena ngazeka kaji ithumna thei, kha mipā hi kaji eina rākhala kaji ithum matheimana.”

³⁰Ana hānga, “Hi matakhak kahai otna! A kachiwui eina rākhala kaji nathum matheimana, kha ana imik rakngasakhaira.

³¹Varena morei kaphungbingli mashāmimana, kaji ithumna thei, kha ali khokharuma kala awui ningkachāng kasā athumli Varena shāmi.

³²Okathui haokaphok eina thuida mik ngapeoda kapharā mili mi akhana theingasaka kaji mashālakranga.

³³Mipā hi Varewui eina kharā maningsi kaje ana khiotkha masārarmara”

³⁴Athumna ngashimshida hānga, “Nava moreilungli pharāsang kahai mina, laga ithumli tamchitheiki kajila?” Chieina athumna ali synagoguewui eina aming katathaowa.

³⁵Mipa chili synagoguewui eina aming katathaira kaji Jishuna shai; kala thangkha samkaphang eina ali hānga, “Na miwui Naomayarali shitsangla?”

³⁶Ana ngahānkai, “Amei, a khipākhala? Ili kahāngmilu, chieina ina ali shitsangpaira.”

³⁷Jishuna hānga, “Na ali theihaira, kala arui nali ngazekta khaleipa hi alaka.”

³⁸ Mipa china “Proho, I shitsanga” da hānga kala ali khoruma.

³⁹Jishuna hānga, “Ina okathuili bichar sākhavai kharāna. Chieina mik khangapeobingna kathei samphangra kala katheibingna ngapeohaora.”

⁴⁰Chili leikasā Pharisee kaikhana chi shāda ngahāna, “Ithumla mik ngapeowa kajila?”

⁴¹ Jishuna ngahānkai, “Nathum mik ngapeosi kaja khayon maleimara, kha nathumna ‘Ithuma thei’ jihaokada yonda lei.”