Read Tangkhul Naga OTSAK 1 Bible Online

OTSAK 1 - Tangkhul Naga bible

OTSAK 1

¹ He Theophilus, kharewui lairikli Jishuna kasāsā tamkachithei saikora chi

²ali kazingramli makhuikāranglakha awui paokazata sāda kapangkhui kahai mibingli Manglā Katharawui pangshap eina hāngmathinkhami chi ina kapihaira.

³Ana thikahaiwui thili zimiksho hangmati thangwui alungli athumli rāsamphangda apong kachungkha eina a ringda lei kaji tharzā eina azak eina chithei. Athumna ali mik eina thei kala ana athumli ngazekta Vare wungramwui pongli tamchithei.

⁴ Ana athumli ngasopamda leilakha, Jerusalemwui eina mathuihaila Avāva̱na ngashitmi kahai chi honpamsā khavai hithada hānga, “Nathumna iwui eina shāhaira,

⁵kaja Johnna tara̱ eina ra̱hikmi kha ara masāngla nathumli Manglā Kathara eina ra̱hikmira.”

⁶Athum rākakazip tharan, athumna ali ngahāna, “Proho, atam hitharan nana Israelli wungram chi samphang ngasakmiluishitrala?”

⁷Jishuna hānga, “Atam angarit chi Avāna a khalattawui sāshap eina retkahaina, chi nathumna theikapai maningmana.

⁸ Kha Manglā Kathara chi nathumwuitungli tāshungkhami tharan, nathumna pangshap samphanglākra. Cheina nathumna Jerusalemlila, Judea ngalei katongalila, Samarialila kala okathuiwui akatanga vāshungda iwui vang shākhi sāra.”

⁹ Hi hānghailaga athumwui miktāli ali khuikāhaowa, kala muiyāna tākhaluikhuida chiwui alungli shimānhaowa.

¹⁰Ana kakā chi athumna yangda leilakha, yanglu, kachon kachara khangavai mayarnao khanina athumwui ngalemli nganingda hānga;

¹¹“Galileenaobing, nathum kachiwui vang eina kazingramli ngashānkhayangkhala? Nathumwui eina kazingramli khuikā kahai Jishu hi, arui kazingli khuikakā kathei hi tākam eina ana latrāluira.”

¹²Chiwui thili athumna Jerusalemwui ngalemli khalei, kilometer akha sha̱kha katā, Olive phungreiwui eina Jerusalemli latunga.

¹³ Athumna keinung chili kazang eina Peter, John, James, Andrew, Philip, Thomas, Bartholomew, Matthew, Alphaeuswui naomayara James kala Zealot kaho Simon kala Jameswui naomayara Judaslong pamkasa mathāng atowui kā chili kai.

¹⁴Athumna Jishuwui ava̱ Mary eina achināngarā kala sha̱nao kateila zangda atam kasang kharei ungkaziplaga seihā sāchinga.

¹⁵Chitharan Peterna avānaobingwui (athum mi shakha maga̱ sha̱kha ngasokapam chiwui) ngachaili nganingda hānga,

¹⁶ “Ivānaobing, Jishuli tukkakhuibingli kathāna Judaswui apongli Manglā Katharawui pangshap eina achālakha Davidna hāngkahai kathara tui chi ungshungphalungra.

¹⁷Ali ithumwui ngachaili shānsanghaisai, kala otram khangatha̱ hili awui yarla mihaisai.”

¹⁸(Mayara hina awui makhayāwui sāman eina lui akha lokhui; kala chili kashuirak eina kongluida akhari akharā ngapophātserhaowa.

¹⁹Kala chi Jerusalemli khalei mi saikorana theisera, chieina lui chi athumwui tui eina Akeldama, “Asheewui Lui” da phokmi.)

²⁰ “Kaja Laa lairikli hithada kapihaida leili, ‘Awui shim machohaoranu, khipānakha chili maokthuiranu.’ kala ‘Mi khangatei akhana awui otpam chi khuiranu.’

²¹“Chiwui vang eina Proho Jishuna ithumwui ngachaili leilakha atam kachida ithumli ngasokasā,

²²Johnna ra̱hikkhamiwui ot sākaphok eina thuilaga Proholi khuikakā eina tangda chiwui alungli kazangabingwui ngachaili akhana ithumli ngasoda ringkhaluiwui pongli shākhi sāphalungra.”

²³Chieina athumna Joseph, Barsabbasla kaho (Justusdala kaho) eina Matthiasli kapangshoka.

²⁴Chiwui thili athumna seihā sai, “Proho, mi kachiva̱wui kaphaning nana thei, chieina khalattana vākhangayiya apamli vākhavai

²⁵Judaswui mahut sāda paokazata sākhavai khani hiwui ngachaili nana kapangkakhui chi chitheimilu.”

²⁶Athumna aniwuitungli ka̱lā yanga; yanglaga Matthiaswuitungli tāhaoda rida leikasā pāokazata tharāda akha chiwui alungli ngarumsanghaowa.