Read Tangkhul Naga OTSAK 11 Bible Online

OTSAK 11 - Tangkhul Naga bible

OTSAK 11

¹Judea ngalei saikorali khalei paokazatbing kala shitkasangabingna Gentilebingnala Varewui tui khuisanghaira kaji shai.

²Peterna Jerusalemli khavā tharan, ahui rimkashoka shitkasangabingna ali yetta hānga,

³“Khisāda ahui marimkashokbingwui shimli vāzangda phākazāla phazārumkhala?”

⁴ Kha Peterna shokkahai chi haokaphokwui eina thuida meisā eina hāngchithei.

⁵“Ina Joppa keinungli seihā sāda leilakha ili hithada rāmahāmi: Kachon kahaka akhawui chonmarei matili singlaga kazingramwui eina chihokatā ina thei kala chi iwui ngalemli tāshunga.

⁶Ina munlak eina khayang tharan aphei mati kakā sāyurla, phara̱-pharāla, yongkazata vānaoyurla thei.

⁷Chiwui thili ili akhon akhana, ‘Peter, thuishaothatshailu’ da kahāng ina shai.

⁸Kha ina ‘Ngga, Proho, makathar khamakhao ot ina ikhamorli masanglakranga’ da hānga.

⁹Kha akhon china hāngluishita, ‘Varena tharngasak kahai hili nana khamakhaona majipaimara.’

¹⁰Hithada kathum shida shokhailaga saikora chi kazingram khuikāluihaowa.

¹¹Atam chichangli Caesareawui eina chihokharā mi kathum chi ina kapama shim chili rāshunga.

¹²Athumli ningkhamaong maleila ngasovā khavai ili Manglāna hānga. Joppawui eina shitkasanga ivānao tharukla Caesareali ili ngasovai kala ithum saikora Corneliuswui shimli azanga.

¹³Kha ana kathada awui shimli kazingrao rānganinglaga, ‘Joppali mi chihovāda Peter kaho Simonli ahokhuilu,

¹⁴ana nashili chānpao khuirāmida chiwui mangā eina nala kala nashi shimkhurla kahui samphangra’ da rāhāngkhala kaji ithumli hāngchithei.

¹⁵Ina matuikaphok eina, haokaphokli ithumwuitungli katā thada athumwuitunglila Manglā Kathara tāzanga.

¹⁶ Chieina ‘Johnna tara̱ eina ra̱hikmi, kha nathumli Manglā Kathara eina ra̱hikmira’ da Prohona hāngkahai chi ina phaningunga.

¹⁷Proho Jishu Khristali shitkasangwui vang eina Varena ithumli khami lemmet chi tākam eina athumlila miakha, I khipāda Vareli ngakaishipairakhala!”

¹⁸Athumna hi kashā eina athumwui khayetla thāhaowa kala athumna Vareli masotchitkatta hānga, “Chithākha Gentilela ningngateikhuida kharing samphang khavai Varena mayāmihaira.”

¹⁹ Stephenli shaokathat tuishotwui eina rekakharekwui vang ngapha̱yāng eina zatkahai shitkasanga mi kaikhana Phoenicia, Cyprus, kala Antioch vāshungda Jihudimāngli pao hāshoka.

²⁰Kha Cyprus eina Cyrenewui mi kaikhana Antiochli vākashung eina Greeknaobinglila Proho Jishuwui paokaphā chi hāshoka.

²¹Prohowui pangshapna athumli ngasomi, chieina mi kachungkhana shitsangda Proholi ngareiunga.

²²Hiwui pao hi Jerusalemli khalei churchna kashā eina Barnabasli Antiochli chihovai.

²³Ana vākashung eina mibing chili kathada somikhala kaji theilaga a ringphālakhaowa kala Proholi ningtongda shitsangching khavai athumli kasatsanga.

²⁴Barnabas hi Manglā Kathara kala shitkasangna pemting kahai kaphā mina kala Proholi shitkasang mi kachungkhala mataisang ngasaka.

²⁵Chiwui thili Barnabasna Saulli Tarsusli phāvai,

²⁶kala ali samphang kahai eina Antiochli thānunga. Anina chiwui churchli zingkum akha pongzongri ngasopamda mi kachungkhali tamchithei. Shitkasangabingli Christian hokhare hi Antiochlina.

²⁷Atam chitharan marānbingna Jerusalemwui eina Antiochli vai.

²⁸Athumwui ngachaili Agabus kaho china nganingkada, okathui hili chāmrei akha rāra da Manglāwui pangshap eina phongmi. Hi Claudiusna awunga sāda leilakha shoka.

²⁹Chieina sākhangatha̱bingna Judeali khalei shitkasang khangarumbing chili khangachon chihovā khavai mi kachiva̱na kachichāwui mikashap athishurda mingaroksa da ngazeka;

³⁰kala athumna chi sāda Barnabas eina Saulwui pāngli mida anina ararbingli chiphunvai.