Read Tangkhul Naga OTSAK 12 Bible Online

OTSAK 12 - Tangkhul Naga bible

OTSAK 12

¹Atam hitharan Herod awungana church mipha̱ kaikhawuitungli pāng parda sāshilak eina rekharekphoka.

²Ana Johnwui agato Jamesli raighai eina sāthathaowa;

³hina Jihudibingli ningyāng ungngasakta lei kaji kathei eina Peterlila tukkhui. Hi Khawok-makazang Khamui phanitwui atamli kashokna.

⁴Ali tukkhuida phātopli sanghailaga shipai matitina kānglup kasema kānglup matili shantri sākhavai athumwui pāngli horsangmi. Herodna ali Makānkhami phanitwui thili yaruili khuishoklaga bichar sākhavai ngarānhai.

⁵Chiwui vang Peterli phātopli sanghai, kha churchna awui vang Vareli seihā thuklak eina sāmishonshona.

⁶Herodna yaruiwui mangāli khuishoklaga bichar sāra jithang ngayā, Peterli marikhānghui khani eina khalaplaga shantri khaniwui ngachaili chipethai, kala shantribingna phātop khamongli mayonpama.

⁷Kashuirak eina Prohowui kazingrao akha chili tānganingda phātop shim chi horchamrihaowa. Kazingrao china Peterli yartui khanuklaga “Thakta ngakarthuilu” da mathota. Ngalāngda marikhanghui chi Peterwui eina ngalatāhaowa.

⁸Chiwui thili kazingrao china hānga, “Shaksākhuida pheihopla sangkhuilu.” Chieina Peterna chithada sai kala kazingrao china hānglui, “Nawui kachon ngavaikhuida ithi shurlu.”

⁹Peterna ali shurshoka, kha kazingraona sāda khalei chi kachangshonglaka kaji matheisāmana kha mahākhamina da phaningsai.

¹⁰Anina shantri khare kala kakhane chi kānshokta naomeikapta keinungli shok khavai mariwui ngavei chili shokshunga. Ngavei china aningsasak shomida shokhaowa. Kala anina shongfa akhali zatta leilakha kashuirak eina kazingrao chi thuihaowa.

¹¹Chiwui thili Peterna ning mathingkhaung eina phaningkhuida hānga, “Ara ina theishinghaira, Prohona awui kazingrao shirātāda ili Herodwui pāng eina kala Jihudibingna honkasā saikora chiwui eina kanmihaira.”

¹²Hi phaningkhuilaga, ana John, Markla kahopawui ava̱ Maryshiwui shimli vai, chili mi kachungkha kaziplaga seihā sāsai.

¹³Peterna ngavei khamong chi kashao eina shokshomikida Rhoda kahova̱ rao sha̱nao akha shoka.

¹⁴Peterwui khak kashā eina ringphanāhaida khamong mashomila shimlungli ngasamzangda, “Peter khamongli nganingda lei” da zanghānga.

¹⁵Chieina athumna, “Na pāhaira” ji. Kha ana “Kachangkhatna” da hānga. Chithākha “Chi awui kazingraona” da athumna hānga.

¹⁶Kha Peter khāmong shaopama kala athumna khamong shoda ali kathei tharan athum matakhakserhaowa.

¹⁷Peterna athumli akhon mashok khavai apāng eina ingkit sai kala kathada Prohona ali phātopwui eina khuishokmikhala kaji hāngchithei. “Hi James eina ivānaobingli hānglu” da hānglaga apam khangteili thuihaowa.

¹⁸Kazing kathang tharan Peterli khi shokhaokhala da shantribing apam chili maphākhuilakla ngaunlophaowa.

¹⁹Herodna Peterli phākhavai kasoi, kha athum maphākhuirarthuwa. Chieina ana shantribingli ngahānung ngahānvā sai kala athumli shaothat khavai hukum mihaowa. Chiwui thili Herodna Judeawui eina thuihailaga Caesareali atam kasha̱nakha tāpama.

²⁰Chitharan Herodna Tyre eina Sidonwui mibingli malungvātlak eina leisai. Chieina athumna khokkha sākhuilaga ali asamphang khavai khangarān sai. Rimeikapta athumna awungawui kashina Blastusli suikhuilaga mashitta okthui khavai Herodli apoi, kaja aram ngalei chi awungawui eina kashakazā samkaphangna.

²¹Langchin sāhaithang Herodna awungawui sāri ngavaikhuilaga wungpamkhongli pama, kala mibingli tamchithei.

²²Chieina mibing china, “He mitui maningmana, kameotuina” da vaowa.

²³Ngalangda Prohowui kazingraona yapkārsanghaowa, khikhalajila Herodna Vareli mamasotchikatmana; kala ali kachaina shaida thihaowa.

²⁴Kha Varewui tuiva mataisangda chungmei ngayaovai.

²⁵Barnabas eina Saulna aniwui sāphalungki kaji ot chi sakuphailaga, awui ming Markla kaho Johnli thānkhuiphungda Jerusalemwui eina latunghaowa.