Read Tangkhul Naga OTSAK 14 Bible Online

OTSAK 14 - Tangkhul Naga bible

OTSAK 14

¹Ara athumna Iconiumli Jihudiwui synagogueli vālaga tamkachithei eina Jihudinao kala Greeknao kachungkhana shitsanghaowa.

²Kha mashitkasanga Jihudinaobingna Gentilebingli hāngkasotta shitsang kahaibing chili mamayā khavai sai.

³Chieina anina chili atam kasāngkha pamsangda Prohowui vang pinglak eina tamchithei kala lukhamashanwui chānpao chi mashunga da shākhi mida aniwui pāng eina machut kala matakhak kahai otla sai.

⁴Keinung chiwui mibing khum khani sāhaowa, kaikhana Jihudibingwui kala khangatei kaikhana paokazatbingwui mijang zanga.

⁵Gentile eina Jihudi kaikhana athumwui kathānabingli ngasoda paokazatbingli zakshilāk eina sālaga lunggui eina horthat khavai khangarān sāhaowa.

⁶Paokazatbingna chi kathei eina Lycaoniawui keinung Lystra eina Derbe kala chiwui ruinganaili yāmvāhaowa.

⁷Chili athumna Paokaphā hāshoka.

⁸Lystra keinungli, kapharāwui eina phei tekhaida mazatkharar mi akha leisai.

⁹Ana Paulwui tamkachithei chi ningsanglak eina nganai, kala awuila raimi ngasakra kajiwui shitkasang lei kaji kathei eina

¹⁰Paulna ali hānga, “Ngatartei eina nganinglu.” Ana ngalongkāda zata.

¹¹Paulna sākahai chi theida Lycaoniawui tui eina athum saikorana vaoda hānga, “Kameonao mizak khuida ithumli tāshunghaira!”

¹²Athumna Barnabasli Zeus phokmi kala Paulli ana chungmeida matuihaoda Hermes phokmi.

¹³Keinung mangāchangli khalei Zeus kameoshimwui sharva̱a china yaruili ngasoda anili pha̱kaphayā ot chigatngaihaoda mukvā eina awon khuiphunglaga ngaveili khuirai.

¹⁴Kha paokazata Barnabas eina Paulna chi kashā eina aniwui kachon serkhaklaga yaruiwui lungli yongshokta vaowa,

¹⁵ “Itaongarā, nathumna kachiwui vang eina hithada kasākhala? Inila nathum eina ngaraikachā mikumona. Makānkhanā otbing hiwui eina mai ngareithuihailaga kazingla, ngaleila, shamadrula kala chiwui alungli khalei ot saikora kasā kharinga Vareli ngareiung khavai paokaphā hāshok khavai ithum hili khaleina.

¹⁶Thuikahai atamli yur saikorali kachichāwui zatkhangaingaili zatngasaksai.

¹⁷Kha atam kachiva̱li kaphā sākhami china ā leichingda lei kaji shākhi mi; ana kazingramwui eina zingrotra̱ mida atam chālak eina athei samphang ngasaka; kashakazāla mida ningla ringkaphāna pemtinghai ngasaka.”

¹⁸Hithada hānglaga yaruina pha̱kaphayā ot sāki kajiwui eina saklak eina khāmkhui.

¹⁹ Chiwui thili Jihudinao kaikha Antioch kala Iconiumwui eina rālaga yarui chili suikhuida, Paulli lunggui eina thamngasaka kala thihairada phaninglaga keinungwui ayarli athumna shimenshokhaowa.

²⁰Kha shitkasangabingna ali kuimareida rākakazip tharan ngakarthuida keinungli zangluishithaowa. Akhama kathā Barnabas ani Derbeli vāhaowa.

²¹Keinung chili anina paokaphā hashokta sākhangatha̱ kachungkha yuikhui. Chiwui thili Lystra, Iconium kala Antiochli latungluishita.

²²Anina shitkasangabingli pangsang ngasaka kala khamashunga shitkasang chili mangacheilakla leiching khavai kasatsanga, kala “Vare wungramli zangkida ithumna kachotkachāng kachungkha phungphalungra” da tamchithei.

²³Church kachiva̱li anina ararbing kapangsangmi kala kakhum eina seihā sālaga kapang kahai athum chi athumna shitkasanga Prohowui pāngli horsangmi.

²⁴Pisidiawui ngaleili yaokup kahaiwui thili anina Pamphyliali rai.

²⁵Chili, anina Pergali pao hāshoka kala chiwui thili Attaliali vai,

²⁶kala chiwui eina marikhong tongkhuilaga Antiochli latunga. Hi anina sākupchamkahai otsinwui vang Varewui lukhamashan pāngli horsangkhami apamna.

²⁷Anina Antioch ungkashung eina Churchwui mibingli kaziprumda Varena anili shichinlaga kathada sāmamei kala kathada Gentilebingna shitsang khavai khāmong shomikhala kaji athumli hāngchithei.

²⁸Apam chili anina sākhangatha̱bingli atam kasāngkha ngasopama.