Read Tangkhul Naga OTSAK 17 Bible Online

OTSAK 17 - Tangkhul Naga bible

OTSAK 17

¹Chiwui thili anina Amphipolis eina Apollonia kanvāda Jihudiwui Synagogue khalei Thessalonica apamli rai.

²Paulwui khangachā athishurda ana synagogueli vai kala sabbath kathum athumli kathara lairikwui eina khuishoklaga ngaphat-ngayāt sai,

³kala Khrista kachotkachāng phunglaga kathiwui eina ringshokphalungra kaji hi shākhi khami eina ngasoda tui chi meikhaichitheida Paulna hānga, “Ina hāngchitheida khalei Jishu hi Khristalaka.”

⁴Athum kaikhana kahāng chili mayāchaoda Paul eina Silasli zanga kala sha̱nao kathānva̱ kachungkha eina Vareli shitkasanga Greeknao kachungkhala anili zanga.

⁵Kha Jihudinaobingna mikpaishihaoda makaphā-makhayā mi kaikhali khomkhuilaga mi kachungkha kazipkhuida keinung chi khonzār khavai sai kala athumna anili yarui mangāli khuishok khavai Jasonwui shim akaiya.

⁶Kha athumna anili masamphangthuda Jason eina shitkasanga kaikhali keinung chiwui akhavābingli shimenvāda vaowa, “Okathui saikorali mashongachei khangasaka mibing chi ara hili rāhaira,

⁷kala Jasonna athumli awui shimli zunngasaka, kala athumna Caesarwui hukhum sākhailaga Jishu kaho awunga khangatei lei da hānga.”

⁸Tui hi shālaga keinung hiwui mibing kala akhavābing ningli chingri mahairarthuwa.

⁹Akhavābing china Jason eina khangateibingli tuingashit sāda athumwui vang nganingmi ngasaklaga athumli shokngasakhaowa.

¹⁰Ngayākhaleoda shitkasangabingna Paul eina Silasli Bereali chihovāhaowa. Anina azangkhaleoda synagogueli vai.

¹¹Thessalonicawui mibingliva chiwui mibingna ning hakmeikhāra. Athumna chānpao chi ningsanglak eina nganai kala thangkachida Paulna kahāng chi kachangkhat mashungka mamashungmakhala kaji theikhavai kathara lairik chi pāchinga.

¹²Jihudi kachungkhala shitsanga kala Greekwui kāshunglak kahaiya sha̱nao kala mayarnao kachungkhala shitsanghaowa.

¹³Kha Thessalonicawui Jihudinaobingna Paulna Berealila Varewui tui hāshokhaira kaji kashā tharan athumna chili rālaga mibingli rāthara̱sanga kala rāthotsanga.

¹⁴Shitkasangbing china Paulli ngalāngda shamadruvāk chihovāhaowa, kha Silas eina Timothyva Bereali pamhaowa.

¹⁵Paulli thānkhavābing chi Athens eina tangda ali ngasovai kala Silas eina Timothyli awuili kashap eina tangda thaklāk eina rākhavai hāngkhami chi khuiphungda athum Bareali hanunghaowa.

¹⁶Paulna anili Athensli ngaraikapam tharan, keinung chili meoma̱ pemting kahai chi kathei eina a khananglakhaowa.

¹⁷Chieina ana Jihudinaobing eina Vareli shitkasangabingli synagogueli kala leihngapha̱li samkaphangphang mibingli ngayāt ngaroka.

¹⁸Kachikathā Epicurean eina Stoicwui ojabingla ali ngaphat ngayātta kaikhana ngahāna, “Mangkhama̱pa hina khi hāngkhangaikhala?” Khangatei kaikhana ngahānkai, “Ana khangatei ramwui kameowui pongli khamatui thāli.” Paulna Jishu kala ringkhaluiwui pongli hāshoka.

¹⁹Chieina athumna Paulli keinungwui hanga̱, Are-opagusla kaho chili khuivāda hānga, “Nana tuidhar tamchitheida khalei hi ithumla theingai.

²⁰Nawui eina ithumna kashā hi ngateihanghaili, chieina ithumna chiwui kakhalat theingai.”

²¹Kaja Athennaobingla chili kapāna khamibingla khiotkha masāla tuidhar kahāng kala khanganā hili akachang sai.

²²Paulna keinung chiwui hanga̱wui mangāli nganingda hānga, “Athennaobing, nathum apong kachiva̱li shitkasang khangazip mibingna da ina thei.

²³Kaja ina nathumwui keinungli yāoung yaovālaga nathumna khorum khavaipamli khayang eina hanphutpam akhali ‘Makatheiya Vareli’ da kapi kahai samphanga. Chieina nathumna khorumda khalei makatheia chi ina nathumli arui hāngchitheida khalei hina.

²⁴ Apuk-apaka kala chiwui alungli khalei ot saikora kasā Vare chi kazingram eina okathuiwui Proho sāhaoda ana mina sākakā khorum khavai shimli mapammana,

²⁵lah awuili khavāt leikahai tākam eina mikumowui pāngna ali otram mangatha̱mana, kaja mi kachiva̱li kharing khaksui kala ot saikora khamena.

²⁶Ana mi akhawui eina miyur kachiva̱ hi sākhuida okathui apam saikorali pamkhavai kachichāwui thari kala atamwui angarit ngavāmi.

²⁷Varena hi sai, chithākha a ithumwui eina tāda maleisālala mikumona ali phāra kala samphang khavai ngarānda ali phākhuira. A ithum khipākhawui eina tāda maleimana.

²⁸[1]Kaja ‘Ithum awuili ringda lei, ngatha̱da lei kala ithumwui rin lei.’ Nathumwui laa kakape kaikhana hāngkahai thada, ‘Ithumla awui naotunna.’

²⁹Ithum awui naotun sāhaoda, ithumna awui khangachā chi mikumowui kathem pangshap eina sākakhui sināwui, lupāsāwui, ngalungwui meoma̱ kathāna da makhuipaimana.

³⁰Achālakha matheithangkhameiwui vang Varena yangkateomisai, kha apam kachiva̱li khalei mikumo saikorali ningngatei khavai ana kasoi.

³¹ Kaja ana kapangsang kahai mayarnao china okathui saikorali mashun bichar sāmi khavai zimiksho akha kak-kahaina. Ana mayara chili kathiwui eina ringngasakta mi kachiva̱li hiwui pongli shākhi mihaira!”

³²Kathiwui eina ringkashokwui pongli khamatui chi athumna shālaga ali mana̱shiya, kha kaikhana hānga, “Hiwui pongli nana khamatui ithum nganāluishitngaiya.”

³³Paulna chiwui eina thuihaowa.

³⁴Mi kaikhana Paulwui athi kashura ngasāthuihaowa kala shitsanghaowa. Athumwui ngachaili Are-opaguswui hangva̱nao Dionysius zanga. Chili Damaris kahova̱ sha̱nao akha kala mi katei kachungkhala zanga.