Read Tangkhul Naga OTSAK 19 Bible Online

OTSAK 19 - Tangkhul Naga bible

OTSAK 19

¹Apollosna Corinthli leilakha, Paulna ngalei chiwui alungli khalei ramwungbingli yaozatlaga Ephesusli rāshunga. Apam chili sākhangatha̱ kaikha samphanga

²kala athumli ngahāna, “Nathum shitkasang tharan Manglā Kathara samphanglā?” “Masamphangmana, Manglā Kathara lei kaji eina tangda ithum mashālakranga.” da athumna hānga.

³“Chithākha nathum kachikathā ra̱kahik samphangkhala?” da Paulna ngahāna. “Johnwui ra̱kahik china” da athumna ngahānkai.

⁴Paulna hānga, “Johnva mibingli awui thili rāki kaje Jishuli shitsang khavai hānglaga ning khangateiwui ra̱hikkhamimaya.”

⁵Athumna pao hi shākahaiwui thili athumli Proho Jishuwui mingli ra̱hikmi.

⁶Kala Paulna athumwuitungli pāng parrormi, kala Manglā Kathara athumwuitungli tārormida athumna tuiyur khangatatei matui kala marāna.

⁷Athum katonga chi mi tharāda khani sha̱khana.

⁸Paulna synagogueli zangda Vare wungramwui pongli kachāng kathum pinglak eina matuida khangayātla ngayāta, kaphayatla phayeta.

⁹Kha mi kaikhana ning makanghaoda mashitsangrarmana kala yaruiwui mangāli Prohowui pongli makaphā tui matui. Chieina Paulna athumli horhailaga shitkasangbingli thānkhuida Tyrannus kazipshimli thangkachida ngayāt ngaroka.

¹⁰Hithada kum khani sāvāda Asiali khaleibing saikora, Jihudila, Greekla, Prohowui tui chi kashā samphangsera.

¹¹Varena Paulli shichinlaga matakhak kahai masākharar ot kachungkha sāngasaka.

¹²Ana shikachina romalla kala shānnei kachonla awui eina kakazānaobingli khuivāda kazāt raimi, kala chipeela athumwui eina shokhaowa.

¹³Chieina yaoung yaovāda kazata Jihudi khanong kaikhana chipee kazangbingli Proho Jishuwui ming singda kasham khavaila sāda athumna hānga, “Paulna hākashoka Jishuwui ming eina ina nali kakasona.”

¹⁴Jihudiwui pāngmon kharei Sceva kaho chiwui naomayara shini china hikathā sāsai.

¹⁵Kha chipee china athumli hānga, “Jishuli I thei, Paullila thei; kha nathum khipākhala?”

¹⁶Chipee kazanga mi china athumli yongrorda nganurhaowa kala athumli sakchanglak eina nganurda athumli yuihaowa. Athum khamā za̱da kashankachonla mangavaila khamahong eina shim chiwui eina yongthuihaowa.

¹⁷Ephesusli kapam Jihudinaobing eina Greeknaobingna chi shālaga ngacheelakhaowa, kala Proho Jishuwui mingli mataimeida masochikata.

¹⁸Shitkasanga mi kachungkha rāda athumna sākahai yārui mangāli hāngphata.

¹⁹Meowor kathema mi kachungkhala athumwui lairik chi khuirāda yaruiwui miktāli rāriktai. Athumna lairikbing chiwui aman chākyanglaga lupā thing hangphangā kāshunga.

²⁰Hithada sāda Prohowui paokaphā hi reisangmamānda ngayaokhangai ngayaohaowa.

²¹Otshotbing chi shokkahaiwui thili Paulna Mecedonia eina Achaia akānlaga Jerusalemli vākhavai phaninghaowa.

²²Chieina ana ali khangachona khani Timothy eina Erastusli Macedoniali chihovai, kha ava Asia ngaleili atam kasāngmeida pamhaowa.

²³Atam chitharan Ephesusli Prohowui Apong chiwui vang khonzārlak eina leisai.

²⁴Lupāsawui ot kasāli them kathema Demetrius kaho akhana Artemiswui kameoshim maong chi lupāsā eina sākhuida hikathā pāngot kasā mi kachungkhali katong samphang ngasaksai.

²⁵Chieina hikathā pāngot kasābing saikorali ana ngahotkhuilaga hānga, “Itao ngarā, ithumna lan samphangda khalei hi hikathā otwui eina kharāna da nathumna thei.

²⁶Ara Paul kaho mipa hina khi sādalei kaji nathumna kathei kashā samphanghaira. Pāng eina sākakhui vare chi vare maningmana da Ephesusmāngli maningla Asia ngalei saikorali tamchitheida kachungkhali yuikhuihaira.

²⁷Ara ithumwui ka̱lāshātva ithumwui leihsak hi mamaholuimara, chimāng maningla kha khareia philava Artemiswui shim hi khikha maningthura kajiwui kalāshāt leihaira kala awui khangamkharei shimānhaora— ava Asiali kala apuk-apagva̱̱li khalei mi kachiva̱na khokharumva̱ varena.”

²⁸Yaruina hi kashā eina athum malungvātlākhaoda “Ephesuswui Artemis reikhamataiva̱” da panglāk eina vaophokuwa.

²⁹Rotkhamarāt chi keinung peida vāshunghaowa. Paulli ngasokazata Macedoniawui mi Gaius eina Aristarchusli yaruina tukkhuida kumei shimli namkachupzanghaowa.

³⁰Paulna yarui chili vangai kha shitkasangabingna mavāngasakthuwa.

³¹Ngalei chiwui khangamkharei awui ngasotnao kaikhanala kumeishim chili awui azak ma-achithei khavai mi chihovāda pao shivāta.

³²Kaikhana akha vao, khangatei kaikhana khangatei akha vao da kazip chi pa̱ngapālakhaowa; mi kachungana khiwui vang chili rākakazipkhala dala matheimana.

³³Mi kaikhana Jihudibingna yarui mangāli vānganing khangasaka Alexanderwui eina tuishot hi kashokna da phaninghaowa. Alexanderna yaruili akhon mashok khavai pāng eina ingkit sāda matuikida sai.

³⁴Kha athumna a Jihudinaona da kathei eina pung khani sha̱kha athum saikora ngaraichā eina “Ephesuswui Artemis reikhamataiva̱na!” da vaosera.

³⁵Keinung chiwui kapimena yaruili vingasakhailaga hānga, “Ephesusnaobing, Ephesus keinung hi reikhamataiva̱ Artemiswui khorumshim khamayona kala kazing eina katā kathara lunggui haikhavai pamna kaji makathei khipā leikhala?

³⁶Khipānakha hi maningmana majirarmara. Chiwui vang eina nathum mangaunlophaila chingrihaiphalungra.

³⁷Ithumwui kameoli makachipat kala khayon makasā mibing nathumna hili khuirāhaira.

³⁸Demetrius eina ali khangaso pāngot kasābingna kachikathā akhawuitungli kaphen leiakha, ithumwui akhavābing lei kala khangachā kārot kakā atam lei; chili tuikat sāngarokranu.

³⁹Kha nathumna chili lāngda kaphen leiakha hanga̱shimli ainwui athishurda chān ngazekki kajina.

⁴⁰Kaja ajawui otshot hi ithumli phenkapaiwui ka̱lāshāt lei. Ngawunlop kahai hiwui vang phayetkhuikapaila maleimana kala hiwui pongli chālak kahai maramla mamirarmara.”

⁴¹Tui hi hānglaga yarui kazip chi ngathānngasakhaowa.