Read Tangkhul Naga OTSAK 2 Bible Online

OTSAK 2 - Tangkhul Naga bible

OTSAK 2

¹Pentecost zimiksho kharā eina shitkasangabing saikora apam akhali kaziprumsai.

²Kashuirak eina masi panglāk eina kaphan thada akhon akha kazingramwui eina tālaga athumna pamkasa shim chi pemtinghaowa.

³Kala malezak kakhui meiwon thada rāda mi kachiva̱wuitungli rāsāza̱mi.

⁴Chieina athum Manglā Katharana pemtinghaoda Manglāna athumli matui khangasak tuiyur khangatei eina matuiphokhaowa.

⁵Chitharan okathui apam kachiva̱wui eina kharā shitkasang khangazipa Jihudi kachungkha Jerusalemli leisai.

⁶Athumna akhon chi kashā eina, mi kachungkha rakazipa, kala athum matakhakhaowa kaja shitkasangbingna kachichāramtui eina matuikasa chi athum kachivana shai.

⁷Chieina athumna khakshingakta kala matakhakhaida hānga, “Matuida khaleibing hi Galilee mi maningsermala?

⁸Kala ithum kachiva̱na kachicharamtui eina matuida khalei ithumna kashā hi kathada rāhaokhala?

⁹Ithum Parthia, Media, Elam kala Mesopotamia, Judea, Cappadocia, Pontus kala Asia,

¹⁰Phrygia, Pamphylia, Egypt kala Cyrene ngaleili khalei Libyawui ngakaikha, Romewui eina kharā Jihudibing kala Jihudi onkahaibing,

¹¹Crete, eina Arabia mibing, ithumna Varewui matakhak kahai otsak athumna imaramtui eina hāngda khalei ithumna shai.”

¹²Chieina athum saikora matakhakhaoda maphākhuilakla akha eina akha hāngngaroka, “Hi khiwui kakhalatkhala?”

¹³Kha khangatei kaikhana mana̱shida, “Athum zamshei manglaga malip kahaina” da hānga.

¹⁴Kha Peterna tharāda akha chili ngasoda nganingkālaga akhon panglāk eina vaoda hānga: “He Judea mibing kala Jerusalemli kapama saikora, nathumna hi theimilu kala iwui tui hi ningsangda khanganāmilu,

¹⁵kaja nathumna kaphaning thada athum khamalip maningmana, arui pung kakathumamāng tāthadharmaya.

¹⁶Shokta khalei hi Joel marānna hānghaikasā china:

¹⁷ Varena hānga, khanaowa zimiksholi ina hi shokngasakra: Kaja mi saikorali iwui manglā heirorra, kala nathumwui naomayarabing eina naongalāva̱bingna marānra, mahākhami nathumwui khanuithotna theira, kala ararnaobingna mang shimanra,

¹⁸Mha, iwui rao sha̱nao mayarnaobingwuitungli chitharan ina iwui Manglā heirorra kala athumna marānra.

¹⁹Ina atungshong kazingramli matakhak kahai chitheira, azingshong okathuili machut mira, ashee kala mei kala tara̱ akahurwui meikhutla theingasakra,

²⁰zimikla tangkhamang onngasakhaora, kachāngla ashee onhaora, Prohowui hakkhamahā tekhamatei zimiksho chi marāranglakha.

²¹Kala Prohowui mingli khangakao mi kachiva̱ makahatlakla kahui samphangra.

²²“Isrealnaobing, tui hi nganāmilu, Nazarethwui Jishu hi Varewui ngasokhami mangā eina nathumwui ngachaili hakkhamahā otla, matakhak kahaila kala machutkakhui otla kasā nathumna theihaira.

²³Rilak eina Varena ngarānping kahai athishurda Jishuli nathumwui pāngli horsangmi kala makaphābingwui pāng zangda ali krushtungli shaothat ngasaka.

²⁴Kha Varena ali kathiwui kachotkachāng eina khalāmihaida ringngasakhaowa. Kathiwui pangshap china matuknarrarmana.

²⁵ Kaja Davidna awui pongli hānga, ‘Proholi ina iwui mangāli theichinga, A iwui yashongli lei, chieina ina mangatha̱luimara.

²⁶Chieina iwui ning ringphai kala imale khamathānna pemtinghai. Kala thikapai iphasāna chihansa̱ ngasāmkhuira,

²⁷Khikhalajila nana ili kazeiramli manothahaimara lah nawui Katharapa chili chikhurli mashuitā ngasakmara.

²⁸Nana ili kharingwui shongfa theingasakhaira, Nawui ngasokhami china ili khamathān chipemmira.’

²⁹“Ivānaobing, ina pinglak eina awo kharar Davidwui pongli hangshapa; kaja a thihaida kachizanla chizanhaira, kala awui chikhur aja eina tangda ithumwuili lei.

³⁰ A marān akhana kala awui wungpamkhongli awui naotun akha chipamra da Varena ngashitmi kahai chi ana thei.

³¹ Ana naoda khi shokrakhala kaji theida, Khristana ringshokluiki kajiwui pongli hithada hānga, ‘Ali kazeiramli manothāhaimana, awui phasāla chikhurli mashuitāmana.’

³²Varena Jishuli ringkhangasak ithum saikorana shākhina.

³³Ara Varewui yāshong pamngasakta, ngashit kahai Manglā Kathara chi Avāva̱wui eina samphanga kala ithumwuitungli heirorkhami chi nathumna kathei kala kashā hina.

³⁴ Kaja Davidna kazing makāmana, chithālala ana hānga, ‘Prohona iwui Proholi hānga; iwui yāshong pamlu.

³⁵Nawui yangkashebingli ina nawui pheinai masangasakranglakha eina tangda.’

³⁶“Chiwui vang eina, nathumna krushli shaothat kahaia Jishu hili Varena Prohola, Khristala sāngasakhaira kaji hi Isrealnao saikorana theikazazakhairanu.”

³⁷Tui chi kashā tharan, athumwui ning sāza̱haoda Peter kala paokazatbing chili hānga, “Ivānaobing, ithumli khi saulu jikhala?”

³⁸Chieina Peterna hānga, “Ning ngateihaolu, kala nathumwui morei pheomi khavai Jishu Khristawui ming singda nathum kachiva̱ ra̱hikhaolu, chithākha Manglā Katharawui lemmet chi nathumna samphangra.

³⁹ Tuingashit hi nathum kala nathumwui naongarāli kala katāva̱li khalei ithumwui Proho Varena hokakhui mi kachiva̱li khamina.”

⁴⁰Peterna khangatei tui kachungkha eina shākhi mida athumli kasatsangda poi, “Makhamashunga mithot hiwui eina yāmshok khavai sālu.”

⁴¹Awui tui khuikasanga mi saikorali ra̱hikmi kala chithanghon mi thingkathum sha̱kha ngarumsanga.

⁴²Athumna paokazatbingwui tamkachitheilila, ngarumsakla, kala khamui shaikhangarum eina seihā kasālila ningtumlak eina sakruma.

⁴³Paokazatbingwui mangā eina matakhak kahai machutkakhui kachungkha sāda mi kachiva̱wuitungli khangachee rai.

⁴⁴ Shitkasanga saikora akha sāda ot saikora ngaraichāda sāngarumsai.

⁴⁵Athumwui khalalei lan, thongthāng saikora yorhaida kachikathāthā khavātabing saikorali ngayarmi.

⁴⁶Thangkachida khorumshimli kāngarumda athumwui shimli khamuila shaingarumda shaohaha phazāngarumchinga.

⁴⁷Kala Vareli sochikatta mi saikorana ngahānngai. Huimi kahai mi Prohona athumli thangthang ngarumsangmichinga.