Read Tangkhul Naga OTSAK 20 Bible Online

OTSAK 20 - Tangkhul Naga bible

OTSAK 20

¹Ngawunlop kahai chi vikahai eina Paulna shitkasangbingli hokhuilaga kazipngarumda kasatsangmi kala kapāngtuila matuilaga Macedoniali vāhaowa.

²Ana apam chili vāmamānda mibingli chānpao kachungkha eina katomsanga. Chiwui thili ana Achaiali rai,

³chili kachāng kathum pamsanga. Ara Syriali vākhavai khangarān sākupser kahai tharan Jihudinaobingna ali sāthat khavai khangarān sāda lei kaji theihaowa. Chieina ana Macedoniavāk eina latunghaora da phaninghaowa.

⁴Berea ngaleiwui Pyrrhuswui naomayara Sopaterla ali ngasovai; kala Thessalonicawui Aristarcus kala Secundus; Derbewui Gaius; Asiawui eina Tychicus eina Trophimus; kala Timohyla zanga.

⁵Ithumli athumna vārilaga Troasli ngaraisai.

⁶Ithumna Khawok-makazanga Khamui phanitwui thili Philippiwui eina marikhong tongkhuida zimiksho matithangwui thili Troasli athumli angaphankhui kala chili zimiksho shinithang pamsanga.

⁷Haptā chiwui kharethang ngazin ithumna kazipngarumda khamui shaikhangarum tharan Paulna akhama kathā zatura jihaoda mibingli ngayāsailung eina tangda tamchitheithaiya.

⁸Ithumna kakazip kā ato chili thaomei tarākha shārthai.

⁹Eutychus kaho mayarnao akha charfali pamsai, Paulna matuithai kaji eina ana pingaināhaida piphup kahai eina mathāng kakathuma chiwui eina saotāda kathi eina ali ngazonkai.

¹⁰Kha Paulna zangvamkhuida hānga, “Makhanangalu, a mathiranga.”

¹¹Chiwui thili Paulna kālaga khamui serkhaida shailaga athumli ngasoda kazing mathangranglakha eina tangda khararchān sai kala chiwui thili zathaowa,

¹²kala yaronnaopa chili athumna kharing eina shimli ringphālak eina khuiungmihaowa.

¹³Ithumna rida marikhong tonglaga Assosli vai. Chili Paulli akhuiki kajina kaja ana chili ngaleivāk eina rāra da ithumli hānghairasai.

¹⁴Ana ithumli Assosli samkaphang eina ali marikhongli khuikāda Mityleneli vāhaowa.

¹⁵Chiwui eina huiphungda akhama kathā Chiosli azanga. Khanaothang kathā Samosli vāshunga kala kakathumathang Miletusli vāshunga.

¹⁶Asia ngaleili atam mashimān khavai Paulna Ephesus kānda marikhong tonglaga zatkhavai phaninghaowa, kaja shapakha Pentecost zimiksholi ā Jerusalemli leisa khavai katotlak eina zathaowa.

¹⁷Paulna Miletusli leilakha Ephesus Church ararbingli ali samphang khavai pao chihovai.

¹⁸Athum awuili kharā eina ana athumli hānga, “Ina Asiali phei kārsang kharethang eina thuida atam kachiva̱li nathumwui ngachaili kathada pamsākhala kaji nathumna thei.

¹⁹Jihudibingna shimān khavai kasāwui vang ina ichamchamlak eina kala chara̱ eina ngasoda kasaka atam chili Prohowui rao akha sāda ot sai.

²⁰Ina kathada shim shimli kala yarui ashangva̱li nathumwui kānna khavai chili mangasunlakla pao hāshok kala tamchitheisākhala kaji nathumna thei.

²¹Jihudinaobing eina Gentilenaobing moreiwui eina ningngateida Varewuili latung khavai kala ithumwui Proho Jishuli shitsang khavai ina ngaraichā eina hāngmachinmi.

²²Ara iwuitungli khi rānikhala kaji matheila Manglā Katharawui kahāng nganāda Jerusalemli vākida zatta lei.

²³Ina katheiva keinung kachida phātop kazang kala kachotkachāngna ili ngaraida leili da Manglā Katharana ili hāngkhami chimānga.

²⁴Kha ina iwui mirin hi sakta makhuimana, Varewui lukhamashanwui paokaphā chi shākhi sākhavai Proho Jishuna khami chi sākupchaoshap khavai himang hi iwui ningkachāngna.

²⁵Kala yanglu, ina wungram hāshok kahaia nathum saikorana ara iwui zakmai kathei masamphangluimarada ina thei.

²⁶Chiwui vang eina nathumwui ngachaili kachikathā akha kashimān leisālala chi iwui khalāng maleiluimana da aja nathumli hāngkaphatna.

²⁷Kaja Varewui kharin saikora chi ina nathumli thumkahai maleilakla hāngmihaira.

²⁸Manglā Katharana nathumwui pāngli horsangmi kahai yaonao saikorawuitunglila, kala nathum khalattawuitunglila ngasharlak eina mayonlu kala Anaomayarana thikhami kala pha̱phayākhami mangā eina awui ngasā ngasak kahaia Varewui churchli homlu.

²⁹Ina thei kaja I thuikahaiwui thili sākashi ramfabingna nathumwui ngachaili rāzangda khipālikha haisāsa majilakmara.

³⁰Kala nathumwui ngachaiwui eina mashongacheida khamatuia kaikha shokta shitkasangabingli athumwui athi shurkhavai sāra.

³¹Chiwui vang eina ina kum kathum peichaoda ngashun ngayā chara̱ tāda mi kachiva̱li tamkachithei mathāhailakmana kaji hi phaningungda nathum ningngasharmeilu.

³²Ara ina nathumli Varewui yangkhami kala awui lukhamashanwui tui chili horsangli, tui china nathumli reisang ngasakshapa kala awui mi saikorali Varewui sokhami mishapa.

³³Ina mi khipākhawui sinā-lupāla, kashankachonla makahaomana.

³⁴Iwui vangla, ili khangasobingwui vangla okthuipai khavai ipāng eina sāzāshapa kaji nathumna thei.

³⁵‘Kakhuiali khamena mataimeida sokhami samphanga’ da Prohona hāngkahai chi phaningungda, ina ot saikora nathumli sāchitheihaira, kaja mi akhana ot panglāk eina sālaga khangazanbingli ngachonmiphalungra kajina.”

³⁶Paulna hāngkup kahaiwui thili athumli ngasoda khuktizangda seihā sāngaruma.

³⁷Athumna ali ngavamkhuida kapāngwui shālam sāmamānda chapa.

³⁸Athumna matailak eina awui azak matheiluimara da ana hāngkahai chiwui vang wukhananga. Chieina athumna ali marikhong pam eina tangda ngasovai.