Read Tangkhul Naga OTSAK 24 Bible Online

OTSAK 24 - Tangkhul Naga bible

OTSAK 24

¹Zimiksho phangāthangwui thili pāngmon kharei Ananiasna ararnao kaikha kala phayatme Tertullusli ngasoda Caesareali vai. Athumna Felixwui mangāli rāda Paulwuitungli mamayākhangai kaphen tui chi mikai.

²Chieina Paulli hozanga kala Tertullusna awuitungli kaphen chi yirphokuwa: “Phākhamataiya Felix! Nawui thangmei thānsak mangā eina ithumna atam kasāngkhawui vang chingri kahai samphanghaira kala ithumwui ngalei phāmei khavai khangacheila tarākha khuirāmihaira.

³Phākhamataiya Felix, ithumna nali apam kachiva̱li kala atam kachida hiwui vang ningkashi chitheili.

⁴Kha atam kasāngkha nali mahapkhano khavai, kasha̱ eina kahāng hi nana lumashanmida khanganāmilu.

⁵Mipa hi khonzār khangasaka, okathuili khalei Jihudi saikorali kuikazā khangasaka kala Nazarene ashangwui kathāna akhana da ithumna theikhuihaira.

⁶Ana khorumshimla makhao ngasak khavai hotnai, chieina ithumna ali tukkakhuina.[2]

⁷Kha akhavā Lyssiana ithumwui pāngwui eina namda rākhuithuihailaga ali kaphenbingli nawui mangāli rālu jihaowa.

⁸Nana ali ngahānkhayang eina ithumna kaphenwui apong saikora chi paisor eina theikhuishapra.”

⁹Jihudibingla zangda kaphen saikora hi mashunga da hānga.

¹⁰Chieina Governorna Paulli matui khavai ingkit sai kala Paulna hānga. “Nana zingkum sha̱rākhawui vang miyur hiwuitungli bicharwo sarā kahai hi ina thei, chiwui vang eina nawui mangāli I khalatta phayatki kajiwui vang ringphai.

¹¹Ina Jerusalemli khorum khavai kakā chi zimiksho tharāda khanithang makāranga kaji nana paisor eina theikhuipaira.

¹²Ina khorumshimli kachikathā mi akhali ngayāt khangarok Jihudibingna masamphanglakmana lah keinunglila, synagoguelila kala apam kachi kachilikhala ina mibingli thotkasang athumna khikha masamphangmana.

¹³Arui athumna iwuitungli kaphen hi mashunga da theikhui khavai athum shākhila mamirarmara.

¹⁴Kha ina hi mayai, athumna mamashungmana kaji Apong chili shurda ina ithumwui avā ngarāna khokharuma Vare chili khoruma. Kha Moseswui ain lairikli kapi kahai saikora chili ina shitsanga kala marānbingna kapi kahai chilila shitsanga.

¹⁵Mibing hina kachihān khalei tākam eina ila Vareli kachihān lei; chiya mi saikora kaphāla makaphāla ringluishitra.

¹⁶Chiwui vang eina Varewui miktālila, mibingwui miktālila mashun-makhui chi tharzā eina atam kachida leikhavai ina hotnai.

¹⁷“Zingkum kashānglaga ina iwui yurli khangachon kala kachigat mikhavai vai.

¹⁸Ina hi sāmahunglakha khipākha mazangla kala khonkazār maleila tharkhangasak ot kasā chi athumna ili khorumshimli katheina; chili yaruila ili ngasoda maleisāmana kala khonkazār otla ina masāmana.

¹⁹Kha chili Asia ngaleiwui eina Jihudi kaikha leisai, athumna iwuitungli makhamayā leiakha kaphen chi nawui mangāli rāmatui ngayia.

²⁰Chi maningakha ina hanga̱ mangāli khanganing hi eina athumna iwui khayon khi samphangkhala kaji hāngranu.

²¹Athumwui mangāli kānganingda ‘Kathena ringluira kajili shitkasangwui vang aja nana ili bichar sāda lei’ kajili lāngda khikha mahāngmana.”

²²Kha Apong chili mathālak eina theihairakasa Felixna tui kasā chi thāngasakhaowa. Ana hānga, “Lysias, shipai akhavā chi kharā eina tuikat hiwui tuikup khuiminaora.”

²³Chiwui thili ana Paulli khamayona shipai shākhawui akhavā chili, Paulli narhai khavai thālala ningkhānva sākhavai kala awui ngasotnaobingna awui kasakli yangkhami tharan makhāmhai khavai kasoi.

²⁴Zimiksho kashānglaga Felixna Jihudipava̱ apreiva̱ Drusillali ngasorai. Ana Paulli hokhui ngasaka kala ana Khrista Jishuli shitkasangwui pongli khamatui chi nganai.

²⁵Kha Paulna mashun, khalatta khangarin, kala rāki kaji bichar zimikshowui pongli ngapheikachithei eina Felix ngacheehaida hānga, “Ara ungpaira, ina atam kaphā chitharan holuinaora.”

²⁶Paulna ali pheizā milapai da phaningsāhaoda ra̱ra̱ hokhuilaga ali chān ngazekchinga.

²⁷Kha kum khaniwui thili Felixwui mahut Porcius Festusna shinhaowa kala Felixna Jihudibingwui masot khuingaihaoda Paulli phātopli haihaowa.