Read Tangkhul Naga OTSAK 27 Bible Online

OTSAK 27 - Tangkhul Naga bible

OTSAK 27

¹Ithumna marikhong eina Italy vaura da kupkahai tharan, Paul eina phātopli sangkahai mi kaikha Augustan Shipai Ashang kaho shipai shākhawui akhavā Julius kaho mipa chili horsangmi.

²Chieina Asia ramphangwui jahas ngasām khavaipamli vāki kaji jahas chi ithumna Adramyttiumwui eina kātongkhuida zatphoka. Chili Thessalonicawui eina kharā Macedonianao Aristarchusla ithumli ngasovai.

³Akhama kathā ithumna Sidonli vāshunga. Juliusna Paulli phaningmida awui ngasotnaobinglila vāyang ngasaka kala khangachonla khuingasaka.

⁴Chiwui eina huiphokluilaga masina ithumli ngaronglak eina phanhaoda Cypruswui ngalei masi makaphanshong huivāhaowa.

⁵Chiwui eina Cilicia eina Pamphylliawui shamadru chi kānhailaga Lyciawui lungli khalei Myrali vāshunga.

⁶Shipai akhavā china apam chili Alexanderiawui eina kharā jahas, Italyli vāki kaji samphangda ithumli chili kātong ngasaka.

⁷Ithumna zimiksho sha̱rakhathang ngairon eina huizatlaga saklak eina Cniduswui keinungli ungzanga, kala masina chivāk mahuipaithuda Solmoneli kāroda khalei Creteshong huivai.

⁸Ithumna shamadruphei chili saklāk eina huivāmamānlaga Laseawui keinung eina matānāla khalei Fair Havens chili vāshunga.

⁹Atamla tarakha shimanhao, shongzāwui ka̱lāshātla leihao kala Ngatangkhami Zimikshola kanthuihairasāda chieina Paulna athumli hānga;

¹⁰“Ivānao ngarā, ithumwui shongzā hi ka̱lāshikapai lei; khuiphungda khalei ot kala jahas kashimānmāng maningla manglā kashimān eina tangda shokra kaji iwui ningli theikakhui lei.”

¹¹Kha shipai akhavā china Paulwui tuili manganāsangla jahaswui akhavā eina captainpawui kahāng khuisangthuihaowa.

¹²Kala jahas ngasām khavaipam chi sikachāng pamkhavai machānāthuda kachungana ato-zingsho kala aze-zingsho khangarei Cretewui jahas ngasām khavaipam Phoenixli kashap eina tangda huivā khavai kala chili si atamli angasāmkhui khavai zatusa jihaowa.

¹³Azingshongwui masina riri phankaphok eina athumna ngarān kahai athishurda huivāpaira da phaninga. Chieina khalap kahai jahas chi khalākhuilaga kashap eina tangda shamadruyar eina Creteshong huivā khavai sai.

¹⁴Kha masāngleila ato-zingsho kaho kapanga masi chi panglāk eina ngalei chiwui eina phanrai.

¹⁵Masi china jahasli ungkathangda chili ngasungda mahuipaithuda masina phankhavāvāshong vauranu da chihohaowa.

¹⁶Tara̱na kuinam kahai ngalei Cauda kaho chiwui azingshong akakān tharan ithumna ngayin khavai kateokha samphanga. Chili jahaswui marikhongnao chi saklak eina yonkhui.

¹⁷Athumna chi ngakhunkākhuilaga jahasli kuimareida khara̱ eina khalapshantithai. Athumna Libya shamadrupheiwui situitungli angatākpaishina da ngacheehaowa, chieina huikazat chi haitāhailaga aningsasak eina jahas chi masili khuiphung ngasaka.

¹⁸Siphan zingrot chi phanshonhaoda, akhama kathā athumna jahasli khuikaphung ot kaikha horshokhaowa,

¹⁹kala khanaothang kathā athumna jahaswui akapbing horshoklui.

²⁰Kaja sha̱rakhathang ithumna zimik, sirā matheirarthuwa kala masinala panglāk eina phanchinghaoda, naodava ithum ringra kajiwui kachihān akhala maleithuwa.

²¹Mibing china kashakazā mazāla kasāngkha zatrā kahaiwui thili Paulna hānga, “Ivānaongarā, nathumna iwui tui khuida Cretewui eina mazatphoksāsi kaja kashimān kala ka̱lāshāt masamphangmara.

²²Kha ara malung pingmeilu da ina nathumli kapona! Jahas maningla nathum khipākha kashimān mashokmara.

²³Kaja āngayā, ina khokharuma iwui Varewui kazingrao akha ili rāda

²⁴hānga, ‘Paul, mangacheealu! Nana Caesarwui mangāli nganingphalungra kala yanglu, nali tongkhangaruma saikora Varena nali mihaira.’

²⁵Chiwui vang ivānaongarā, malung pingmeilu, kaja ana ili hāngkahai chi tāzak eina shokra da ina Vareli shitsanga.

²⁶Kha ithumli tara̱na kuinam kahai ngalei akhali aphanshokra.”

²⁷Tharāda khamatethangwui ngayā sailungphup maikhali ithumna Adriatic shamadruli noung novada phanzatlakha jahas kahuibingna ngalei katheng nganaiura da phaninga.

²⁸Athumna tara̱ chiwui kathuk tamyang khavai khara̱ chihozanglaga khayang eina feet shākha maga̱ thuksai, khaleilaga tamkhayang eina feet hangchiko thuksai.

²⁹Jahas chi lunghārli vangatākpaishina da ngacheehaoda akhanukvāk marikarhui mati chihozanghailaga seihā sāda kazing kathang ngarai.

³⁰Jahaswui mangāshong khalei jahas hokkhui khavai mari chi chihosang khavaina da sakhaninglaga kahuiabing chi yāmshok khavai sāda marikhongnao chi tara̱li chihozanga.

³¹Kha Paulna shipai shākhawui akhavā eina shipaibingli hānga, “Kahuiabingna jahasli mapamakha, nathum ringkhavai kachichān akhala maleimana.”

³²Chieina marikhongwui khara̱ chi shipaibingna katatshathailaga chihohaowa.

³³Zingthanlam Paulna athumli kashakazā zākhui khavai kasoda hānga, “Nathumna mazālakla khumkharā hi ajana zimiksho tharāda khamate thangna,

³⁴chiwui vang eina pangshap samphang khavai kashakazā kazākhuilu, nathumwui ngachaili kachikathā mi akhawui sampā akhala mashimānmara.”

³⁵Paulna hi hāngchanghailaga khamui khuida athum saikorawui miktāli Vareli ningkashi mihailaga serkhaida shaiphokkuwa.

³⁶Chieina athum saikorala ringphauda phazāseruwa.

³⁷Jahas chili katonga ithum mi saikora shākhani hangshinida tharukna.

³⁸Athumna shaishap shaikahaiwui thili jahas chi ngavengsang khavai kehu chi shamadrulungli horsanghaowa.

³⁹Kazing kathang tharan khi ngaleikhala kaji athumna matheithuwa, kha ngalei ngachaili ngayi ngaphangvā kahai theida, sapaiakha chiwui ngayipheili jahas angasāmkhui khavai khangarān sai.

⁴⁰Chieina athumna jahas hokkhui khavai marikarhui chi ngayili horsanglaga khalap khavai khara̱bing chi khalākhui, laga mangāshongwui kachon chi masi azatli yangda khāngkākhuilaga ngayipheishong huivai.

⁴¹Kha apam chi mathukla pailatsā eina leisāda ngaleikathengli ashokhaowa kala akhamor situili shirshipsanghaida mangatha̱paithuwa; kala akhanukvāk chiya tara̱wui khangaphao chi pangnāhaida kathangkhaihaowa.

⁴²Kachikathāna ra̱yākshokta yāmhaipaishina da ngacheehaida shipaibingna phātop kazangbing chili sāthat khavai ngarāna.

⁴³Kha shipaiwui akhavā china Paulli kankhuingaihaoda athumwui sākhangai chi masā ngasakthuwa. Ra̱yāk kathei saikorana jahaswui eina ngawokshokta shamadrupheili ra̱yākshok khavai ana kasoi.

⁴⁴Kala mara̱yākkatheibingna chikhaili nilala jahaswui atek akaili nilala hokthānglaga athumwui athi shurshok khavai kasoi. Hithada ithumna shamadrupheili yāmshoksera.