Read Tangkhul Naga OTSAK 3 Bible Online

OTSAK 3 - Tangkhul Naga bible

OTSAK 3

¹Chitharan seiha kasa atam, pung kachiko katā tharan Peter eina Johnna seihā sākhavai khorumshimli kai.

²Kala kapharāwui eina phei sheikasha̱ mi akha, khorumshimli kharābingwuili pozāpai khavai Khamathā kaho khorumshimwui ngavei chili rāchipampam ji.

³Peter eina Johnna khorumshimli zanguki kaji eina ana pheisānao poi.

⁴Peter eina Johnna yangtitta hānga, “Inili yanglu.”

⁵Chieina aniwui eina khikhikha samphanglapai da ningsanglak eina yanga.

⁶Kha Peterna hānga, “I sinala, lupāla maleimana, kha iwui khalei chi nali khamina, Nazarethwui Jishu Khristawui mingli ina nali ngakarthuida zatlu da kakasona.”

⁷Chiwui thili awui yāpang singkhuida khāngkhamathot eina ngalāngda awui phei, pheimikra̱ sheikasha̱ chi phāhaowa.

⁸Ngakarthuida ana ngalonglaga zatung zatvai; kala Vareli masot chikatta khorumshimli anili ngasozanga.

⁹Ana zatmamānda Vareli masot kachigat chi mi saikorana thei,

¹⁰kala khorumshimwui Khamathā Ngavei kaho chiwui pheili pokapama chipāna da theihaoda ali kathada rāshokmamei kahaikhala da mibingna phaninglaga matakhakhaowa.

¹¹Ana Peter eina Johnli ngathānkazat chi theilaga mibingna matakhakhaida Solomonwui khamrei kaho chili yongra ngaroka.

¹²Chi theida Peterna hānga, “Isrealnaobing, hili khisāda matakhakhaokhala, iniwui pangshap lah khamathā eina ali zatngasak kahai thada khisāda inili matakhak eina yangtitlikhala?

¹³ Pilatena chihomihaoga kaji tharan nathumna mamayāmada khalan kahaia awui rao Jishuli, Abraham, Isaac, Jacob, kala ithumwui avāngarābingwui Varena tekmatei ngasakhaira.

¹⁴Kha nathumna Kathara kala Khangarongpali khalanhailaga mi shaokathatapāli chihomi khavai poi.

¹⁵Kharingawui akhavāli nathumna shaothathaowa, kha Varena kathiwui eina ali ringngasaka, hiwui shākhi ithumna.

¹⁶Awui mingli shitkasang china nathumna theida khalei mipa hili pangngasakhaira, kala Jishuwui mangā eina shitkasang china nathum saikorawui mangāli awui phasā pongngasakhaira.

¹⁷“Ara, ivānaobing, nathumwui kathānabingna sākahai thada, nathumnala matheimada sāhaira da ina thei.

¹⁸Kha Varena awui marānbing saikorawui khamor eina Khristana kachotkachāng phungphalungra da rida hāngkahai chi ana ungshung ngasakhaowa.

¹⁹Chiwui vang eina nathumwui morei pheomipai khavai mai ngareiungda ningngateilu.

²⁰Chieina Prohowui eina manglāwui pangshap samphangra kala kapang kahaia Khristala kaho Jishuli nathumwui vang chihorāpaira.

²¹Achālakhawui eina thuida Varena awui kathara marānbingli shichinlaga hāngngasak kahai saikora chi maungshungranglakha eina tangda a kazingramli leisāphalungra.

²² Kaja Mosesna hānga, ‘Ili chihokharā thada Proho Varena nachinā marān akha chihorāra. Ana kahāng saikora nathum nganāphalungra.

²³ Marān chili manganākasang mi kachiva̱li yurwui eina katathaora.’

²⁴Samuelwui eina thuilaga maron maron eina kharā marān saikoranala atam hiwui tui hānghaisai.

²⁵ Nathum marānbing kala Varena tuingashit mikahai navā ngarāwui naongarāna, kaja Abrahamli hithada hānga, ‘Nawui ara̱-azāwui mangā eina okathuili khalei shimkhur saikorali somira.’

²⁶Varena awui rao chi kapangkhuida, mi kachiva̱na makaphā-makhayāwui eina mai ngareiungda sokhami samphang khavai rimeikapta nathumwuili chihorai.”