Read Tangkhul Naga OTSAK 7 Bible Online

OTSAK 7 - Tangkhul Naga bible

OTSAK 7

¹Chiwui thili pāngmon kharei china ali ngahāna, “Kaphenbing hi mashungla?”

² Chieina Stephenna ngahānkhai, “Ivānao ngarā kala ishāvā ngarā, iwui tui nganāmilu. Ithumwui awokharar Abrahamna Haranli mavāpānranglakha Mesopotamiali tekhamateiwui Varena rāsamphanga,

³ kala ali hānga: ‘Nali pharāsang kahai ram kala nawui shangnao chihohailaga ina chitheiki kaji ramli vālu.’

⁴ Chiwui thili ana Chaldea ngalei chihohailaga Haranli vāpānthuihaowa. Avāva̱ thikahaiwui thili, Varena ali arui nathumna pānda khalei ngalei hili khuirai.

⁵ Chithālala Varena ali apam hili awui pamkhavai ngalei khuiningkhala mamimana, kha awui nao akhala maleisālala Varena ngalei chi ali kala awui ara̱-azāli mira da ngashitmi.

⁶ Hiwui pongli Varena ali hāngna: ‘Nawui ara̱-azāna miram khangateili pānra, chili athum rao sāda zingkum shāmati athumli zakshilāk eina sāra.

⁷ Kha athumna otram ngatha̱khame mibing chiwuitungli ina bichar sāra, chiwui thili athumna ngalei hiwui eina shokta apam hili ili khorumra.

⁸ Chieina Varena Abrahamli tuingashitwui khudam sāda ahui rimkashokwui otsin mi. Abrahamna Isaacli pharākhuida hapta akhawui thili ahui rimshoka, kala Isaacna awui naomayara Jacobli pharākhui kala Jacobna ithumwui avākharar ngarā awui nao tharāda khani pharākhui.

⁹ “Ishāvā ngarā china Josephli mikpaishida Egypt ngaleili yorsanghaowa; kha Varena ali ngasomi,

¹⁰ kala awui kakhanang ringkashi saikorawui eina ali kanmi, Egypt awunga Pharaohwui lumkakā samphangpai khavai Josephli Varena thangkhamei mi, chieina awungana ali Egypt katonga kala Pharaohwui shimkhurwuitungli mungkhavai governor sāngasaka.

¹¹ Chitharan Egypt kala Canaan ngaleili chāmrei rāhaoda kachotkachāng tarākha samphang ngasaka. Ishawo ishayi ngarā zāt masamphangthuwa,

¹² kala Jacobna Egyptli kashakazā lei kaji kashā tharan, awui naongarā, ishawobing chili chihovai.

¹³ Athum rākakhaneli, athumli Josephna a khipākhala kaji hāngchithei, chieina Pharaoh awungana Josephwui shimkhurli theihaowa.

¹⁴ Chieina Josephna avāva̱ Jacob kala ashi shimkhur mi hangshinida phangā chili Egypt ngaleili rākhavai pao chihovai.

¹⁵Jacobna Egyptli tai kala chili ala, awui naongarābingla thisangsera.

¹⁶ Athumwui phasā chi Shechemli khuiunga kala chili Abrahamna Hamorwui naongarāwui eina lokakhui chikhur chili ungchizana.

¹⁷ “Varena Abrahamli ngashit kahai atam chi rānganaimamān kaji tharan, ithumwui miyurbing Egypt ngaleili chungsangkhangai chungsanghaowa.

¹⁸Chitharan Josephli makatheia awunga akhana Egyptli mungphokuwa.

¹⁹ Ana ithumwui miyurli sāshilak eina sai kala athumwui angangnaobing chi chithit khavai ishawo ngarābingli tandi sai.

²⁰ Atam chitharan Mosesli pharai kala Varewui miktāli a khamathā naona. Avāva̱wui shimli ali kachāng kathum nganaowa.

²¹ Ali ayarli vahor kahai tharan Pharaohwui naongalāva̱na khuida awui nao thada nganaokhui.

²²Mosesli Egyptnaobingwui wortam saikora tamchitheisera, chieina tuimatuilila, otsaklila pangshap khalei mi akha ngasāhaowa.

²³ “Moses zingkum hangmati kākashung tharan awui chinaongarā Israelnaobing kathada leilikhala da vāyang khavai phaninghaowa.

²⁴Kala Israelnao akhali Egyptnao akhana zakshilāk eina kasā chi ana theilaga, Egyptnaopa chili shaothathaida athut khuimi.

²⁵Awui miyurli Varena ningkhān ngasak khavai ali shichinra kaji hi athumna bhap tāra da ana phaningsai, kha athumna chi bhap matāthuwa.

²⁶Akhama kathā ana Israelnao khani ngama̱kasā theilaga mashit khavai ahānga, ‘Nganālu nani Israelnaona, khisāda nani khani ngama̱khala?’

²⁷Kha khayonapa china Mosesli sheikārvāhailaga hānga, ‘Nali khipāna ithumwuitungli akhavā sāda bichar sākhavai kasokhala?

²⁸Nana ayā Egyptnao akhali shaothat kahai thada ilila shaothatluingaila?’

²⁹ Ngaworkakā tui hi shālaga Mosesna Egyptwui eina yāmlaga Midian ngaleili vāpānhaowa kala chili nao mayarnao khani pharākhui.

³⁰ “Zingkum hangmatiwui thili kazingrao akhana Sinai kaphungwui lamhāngli thing khangapoma akhali meiwon eina rāsamphanga.

³¹Mosesna chi kathei eina matakhakhaoda mathāmeida yangkhui khavai nganaimeida vai. Kha Prohowui akhon ana shāhaowa.

³²‘I navā ngarāwui Vare, Abraham, Isaac kala Jacobwui Vare china.’ Moses kathirriri ngacheenāhaoda mayanglengthuwa.

³³Chieina Prohona ali hānga, ‘Nawui pheihop khuishokhaolu, kaja nana nganingda khalei pam chi kathara ngaleina.’

³⁴Egypt ngaleili iwui miyurli sāshilak eina kasā chi theihaira, kala athumwui ringkhangā akhon ina shāhaira. Athumli ngatangkhui khavai katāna. Ara rālu, ina nali Egyptli chihovāra”

³⁵ “‘Nali khipāna akhavā kala bicharwo sāngasakhala’ da mibingna makhamayā Moses hili, Varena thing khangapompamli theikhangasak kazingrao chiwui khangachon eina akhavāla kala kankhamela sāngasakta chihovai.

³⁶ Ana mibingli thānshokta Egyptlila, Red Sealila kala kum hangmati lamhānglila thānzatta matakhak kahai kala machut tarākha sai.

³⁷ ‘Varena ili shokkhangasak thada nathumwui vang nachinā ngarāwui eina marān akha shokngasakra’ da Israelnaobingli kahāng chi Moses hilaka.

³⁸ Sinai kaphungli chān rākhangazeka kazingrao eina ithumwui ishawo ngarābingli ngasoda lamhāngli yārui kazipkhangarumli kazang chi alaka kala ithumli mimaron khavai Varewui kharinga chānpao chila ana samphanga.

³⁹ “Kha ishāvā ngarāna awui kahāng manganāthuwa, kala ali horhaida athum Egyptli hanungluishitngaihaoda

⁴⁰ athumna Aaronli hānga, ‘Ithumli thānkhavai meoma̱ akha sāmilu, kaja ithumli Egyptwui eina thānkashoka Mosesli khi shokhaokhala kaji ithum matheithura.’

⁴¹Chieina athumna seinao akha sākhui, kala meoma̱ chili pha̱ya kala athumwui pāng eina sākakhui meoma̱ chili khayāshida mathāna.

⁴² Kha Varena athumwui eina mai ngareithuihaowa kala kazingli khalei sirābingli khorum khavai horsangmihaowa, hi marānbingwui lairikli hithada kapihai: ‘He Israelnaobing! Lamhāngli zingkum hangmati zatlakha, nathumna sāyur ili pha̱kaphayā chigatla?

⁴³Nathumna khorum khavai pāng eina sākakhui Moloch kala Rephan kameo sirawui kachonshim khaningkai, chiwui vang ina nathumli Babylon vāklaida khuivāhaora.’

⁴⁴ “Ithumwui awo-ayibingna lamhāngli leilakhala Varena athumli ngasokhamiwui kachonshim chi leisai. Varena Mosesli hāngmi kahai kala Mosesna chiwui athishurda theikakhui chi tāzakta kachonshim chi sai.

⁴⁵ Varena kasham kahai miyurbingwui eina athumna Joshuali ngasozangda zangkakhui chitharan ishawo ngarāna athumwui avāva̱ ngarāwui eina samkaphang kachonshim chi khuizanga. Chi Davidwui thot eina tangda leisai.

⁴⁶ Davidna Varewui ngahānkhangai samphanga kala Jacobwui Vare pamkhavai shim akha sakākhavai Vareli khamayā poi.

⁴⁷ Kha shim sākakāpāva Solomon ngasāhaowa.

⁴⁸“Chithālala, Juikhamataiya Varena miwui pāngna sākakhui shimli mapammana; marānna hāngkahai thada;

⁴⁹ ‘Kazingram hi iwui wungpamkhongna, okathuina iwui pheiparna. Iwui vang nathumna kachikathā shim sāmirakhala? Iwui vang ngasāmkhui khavai pam kali leikhala?

⁵⁰Ot saikora hi ina kasā maningmala?’ da Prohona hānga.

⁵¹ “Hāngkashi mibing, wuklung kala khanā ahui marimkashoka mibing, nathumna Manglā Katharali ngakaishichinga. Nathumwui avā ngarāna kasa thada, nathumla chi tākamhai.

⁵²Navā wongarāna marekakharek marān khaleisāla? Khamashunga rao rāki kajiwui tui hāngkhame Varewui paophungabinglila athumna sāthata. Khamashunga rao chili nathumna yansaida shaothathaira.

⁵³Nathum kazingraobingna mikhamaron Varewui ain samkaphangbingna, kha nathumna chi mamayonmana.”

⁵⁴Hangva̱naobing china Stephenwui tui chi nganālaga malungvātlakhaoda ahā kachetlaga yanga.

⁵⁵Kha Stephen Manglā Katharana pemhaida kazingramli yangkakā eina Varewui tekhamatei kala Jishuna Varewui yāshong khanganing chi theida,

⁵⁶ana hānga, “Yanglu, kazingram shohaida miwui Naomayarana Varewui yāshong nganingda khalei ina thei.”

⁵⁷Hi kashā eina athumna athumwui khanā kafakhamhailaga panglāk eina vaoda ali ayongrora,

⁵⁸kala keinungwui ayarli khuishoklaga lunggui eina horthathaowa. Chitharan shākhibing china athumwui kashankachon raitāda Saul kaho yaronnao chiwui pheizingli haimisera.

⁵⁹Athumna Stephenli lunggui eina horda leilakha Stephenna, “Proho Jishu, iwui manglā kakhuimilu” da seihā sai.

⁶⁰Ana khuktizangda, “Proho! morei hiwui kashong athumli matāmialu” da panglāk eina vaolaga amanglā chihohaowa.