Read Tangkhul Naga ROMNAO 10 Bible Online

ROMNAO 10 - Tangkhul Naga bible

ROMNAO 10

¹Ivānaongarā, iwui ningchangmeikap kaji kala Vareli seihā kasā chiya, iwui miyurli huikhui khavai hina.

² Ina hangshapa kaja athum Vareli lungtumlak kahai lei; kha athumwui lungkatum hi theishingkakhui awor chili maleimana.

³ Kaja athumna Varewui eina kharā mashungkhami chi matheimana, kha athum khalattawui apong phālaga Varena mashungkhami chili mamayāthuwa.

⁴ Kaja Khristana ainwui pangshap chi tangngasakhaira, chieina shitkasanga mi kachiva̱li Varena mashungmira.

⁵ Ain mayonlaga mashungkhamiwui apongli Mosesna kakapi chi hina: “Ainwui kakaso khamayona mipā china ainwui athishurda ringra.”

⁶ Kha shitkasangwui mangā eina mashungkhamiwui apongli kathara lairikli hithada kapihai, “Kazingramli khipā kārakhala da na khalatta mangahānalu.” (chiya Khristali khuitā khavaina)

⁷Kazeiramli khipā zangrakhala dala mangahānalu, (chiya Khristali kathiwui eina khuishok khavaina)

⁸ Hiwui kakhalatva, “Varena hāngkahai tui chi nali nganailaka, nawui morchai eina wuklungli lei.” (chiya, ithumna hākashoka shitkasangwui paokaphā china).

⁹ Kaja nawui khamorna Jishu hi Proholaka da hāngphatakha kala nawui wuklungli Varena ishāmei ali kathiwui eina ringshok ngasaka da shitsangakha nali huimira.

¹⁰Kaja ithumwui wuklung eina shitkasangwui vang mashungmi kala ithumwui khamor eina hangphata kahui samphang ngasaka.

¹¹ Kaja hithada kapihaida lei: “Ali shitkasang mi khipālikha kaphaning makaingasakmara.”

¹² Chili mi saikora zanga, chiya Jihudi eina Gentilebing khangatei maleimana. Vare hiya saikorawui Prohona kala ali khangakao saikorali khavāt maleilakla somi.

¹³ Hithada kapihaida lei: “Prohowui ming singda khangakao mi kachiva̱li huimira.”

¹⁴Kha athumna ali mashitsangakha kathada ngakaopairakhala? Kala athumna pao chi mashākha kathada shitsangrakhala? Kala pao chi mahāshokakha athumna kathada shārakhala?

¹⁵ Kala pao phungmebing machihoakha kathada hāshokrakhala? Hithada kapihaida lei: “Paokaphā khuikaphungbingwui kharā chi teokha matakhakhailakle!”

¹⁶ Kha athum saikorana paokaphā chili manganāsangmana. Isaiahna hānga, “Proho, khipāna ithumwui pao hi shitsanghairakhala?”

¹⁷Chithada sāda kashā eina shitkasang shoka kala Khristawui apong hākashok eina kashā samphanga.

¹⁸ Kha ina ngahāna: Athum pao chi mashāranglā? Shāchaohaira kaja hithada kapihaida lei: “Athumwui akhon chi okathui katongali vāhaira; athumwui tui chi okathui katongali vāshunghaira.”

¹⁹ Ina ngahānluishita: Israelnaobing bhap matāthulā? Mosesna rimeikapta hithada ngahānkai; “Ina nathumli yur kachangkhat makhaninga mibingli yanglaga mik mathak ngasakra, ina mangkhama̱ miyurli shichinlaga nathumli malungvāt ngasakra.”

²⁰ Kala Isaiahna pingmeida hithada hānga: “Makaphābingna ili samphanghaira; Ili makhangathingbingli ina ikhalatta chitheihaira.”

²¹ Kha Israelwui apongli ana hānga: “Kahāng makhanganā kala ngakaikashe miyurli ina mashitkhui khavai langpongda hoi.”