Read Tangkhul Naga ROMNAO 12 Bible Online

ROMNAO 12 - Tangkhul Naga bible

ROMNAO 12

¹Chiwui vang eina ivānaongarā, Varena ithumli tarākha lumashankhamiwui vang ina nathumli hi poli kaja nathum khalatta Vareli ringchigat sāda chigatlu, otram khangatha̱li dharchigatta ali ningyāng ungngasaklu. Hi nana chigatkhangayiya khamashunga khokharum chilaka.

² Okathuiwui khangachāli mangarumhaialu, kha nathumwui ning chi onchang onngasaklu. Chieina nathumna Varewui ningkachāng kaphā, ningyāng ungkapai kala kākashung chi khikhala da theipaira.

³Varena ili lumashankhamiwui mangā eina ina nathumli kahāngna: Nathum khalatta khangayi chili lāngda chuimeida maphaningalu, kha ayat ungda phaninglu, mi kachiva̱ kachichāli mikahai shitkasang chiwui angarit eina chukmaja̱ranu.

⁴ Mi akhawui phasāli akai kachungkha lei. Akaibing chiwui otsak ngatateida lei.

⁵ Chithada sāda ithum kachungkhalala Khristawui lungli phasā akhana, phasā akhawui akaibing thada ithum akha eina akha ngashik ngarokta lei.

⁶ Varena ithumli mikahai awui lukhamashan chiwui athishurda lemmet ngatateida leihaogada chiwui athishurda sāphalungrali. Khamarānakha, ithumwui shitkasang khaleiyakha sāra;

⁷otram ngatha̱ khavai miakha, otram ngangatha̱phalungra; tamchithei khavai miakha tamchitheiphalungra;

⁸katom khavai miakha chi sāphalungra; kachikathāna mishai-mishakakha haolak eina mishai-mishaklu; pangshap kasinga china ning horsangchaoda sāphalungra kala lukhamashanwui ot kasaa china mathānthup eina sāphalungra.

⁹Kāshunglak eina leishilu, makaphāli ningkachailu, kaphā chi singtitlu.

¹⁰Akha eina akha Khristawui lungli chinaongarāwui leikashi mida leishi ngaroklu. Akha eina akha khayāshi ngaroklu.

¹¹Lungsanda ot sālu, ngachāngmachatalu, Proholi ningtongda otram ngatha̱lu.

¹² Nawui kachihān china nali ringphā ngasaklu, kachotkachāngli khāngda sālu kala seihā sāchinglu.

¹³Khavatabingli nawui khalalei ngayarmilu kala kha̱mishimāli rāzang ngasaklu.

¹⁴ Nathumli rekakharekbingli somi khavai Vareli pomilu, mha, makhonshila somi khavai pomilu.

¹⁵Ringkaphābingli ringphā ngarumlu, kachapbingli chapngarumlu.

¹⁶ Ningkha-yangkha sāda okthuilu; makachorshialu, kha ngahuirihailu kala mathangmeirekalu.

¹⁷ Kachikathāna nali makaphā sālala athut makhuialu, kha mi saikorana kaphā otna da kaphaning chi sālu.

¹⁸ Mi saikorali mashitri eina okthuirum khavai kashap eina tangda sālu.

¹⁹ Leikashebing, athut makhuilakalu, kha Varewui malungkhavāt eina vairanu, kachiwui vangkhala kaja hithada kapihaida lei, “Athut kakhui chi iwuina, ina athut hāngsangmira da Prohona hānga.”

²⁰ Hithada kapihaida lei; “Nawui yangkashena thaiakha mizālu, ana ra̱changakha mimanglu; hithada kasā eina nana ali chammalā ngasakra.”

²¹Makaphā china nathumli mayui ngasaklu; kha makaphāli kaphā eina yuikhuilu.