Read Tangkhul Naga ROMNAO 13 Bible Online

ROMNAO 13 - Tangkhul Naga bible

ROMNAO 13

¹ Mi kachiva̱ ngalei khamungabingli khayāshiphalungra; kachiwui vangkhala kaja Varewui khamayā maningakha athumwui pangshap maleimana, kala leikahaiya pangshap chi Varena khamina.

²Chiwui vang eina kachikathāna pangshap kasinga chili ngakaishiakha Varewui kaso kahai chili ngakaikashina kala chithada kasaa chi akhalatta kashong phākhuira.

³ Kaja kaphā kasābingna khamungbingli ngachee khavai maleimana, kha makaphā kasābingna khangacheena. Pangshap kasinga chili mangachee ngayimala? Chithākha kaphā ot sālu, ana nali sora.

⁴ Kaja ava nawui phākhavaiwui vang ot sāda khalei Varewui raona. Kha makaphā ot sākha ali ngacheelu, khiwui vangkhala jilaga tandi mikhavai pangshap chi awuina. A Varewui raona kala makaphā kasābingwuitungli Varewui tandi chi ana mi.

⁵Hithada sāda Varewui malungkhavāt masamphang khavaiwui vangmāng maningla kha nathum khi sāngayikhala kaji mashun-makhui katheiwui vang khamungabingwui kahāng nganālu.

⁶Chiwui vang eina nathumna khāshinā khamina; athumna athumwui sāki kaji ot kasā chi Varewui vang sākhamina.

⁷ Athumli miphalungki kaji chi milu; miphawui khāshinā mikhangayili milu kala khayāshi khangayili khayāshilu.

⁸ Khipālikha leiman mazangalu, leishida ningaishi ngaroklu. Akha eina akha leishi khangarok hi ain ungshung khavaina.

⁹ Ningkhamili “Maphopaimana, mashaothatpaimana, maleepaimana, mangamarpaimana,” da kapihai; kha saikora hi kala ningkhami khangatateila, “Nakhalatta leikashi thada nawui khongnainaoli leishiphalungra” kaji ningkhami hili zangsera.

¹⁰ Leikashe china khongnainaoli khayon masālakmara. Chiwui vang eina leikashi hina ain hi ungshung ngasaka.

¹¹ Nathumna hi sāphalungra, khiwui vangkhala jilaga kapiwui eina thuimathukphalungki kaji atam rāhaira. Kaja huiki kaji atam chi ithumna shitsangkaphok eina yangakha nganaimeikharhaira.

¹² Ngayā kanthuiki jiura, ngathor rārāli. Tangkhamangwui ot horhaosa, kahorwui lungli ngarar khavai raisari shaksāusa.

¹³ Kahorlungli okathui thada ithum khalatta mashungrik eina zatsa; kakharar, khamarip, ayat makasā, khamathang, ngama̱khangazai, kala mikpaikashi ot masaasa.

¹⁴ Kha Jishu Khristawui khutlai chi khangkāda moreiwui khangachā kala chi ningyāng ungkhavai hengsangkhami chi thahaolu.