Read Tangkhul Naga ROMNAO 15 Bible Online

ROMNAO 15 - Tangkhul Naga bible

ROMNAO 15

¹Shitkasang khangatara ithumna khangazanbingli athumwui makathuk chili ngachonmiphalungra, kala ithum khalattawui ningyāng ungkhavai masāphalungmara.

²Kha khongnainaoli awui shitkasang mataisang khavai ningyāng ungngasakphalungra.

³ Khristana a khalattawui ningyāng khaung maphāmana; kha hithada kapihaida lei: “Nali mana̱kashibingwui mana̱kashi chi iwuitungli tāhaira.”

⁴ Achālakha kapi kahai chi ithumli hāngmachin khavaina, kaja ithumna nganingtitta kala kathara tuina kasatkasang athishurda kachihān leikhavaina.

⁵ Khrista Jishuna sāchithei kahai chi shurda khangachei makhalei kala ninglum khangasaka Vare china nathumli khokkha kasāwui ningngai miranu.

⁶Chieina nathum saikorana khokkha sāda akhon akhamāng eina Vare kala ithumwui Proho Jishu Khristawui Avāva̱li masot chikatpaira.

⁷Khristana nathumli khuisangkhami thada nathum akha eina akha khuisang ngarokta Vareli tekmatei ngasaklu.

⁸Ina nathumli kahāngna kaja Varewui ningkatong kala awo-ayibingli ngashitmi kahai chi ungshunga da theikhavai Khristana Jihudibingwui mahut sāda otram ngatha̱mi.

⁹ Kala Varewui lukhamashan chiwui vang Gentilebingnala masotchikat khavaina. Hithada kapihaida lei: “Chiwui vang eina Gentilebingwui ngachaili, ina nali Varena da theingasakra.”

¹⁰ Hithada hāngluishita, “He Gentilebing, Varewui miyurli ngasoda mathānlu!”

¹¹ Kala hāngluishita, “Gentile saikorana Proholi sochikatlu, miyur saikoranala ali sochikatranu.”

¹² Kala Isaiahna hāngluishita, “Jessewui ara̱-azā akha rāra, Gentilebingli ana mungra kala athumna ali chihānra.”

¹³Kachihānwui ura̱ Vareli nathumna shitkasang khaleiwui mangā eina khamathān kala chingri kahai chipemiranu. Chieina nathumwui kachihān chi Manglā Katharawui pangshap eina mataisangra.

¹⁴Ivānaongarā, ina kachangkhat theikhuihaira kaja nathum kaphāla phālaka, thangkhameila thangmeilaka kala akha eina akha tamchithei ngarokshapa.

¹⁵Varena khami lukhamashan mangā eina apong kaikhali ina nathumli mangathumlakla chithilila phaningung khavai kapihaira.

¹⁶ Kaja Khristawui rao akha sāda Gentilebingli Varewui paokaphā tamchithei khavaiwui khamahai samphangda ina mangathumlakla kagapina. Gentilebingli Manglā Katharana dharchigatmihaida Varena khuisangkapai ngasāpai khavai pāngmon akha thada Varewui paokaphā hākashokli ina otram ngatha̱ya.

¹⁷Chieina Jishu Khrista eina I akha ngasāda Varewui vang otram khangatha̱ hili lāngso kashapna.

¹⁸ Gentilebing Varewui kahāng nganā khavai Khristana ili shichinlaga kathada sākhala kajimāng ina pinglak eina matuira. Hi ana awui tuimatui, kala otsak kala

¹⁹ matakhak kahai khudam einala kala Varewui Manglāwui pangshap einala kasāsera. Chieina Jerusalemwui eina thuilaga Illyricum shangshungda ina Khristawui paokaphā peida hāshokhaira.

²⁰ Khristawui pao mashārang kaji apam kachiva̱li paokaphā hākashok hi iwui ningrinna. Chieina mi kateina hashok kahai apamli I mavāmana.

²¹ Hithada kapihaida lei: “Awui pongli mahāngchitheirang kajebingna theira, mashārang kajebingna theishingkhuira.”

²² Nathumwuili rāra jilaga hapkakhano leichinghaowa.

²³ Kha ara apam hishong iwui ot kuphaira, kala zingkum hirankha nathumli rākhavai khangarān kasā athishurda ara rāpaiura da shitsanga.

²⁴ Ina Spainli khavā atamli nathumli rida samphang khavai rāngasāmsangngai kala nathumwui khangachonla khuingai.

²⁵ Kha aruicham katharabingli khangachon khuivāmi khavai Jerusalemli vāfara.

²⁶ Kaja Achaia eina Macedoniali khalei churchbingna Jerusalemli khalei kachāma katharabingli haolak eina pheisā ngachonmira jihaira.

²⁷ Athum khalattana sāra jikahaina; kachangkhat eina hangsa jiakha kachāmbingli ngachonmi ngayiphalunga; Jihudinaobingna Manglāwui sokhami hi Gentilebingli ngayarmi kahaina. Hithada sāda Gentilebingnala athumwui lanwui sokhami chieina Jihudinaobingli ngachonngayiya.

²⁸ Chiwui vang eina ngashaikhui kahai lanbing chi athumli mikahaiwui thili nathumli samphangphungda Spainli vāra.

²⁹ Ina nathumli kharā tharan Khristawui eina samkaphang hakkhamahā sokhami chi rāhāngchitheira.

³⁰Ivānaongarā, ina nathumli pongai kaja ithumwui Proho Jishu Khrista kala Manglāna khami leikashiwui mangā eina iwui vang Vareli thuklak eina seihā sāmichinglu.

³¹ Judeali khalei mashitkasangabingna ili mahapkhano khavai seihāla sāmilu, chieina Jerusalemli iwui otram khangatha̱ chi katharabingna khuisangkapai ngasāra.

³² Kala Varena mayāmiakha, ina ringphālak eina nathumli rāsamphangra.

³³ Chingri kahaiwui ura̱ Vare china nathum saikorali ngasomiranu. Amen.