Read Tangkhul Naga ROMNAO 2 Bible Online

ROMNAO 2 - Tangkhul Naga bible

ROMNAO 2

¹ Chiwui vang eina, O mikumo! khipā khipākharanu, nana mi khangateibingwuitungli bichar saakha nali pheomikapai maleimana; kaja awuitungli bichar kasā eina nakhalatta yonngasakta lei, kachiwui vangkhala kaja bichar kasaa nanala awui tākam eina sāda lei.

²Hikathā kasābingli Varena bichar kasā chi mashunga kaji ithumna thei.

³O mikumo, nathumna hikathāthā hi nathum khalatta saakha Varewui bicharwui eina yāmshokpaira da phaninglā?

⁴ Maningakha awui mahāngkharar lukhamashan, khāngkhami kala ja̱khami chili nana matheikhamila? Vare hi lumashankathana kaji nathumna thei. Chiwui vang eina ana nathumli ningngateikhui ngasakngai.

⁵Kha nawui ning khamarar kala mangacheikhangai china Varewui malungkhavāt kala mashun bichar sāthanghon ritkhamei tandi samphang khavai nakhalatta kazipkakhui ngasāra.

⁶ Kaja Varena mi kachiva̱li kachichāwui otsak athishurda sāman mira.

⁷Mi kaikhava kaphā ot sāchingda lei, kathi makhavai kharing phai; athumli Varena katang makhavai kharing mira.

⁸Kha khamashungli manganāsangla tuikaili zangda makaphāli kazangbingli Varewui malungkhavāt khonshāt tāshungra.

⁹Makaphā kasā mi kachiva̱li kachotkachāng eina wukakhanang tāshungra. Jihudili rira kala Gentilebinglila tāshungra.

¹⁰Kha kaphā kasābingli Varena tekhamatei, khayākakā kala chingri kahai mira. Jihudibingli mirira kala Gentilebinglila mira.

¹¹ Khikhalajila Vare mijang mavaimana.

¹² Gentilebingva Moseswui ain kathā chi maleimana. Athumna morei sāda shimānhaiakha ain mazangla kashimāna. Kha Jihudibingva ain ngavai, chieina athumna morei saakha ain chiwui athishurda bichar sai,

¹³ kachiwui vangkhala kaja ain shāhaira kajiwui vang Varewui mangāli mashunghaira kaji maningmana, kha ainwui athishurda kasābing chili mashungkhamina.

¹⁴Ain makhalei yurbingna athum aningsasak eina ainna sāngasakkhangai athishurda zatsaakha athumwui vanga chi ainna.

¹⁵Athumwui ningli ain kapisanghaida lei kaji athumwui otsak eina chithei, kala athum khalatta yonkahaila, khamashungla phaningkakhui chieina hi mashunga da athumwui mashun-makhuina chitheimi.

¹⁶ Chiwui vang eina ina hāshokta khalei Paokaphā hiwui athishurda khanaowa zimiksholi Varena Jishu Khristawui mangā eina miwui wuklungli ngathum kahai saikora phongshoksera.

¹⁷Na kathā? Nakhalatta Jihudiniji; ainli chihāna kala Vareli nganaiya da langsoi.

¹⁸ Varena nali khi sāngasakngaikhala kaji na thei kala khamashung chi khikhala kaji kapangkhuithei khavai nana ainwui eina tamkhuihaira.

¹⁹Khangapeoawui thānkhamelaka, tangkhamangli khaleibingwui kahorna,

²⁰ mangkhama̱bingwui kachishutana kala naoshinaobingwui ojā akhana da khui. Awor kala khamashungli zangki kaji katonga chi ainli leihaira kaji nana theitita.

²¹ Nana kateili tamchithei, khisāda na khalattali matamchitheithu? Nana “maleepaimana” da hāshoka— kha na maleeli?

²²“Maphophāpaimana” da hānga— kha na maphophā? Nana meoma̱li ningkachai ji— kha na khorumshim mangaponzatli?

²³Nana Varewui ain singhaowa da langsoi— kha ain chi sākhaida Vareli makhayak ngasakmala?

²⁴ Hithada kapihaida lei, “Nathumwui vang eina Gentilebingwui ngachaili Varewui ming maishi ngasakhaira.”

²⁵ Nana ain mayonakha ahui rimkashokwui kankhanā lei, kha ain sākhaida leiakha ahui rimkashokna khikha kankhanā maleimana.

²⁶ Ahui marimkashoka mi akhana ainwui ningkhami chi mayonakha Varena ali ahui rimkashoka akha thada makhuimarala?

²⁷ Chiwui vang eina nathum Jihudibing, ain leilaga ahui rimshoka, laga ain sākakhaiwui vang nathumli ahui marimkashokbingna ngashimshira. Khiwui vangkhala kaja athumva phasāli ahui marimshokchaolala ain mayona.

²⁸ Chithākha kachangkhat ahui rimshok kahaia akachanga Jihudi chi khipākhala? Ayar kala phasāmāngli rimkashoka china Jihudi akachanga maningmana.

²⁹ Kha alungli kala ningli rimkashoka china Jihudi akachangana, kaja hi kapi kahai ainwui otsak maningla kha Manglāwui otsakna. Chieina hikathā kasā mi chili mikumona maningla kha Varena kaso samphangra.