Read Tangkhul Naga ROMNAO 4 Bible Online

ROMNAO 4 - Tangkhul Naga bible

ROMNAO 4

¹Chithākha, ishi yurwui avāva̱ Abrahamwui pongli khi hangsikhala? Awui theikakhui khimameikhala?

² Abrahamli awui otsakwui vang Varena mashungkhamina jisi kaja ana langsokapai lei, kha Varewui mangāli langsokapai maleimana.

³ Hithada kapihaida lei: “Abrahamna Vareli shitsanga kala chiwui vang ali khamashungana da shānkhui.”

⁴ Mi akhana ot sālaga samkaphang chi ali thada khami maningla kha ana samphang khangayi ngalangmanna.

⁵ Kha otsakli mayangla shitkasangli kachihānna kala khayonali mashungkhame Vareli shitkasanga mi chili mashungmi khavai awui shitkasang chi Varena shānkhuimi.

⁶Hithada sāda otsakwui vang maningla khamashungana da Varena khuisangmi kahaia mi chiwui sokhamiwui pongli Davidna kahāng chi hina:

⁷ “Khayon heomi kahaia kala morei farormi kahaia athum chi ringphai!

⁸Prohona morei mashānkhuikhamia athum chi ringphai!”

⁹Davidna hāngkahai sokhami tui chi ahui rimkashokmāngli kahānglā? Maningmana, ahui marimkashokbinglila kahāngna. “Abrahamna shitkasangwui vang Varena ali mashunga da shānkhui,” kaji ithumna hānghaira.

¹⁰Chithākha katharān ali khuisangmihaokhala? Chi ahui rimshok kahaiwui thilikā, mirimshokranglakhakhala? Chiya ahui rimshok kahaiwui thili maningla kha marimshokranglakhana.

¹¹ Ahui marimshokranglakha ana shitkasangwui vang khamashungana da khuisangkhami theikhavai ahui rimshoknao kajina. Chieina marimshoklala shitkasanga kala khamashungana da shānkhui kahaia athum saikorawui manglāwui pongli Abrahamna avāva̱na.

¹²Kala a hi amingmāng eina ahui rimshok kahaibingwuimāng maningla kha ithumwui avāva̱ Abrahamna ahui marimshokranglakha shitkasang thada shitkasangabing saikorawui avāva̱na.

¹³ Varena Abraham eina awui ara̱-azāli okathui hi athumwui ngasārada ngashitkhami hi ainwui mangā eina kharā maningmana, shitkasang khangarongwui vangna.

¹⁴ Ain khamayonabingna shimlui kāki kajina jisi kaja shitkasang chi makānnāmana kala tuingashit chi achona,

¹⁵ khikhalajila ain china Varewui malungkhavāt khuirai. Kha ain makhalei pamli chonkhamakān kaho maleimana.

¹⁶Chiwui vang eina tuingashit hi shitkasangli pheisin kasana. Chithada sāda tuingashit Varewui lukhamashan chi Abrahamwui ara̱-azāli khamina; hi ain khamayonabingwui vang maningla kha Abrahamwui thada shitkasanga mibingwui vangla zangda khamina.

¹⁷ Hithada kapihaida lei: “Ina nali yur kachungkhawui avāva̱ sāngasakhaira.” Chieina Abrahamna shitkasanga katheli ringkhangasaka kala khikha maleikasāwui eina semkhuikashapa Vare chiwui mangāli tuingashit chi phālak kahai otna.

¹⁸ Chihānkapai apong maleisālaklala Abrahamna Vareli shitsangda kachihānwui vang yur saikorawui avāva̱ ngasāhaowa, kaja ali hithada hānghaisai: “Nawui ara̱-azā sirā ngayara.”

¹⁹ Zingkum shākha kānanaihaoda phasā ngazanhailala kala Sarah naoshuma jilala awui shitkasang masuitāmana.

²⁰Ana Varewui tuingashitli shitkasang mangacheilakmana, kha Vareli masot mida awui shitkasang ngatarmamāna.

²¹Varena awui ngashit kahai chi sāshaplaka kaji ana shitsangchaowa.

²² Chiwui vang eina Varena Abrahamli khamashungana da shānkhui.

²³ Kha “Ali khamashungana da khuisangmi” kaji tui chi amāngwui vang kapi kahai maningmana.

²⁴Kha ithumwui Proho Jishuli kathiwui eina ringshok khangasaka Vareli shitkasang ithumlila khamashungabingna da shānkhuimira.

²⁵ Ithum moreiwui vang ali thingasaka kala mashungmi khavaiwui vang ringlui ngasaka.