Read Tangkhul Naga ROMNAO 5 Bible Online

ROMNAO 5 - Tangkhul Naga bible

ROMNAO 5

¹ Ara shitkasangwui mangā eina ithumli mashungmihaoda ithumwui Proho Jishu Khristawui mangā eina Vareli mashithaira.

² Shitkasangwui mangā eina arui ithumna Varewui lukhamashan lungli ringda khalei hi mazapyangda lei kala Varewui tekhamatei chi ithum samphangarumra kajiwui kachihānwui vang mathāna.

³ Chili lāngda ithumna kachotkachānglila ringphai, khikhalajila ithumna thei kaja kachotkachāngwui eina khāngkathei shoka,

⁴khāngkathei eina Varewui kapen, Varewui kapen eina kachihān shoka.

⁵ Kala kachihān hina ithumli kaphaning makai ngasakmana, kaja Varena ithumli thada khami Manglā Katharawui mangā eina awui leikashi chi ithumwui wuklungli heisangmihaira.

⁶Ithumna ngazankasa tharan, Varena retkahai atam chi horzakta Khristana morei kaphungbingwui vang thimi.

⁷Kachikathāna kaphā mi akhawui vang thimikashap leisālala, khipānakha khangaronga mi akhawui vanga mathimimana.

⁸ Kha Varena ithumli kayākha leishikhala kaji hina kaja ithumna morei phungda leilakha Khristana ithumwui vang thimi.

⁹ Chiwui vang eina ara awui thimalokhamiwui ashee china ithumli mashungmihaira; chithākha Varewui malungkhavāt chiwui eina ithumli ana kayākha mataida huimirakhala?

¹⁰ Kaja ithum Varewui yangkashe ngasāda leilakha, Anaomayarawui thikhami mangā eina Vareli ngashimi, langmeikharda ara ithum ali ngashimhaoda Khristawui kharing mirin china ithumli kayākha mataida huimirakhala!

¹¹ Chimāng maningmana, kha ithumwui Proho Jishu Khristawui mangā eina ngashimmihaoda ithum ringphai.

¹² Morei hi okathuili mi akhawui eina haophoka kala morei china kathi khuirai. Hithada sāda kathi hi mi saikorali rāshunghaowa, kachiwui vangkhala kaja mi kachiva̱na morei sāhaowa.

¹³Ain mamiranglakhawui eina morei hi okathuili leisai; kha ain maleisāthuda moreina kaji matheisāmana.

¹⁴ Adamwui eina thuilaga Moses tāshungda mi saikorawuitungli kathina mungsai, naoda rāki kaje chiwui amahā sāda khalei Adamna Varewui kakaso kakaiwui morei kasā thada morei makasaa athumwuitungli eina tangda mungsai.

¹⁵ Kha khani chi mangaraichāmana, kaja Varewui lemmet chi Adamwui morei mathāmana; kachiwui vangkhala kaja mi akhawui moreiwui vang mi kachungkha kathi samphanga kaji mashunga. Kha Varewui lukhamashan hiya chili hakmeikhara. Chithada sāda mi akha kaja, Jishu Khrista, chiwui lukhamashan mangā eina mi kachungkhali lemmet mi.

¹⁶ Varewui lemmet eina mi akhawui moreiwui athei chi ngateiya. Mi akhawui moreiwui vang eina “Khayon” kaho chi theikhui ngasaka, kala morei kachungkha sākahaiwui thili lemmet china mashungkhami khuirai.

¹⁷Mi akhawui moreiwui vang kathina mungsai kha Jishu Khristana sāmi kahai athei china kayākha hakmeikhala! Varewui makhavāta lukhamashan kala khamashung-khangarongwui lemmet samkaphanga athumna Jishu Khristawui mangā eina kharing samphangra.

¹⁸Mi akhana morei kasāwui vang mi saikorali yonngasak kahai thada, mi akhawui khamashung otsak china mi saikorali ningkhān kala kharing samphang ngasaka.

¹⁹ Kala mi akhawui kahāng makhanganāwui shongrān china mi kachungkhali morei kaphunga sākhangasak thada, mi akhawui kahāng khanganāwui athei china mi kachungkhali mashung ngasaka.

²⁰Ain khuikharā chi khayon-khamang chungsang khavaina; kha morei chungkasang eina Varewui lukhamashan chi lāngmeikharda chungsanga.

²¹ Moreina kathiwuilungli khamung thada, Jishu Khristawui mangā eina samkaphang Varewui lukhamashan china mashung ngasakta ithumli katang makhavai kharing miya.