Read Tangkhul Naga ROMNAO 6 Bible Online

ROMNAO 6 - Tangkhul Naga bible

ROMNAO 6

¹ Chithākha ithum khi hāngsikhala? Varewui lukhamashan chi chungsang khavai ithum moreilungli pamchingsilā?

² Maningphutmana! Ithum moreili thihaira, chithākha kathada chiwui lungli ringchingpairakhala?

³ Ithumna Jishu Khristali khangarumwui ra̱kahik kasā chitharan awui kathili khangarumwui ra̱kahik kasānada nathum matheimalā?

⁴ Chithada sāda ithumwui ra̱kahik chieina Khristali ngasoda chifarum kahaina kala awui kathi chili ngarumhaira. Avāva̱wui tekhamatei pangshap china ali kathiwui eina ringshok khangasak thada ithumla kadhara mirin chi ringpaira.

⁵ Ithumla awui kathi thada thihaogada awui tākam eina ringluira.

⁶ Ithumna thei kaja morei sākhangaiwui khangachā chi shimān khavai kachama khangachā chi Khristali ngasoda krushtungli thingasakhaira. Chieina ithum ara moreiwui rao masāluimana,

⁷ kachiwui vangkhala kaja mi akha thikahai tharan morei pangshapwui eina ningkhānhaira.

⁸ Ithumna Khristali ngasoda thihaogada ali ngasoda ringra kaji ithum shitsanga.

⁹ Ithumna thei kaja Khristali kathiwui eina ringngasakhaira kala mathiluilakmara, kathi kaho china awuitungli pangshap maleiluimana.

¹⁰Ana akhashida thihaogada moreina khiyangkha maleiluimana kala ana kharing hi Vareli ngasoda kharingna.

¹¹ Chithada sāda nathumla moreili thihailaga Khristawui mangā eina Varewuili ringda lei kaji phaningphalungra.

¹²Khamathangli zangda shimānkapai nathumwui phasā hi moreili mamungngasakalu.

¹³ Nathumwui phasā akai akhanida makaphā-makhayāli ya majihaialu. Kha kathiwui eina kharingli khuiung kahaia mi thada nathum khalatta Vareli milu kala nathumwui phasā katonga khamashung otwui vang shichin khavai Vareli mayālu.

¹⁴ Moreili nathumwui akhavā masāngasakphalungmara, kaja nathum ainwui azingli maleila lukhamashanwui azingli lei.

¹⁵ Chithākha khi sāusi? Ithum ainwui azingli maleila lukhamashanwui azingli leihaoda morei sausila? Maningphutmana!

¹⁶ Nathumna akhava akhawui rao sāga da mayāhaiakha awui kahāng khanganā rao sāga kaji maningmalā? Hithada sāda morei sākha kathili thānsangra, kahāng khanganāli zangakha nathumli mashungmira.

¹⁷Kha Vareli ningshi! Kaja nathum atam akhali moreiwui rao sāsālala ara nathumli mikahai tamkachitheiwui eina samkaphang khamashung chili nathumwui wuklung tongda mayāhaira.

¹⁸ Kala moreiwui eina ningkhān ngasakhaoda nathum khamashungwui rao ngasāhaira.

¹⁹ Nathumwui khangazan khaleiwui vang ina hikathā tuiyār eina kahāngna, kaja atam akhali nathumwui phasāwui akaibing chi makathara kala makaphā chiwui rao sāsai. Ara nathumwui phasāwui akaibing chi tharngasak khavaiwui vang khamashung khangarongwui rao thada nathum khalatta hamsangphalungra.

²⁰ Nathumna moreiwui rao sālakhava khamashungwui ot sāra kaji matheisāmana.

²¹ Ara nathumna khayākhamalā ot kasā chieina khi tongkazā samphangkhala? Otsakbing chiwui athei chiya kathina.

²²Kha ara nathumli moreiwui eina ningkhān ngasakhaida Varewui rao sāhaira. Chiwui tongkazā samkaphang chiya tharkhangasak china kala chiwui athei chiya katang makhavai kharing china.

²³ Kachiwui vangkhala kaja moreiwui sāman kathina, kha Varewui lemmet chiya ithumwui Proho Jishu Khristawui lungli katang makhavai kharing china.