Read Tangkhul Naga ROMNAO 7 Bible Online

ROMNAO 7 - Tangkhul Naga bible

ROMNAO 7

¹Ivānaongarā, ain katheia nathumli kahāngna kaja mi akhali ainna kakhalap hi a ringlakhamānga.

² Fathui kahai sha̱nao chili agahara mathiranglakha eina tangda gaharali pānrum khavai ainna khalappai, kha gahara chi thihaiakha ainna sha̱nao chili khalap kahai chiwui eina ningkhān ngasaka.

³Hithada sāda, sha̱nao china agahara ringlakha mayarnao khangatei akhali aleihaiakha, ali phokaphava̱ hora. Kha agahara thihaiakha ain chiwui eina chihomihaira, kala mayarnao khangatei akhali ra̱sa̱sālala phokaphā maningmana.

⁴ Chiwui vang eina ivānaongarā, nathumlila chipapama; kaja nathum Khristawui akai ngasāhaoda, ainwui athishurdava nathum thihaira, kha Varewui otram khangatha̱li kannāmei khavai ringkhaluiya Khristali ringrumda awui ngasāhaira.

⁵ Ithumna phasāwui athishurda ringlakha, moreiwui ningkachāng chi ain china mathuk ngasakta ithumwui phasā akaibingli ot kasā eina kathi shokngasaka.

⁶Atam akhali ainwui zurthingna khalaphaida thikasā chiwui eina ara ithumli khalāmihaira. Chieina kapi kahai ainwui athi mashurla kadhara Manglāwui pongli otram ngatha̱da lei.

⁷ Chithākha ithumna khi hāngra! Ain chi moreilā? Maningphutmana. Kha ain chi mamisasi kaja morei chi khikhala kaji matheisāmara. Ainli “Mangamarphāphaalu” da mahanghaisāsi kaja khangamar hi khikhala kaji I matheisāmara.

⁸ Kha morei china ain chi singlaga atam kachā samkaphang tharan iwui ningli khangamar ot saikora leikhavai mathuk ngasaka. Ain maleisāsi kaja morei hiya kathina.

⁹Atam akhali I ain mavaila okthuisai, kha ningkhami chi kharā eina morei ringluihaowa kala I thihaowa.

¹⁰ Kala kharing khuirāki kaje ningkhami china iwui vanga kathi khuikharā ngasahaowa.

¹¹Kachiwui vangkhala kaja morei china atam kachā samphangkhaleoda ningkhami chiwui mangā eina ili minamhaowa kala sāthathaowa.

¹² Chiwui vang eina ain khalattava tharra, kala ningkhami hi tharra, mashungna kala phai.

¹³Chithākha hiwui kakhalatva kaphā china ili thingasakhaowa kajilā? Maningphutmana! Chi moreinana, morei china awui kachangkhat khangachā chi phongshok khavai kaphā kaho chi singlaga ili thingasaka kala chiwui mangā eina hāngkhavai makhalei morei sāngasaka.

¹⁴ Ithumna thei kaja ain hi manglārinwuina, kha iya phasā khavaiya moreili yorsang kahaiya raona.

¹⁵ Ina kasā chi I khalattana bhap matāmana kaja ina sākhangai ot chi ina masāmana kha ina ningkakachai ot chi sai.

¹⁶Ina masākhangai chi ina kasā tharan ain chi mashunga kaji khamayā thāhaowa.

¹⁷Chieina hikathā kasā chi I maningmana kha iwui lungli khalei morei china kasāna.

¹⁸Ina thei kaja iwuklungli chiya mikumowui khangachā chili kaphā kaho maleimana. Kaja khamashung chi sāngailala masārarmana,

¹⁹kaphāna da theida sāngailak kahai chi ina masāmana, kha maphāmana da theilala chi ina sai.

²⁰Ina maningkachāng chi ina saakha; sāda khalei chi I maningluimana kha ili khalei morei chinana.

²¹Ina kaphā sākhangai tharan makaphā chila nganailak eina leisāching kaji hi ina ain thada samphanga.

²² Varewui ain chi iwuklungli ningyāng unglaka.

²³ Kha iphasāli ot kasā ain khangatei akhala thei— iwui ningna mayā kahai ain chili khangararra ain china iphasāli ot sāda khalei moreiwui ain china ili narkahaina.

²⁴ I kayākha kakhanang mikhala! phasāthit hiwui eina ili khipāna kanmishaprakhala?

²⁵Ithumwui Proho Jishu Khristawui mangā eina Vareli ningshi! Chieina ina iwui ning eina Varewui ainli otram ngatha̱sālala iwui mikumowui khangachānava moreiwui ainli otram ngatha̱da lei.