Read Tangkhul Naga ROMNAO 8 Bible Online

ROMNAO 8 - Tangkhul Naga bible

ROMNAO 8

¹ Ara Khrista Jishuli ngasoda kharing athumli mayonshinamluimara.

² Kaja Khrista Jishuwui lungli ithumli kharing khame Manglāwui ain china moreiwui kala kathiwui eina ili ningkhān ngasakhaira.

³ Mikumowui phasāna ngazanhaoda ainna masākharar chi Varena sāshapa, chiya Varena Anaomayarali morei shimitmi khavai mikumowui khangachā chi khuingasakta chihorai, kala mikumowui khangachāli khalei morei chi Varena mamayāmana.

⁴ Varena hi kasā hiya mikumowui khangachā athishurda mazatla Manglāwui athishurda kazata ithumna ainwui khamashung ningkachāng chi ungshung ngasak khavaina.

⁵ Kaja phasāwui athishurda kharinga athumna phasāwui otmāngli ningsanga; kha Manglāwui athishurda kharinga athumna Manglāwui otmāngli ningsanga.

⁶ Phasāwui athishurda zatakha thira, kha Manglāwui athishurda zatakha chingri kahai kala kharing samphangra.

⁷Kaja phasāwui athishurda kazata mi chiya Vareli yangkashena; ana Varewui ain mashurmana, kasāla masārarmana,

⁸ phasāwui athishurda kazata athumna Vareli ningyāng maung ngasakrarmana.

⁹ Kha Varewui Manglāna nathumwui wuklungli kachangkhat eina zangda leiakha, nathumna phasāwui ot hi mashurla Manglāwui athishurda lei. Kachikathāna Khristawui Manglā chi maleiakha a Khristawui maningmana.

¹⁰ Kha Khristana nathumli leiakha, moreiwui vang nathumwui phasā thihailala mashungkhamiwui vang eina nathumwui manglā ringda lei.

¹¹ Jishuli ringlui khangasaka Varewui Manglā china nathumwui lungli leiakha, Khrista Jishuli kathiwui eina ringkhangasaka kala nathumwui lungli leiching kaje awui Manglā china nathumwui shimānkapai phasā chi ringngasakra.

¹²Chiwui vang eina ivānaongarā, ithumna sākhangayi lei, kha chi ithumwui phasāna ningkachāng thada ringki kaji maningmana.

¹³ Kaja nathumna phasāwui athishurda ringakha nathum thira. Kha Manglāwui mangā eina phasāwui otsak chi chithithaiakha ringra.

¹⁴ Varewui Manglāna thankhami athum saikora Varewui naongarāna.

¹⁵ Kaja Varena mikahai Manglā china nathumli rao masāngasakmana kala mangachee ngasakmana; kha Varewui naongarā sāngasaka kala Manglā chiwui pangshap eina ithumna Vareli “Abba” Ishava! da khangakaona.

¹⁶ Ithum Varewui naongarāna da chithei khavai Manglā china ithumwui manglāli ngaruma.

¹⁷ Ithum Varewui naongarā sāhaogada, awui shimluikatbingna samphangrānwui sokhami chi samphangra kala ithum Khristawui kachotkachāng phungrumakha tekhamatei yar chila samphangrumra.

¹⁸ Ina chukmaja̱ya kaja aruihon ithumna samphangda khalei kachotkachāng hiya naoda phongshoki kaji tekhamatei chili pāntamkapai maleimana.

¹⁹ Kaja sākahai saikorana Varewui naongarāna da phongkashok chi ngaraida lei.

²⁰ Kaja sākahai saikora chili khayon mida arema ngasā ngasakhaowa, hi sākahaia chiwui ningkachāng maningla kha kasaa Varena chitharanu da ningmi kahaina. Chithālala chili kachihān leisai.

²¹ Chiya thangkha mathangkha sakahaiya khalatta shimānphalungki kajiwui eina ningkhān ngasakra kala Varewui naobingli matakhak kahai ningkhān samphang khangasak chi samphangrumra.

²² Sākhui kahai ot saikorana aja rāshungda nao khara̱wui kachot thada ringāda lei kaji ithumna thei.

²³ Sākhui kahai katongamāng maningla kha ithum Manglāwui athei samphangkhare, Varena awui naongarā sāngasak khavai kala ithumwui kharing-kharak saikora ningkhān ngasak khavai ngaraida khaleia ithumla ringāda lei.

²⁴ Kaja kachihān chiwui vang ithumli huimihaira. Kha kachihān chi ithumna mik eina theihaosi kaja chi kachangkhat kachihān maningmana. Kaja theikahai chili khipāna kachihān leikhala?

²⁵Kha ithumna makathei chili chihanakha chiwui vang ithumna khāngda ngaraipama.

²⁶Chithada sāda Manglā chinala ithumwui makharar chili rāngachona, kaja ithumna kathada seihā sarakhala kaji eina tangda matheimana, kha Manglāna kayākha chotta ithumwui vang pomikhala kaji khamor eina mahāngrarmana,

²⁷kala mibingwui wuklung katheia Varena manglā chiwui kaphaning khikhala kaji thei, Manglā china Varewui ningkachāng athishurda katharabingwui vang pomida lei.

²⁸Ithumna thei kaja Varena awui kharin leida hokhui kahaia ali leikashebingli ana ot saikorali kaphā sārumchinga.

²⁹ Chinaongarā kachungkhawui ngachaili Anaomayarana naochizai ngasāngasak khavai Varena kapangping kahaibing chi Anaomayarali ngarui ngasak khavai phaishokhaira, kala Anaomayarana naongarā chiwui naochizai sāra.

³⁰Chithada sāda Varena kapangkhui kahaibing chili hokhui kala hokakhuibing chili ana mashungmi, kala athumli awui tekhamatei samphangrum ngasaka.

³¹ Chithākha ithumna hili khi hāngluira? Vare hi ithumwuina jiakha khipāna ithumli yangshirarra?

³² Anaomayarali mashivāmla ithum saikorawui vang chigatmiakha ithumli ot saikora khalem eina mamimaralā?

³³ Varena kapang kahaibingli khipāna khayon mirakhala? Athumli Varena mashungmi kahaina.

³⁴ Kachikathāna ithumli yonna da hangshapralā? Thimihailaga ringshok kahaia Varewui yāvāk pamda ithumwui vang pomida khalei Khrista Jishunala khayon mamimara.

³⁵Chithākha ithumli khipāna Khristawui leikashi chi eina ngatei ngasakshaprakhala? Kachotkachāngnakā, ringkashinakā, rekakhareknakā, chāmreinakā, ka̱lā kashinakā, raighainakhala?

³⁶ Hithada kapihaida lei; “Nawui vang eina atam kachida kathiwui ka̱lāshatli leichinga; Taithatki kaje yaonao thada ithumli khui.”

³⁷ Maningmana, ithumli leikashe awui mangā eina ot saikorali ithum khayuiana.

³⁸Kaja kathinala, kharingnala, kazingraonala, khangam khareinala, shokta khalei otnala, shokki kaji otnala, pangshapnala,

³⁹okathuiwui atungnala, azingnala, sākahai saikora hiwui khikhikhanala Khrista Jishu ithumwui Prohowui alungli khalei Varewui leikashi chiwui eina mangateithui ngasakrarmara.