Read Tangkhul Naga 1 CORINTHNAO 13 Bible Online

1 CORINTHNAO 13 - Tangkhul Naga bible

1 CORINTHNAO 13

¹ Ina mikumowui kala kazingraowui tuiyur eina matuilala, leikashi maleiakha kāntā kashao kala kortar kakating kathāna.

² Ina phongkhamiwui pangshap leilala, matheikharar khangathuma matakhak kahai kala awor saikora theishingkhuishaplala, kala shitkasang tongtinghaida kaphung khāngthuishaplala, leikashi maleiakha I khikha maningmana.

³Ina iwui khalalei miserhailala kala iphasā eina tangda meili chichothailala, leikashi maleiakha I khikha matongkhuimana.

⁴Leikashina ningzingharingthei kala lumashanthei; leikashina mikpaikashi kala khalatkaso mavaimana,

⁵ khayāning manganingmana kala achei-arei makathei otsak masāmana; khalattawui vang maphaningmana; kateili malungmavāt ngasakmana lah malungla mavātmana;

⁶khalāng otli mamathānmana, kha khamashungli mathāna.

⁷ Leikashina ot saikora phungmi; saikora shitsanga, saikora chihāna; saikora ja̱mi.

⁸Leikashi hi katang makhavaiana. Khamarānla shimānhaora; tuiyur khamatuila ngasāmhaora; theithangkhameila shimānhaora.

⁹Kaja ithumli mikahai lemmet, theithangkhameila, khamarānla ngakaingakāsera;

¹⁰kha kākashunga chi kharā chitharan makākashung chi shimānhaora.

¹¹Ina nganuilakha naoshinao thada matui, naoshinaowui ningphanin eina phaninga, naoshinao thada machuka; Ina rarkahai eina naoshinaowui acham chi horhaowa.

¹²Khikhalajila arui ithumna ka̱lāra̱ngayotli mamachā eina thei, kha chiwui thili mai eina mai theira. Arui ina ngakai-ngakāda katheimaya; kha chiwui thili ana ili theishingkhui kahai thada inala ali theishingkhuira.

¹³Chieina shitkasang, kachihān, kala leikashi; kathum hi leichinga: kala chiwui ngachaili leikashina mataimeikapa.