Read Tangkhul Naga 1 CORINTHNAO 14 Bible Online

1 CORINTHNAO 14 - Tangkhul Naga bible

1 CORINTHNAO 14

¹Leikashi hi nathumwui kharin ngasā ngasaklu. Manglāna khami lemmetbingwui ngachaili mataimeikapta marānkhami chili kahaolu.

²Tuiyur khamatuia chi mikumoli maningla Vareli khamatuina, kaja khipānakha awui tui chi matheirarmana. Kha Varewui kathuka tui chi Manglāwui pangshapna matui khangasakna.

³Chithā-ilala phongkhami chiya mibingli tamkachitheina kala athumli khangachon, kakatom kala ringphāmei, mathānmei khavai kasāna.

⁴Tuiyur khamatuia chiya akhalatta katheimaya, kha phongkhami chiya church katongali ngachonmi.

⁵Nathum saikorali tuiyur khangatei matui ngasakngai kha phongkhami lemmet khaleia sāngasakngaimei. Kaja tuiyur khamatui chi khalatkhame maleiakha church katongawui vang kānkhanā maleimana.

⁶Ivānaobing, ina nathumli tuiyur eina rāmatuida nathumna iwui eina kānkhanā samphangrala? Varena phongkhami awor pao hākashok kala tamkachithei hibing hi ina makhuirāsāsi kaja nathumna kateokhala kānkhanā masamphangmara.

⁷Manglā makhangavā sipa̱, tingteilā kathā eina tangda kachui khanem akhon mathālak eina makhongakha khilaa kasākhala kaji khipāna theira?

⁸Kala talla̱ kakhongana mi khangahotwui talla̱khon mathālak eina makhongakha raili vāusa kajina da khipāna theira?

⁹Chithada sāda tuiyur eina khamatui chi shenglak eina mashākhuiakha khipāna theirakhala? Matuiphāphā khanganao thāhaora.

¹⁰Okathuili tuiyur kachungkha lei kha kakhalat makhalei tuiyur akhala maleimana:

¹¹Ina makashā tui eina mi akhana rāngazekakha a kha̱minao thāhaowa, kala awui vang ila kha̱minao thāhaowa.

¹²Nathumna Manglāwui lemmet samphangngaihaogada, ot saikorawuitungli phāmeikap kaje church sākakāli khangachona lemmetbing chi shichinlu.

¹³Tuiyur khamatuia china kakhalat mathālak eina meikhaimishap khavai seihā sālu.

¹⁴Kaja chikathā tuiyur eina ina seihā sākha imanglāna seihā sai kha iwui ningva chili maleimana.

¹⁵ Chithākha ina khi sāra? Ina imanglā eina seihā sāra, ining einala sāra; imanglā eina laa sāra, ining einala laa sāra.

¹⁶ Nana Vareli ningkashiwui seihā kasāli manglāmāng eina sākha, khokharumli kazanga mibing china kathada nawui seihā kasāli “Amen” sāngrakhala? Kaja nana seihā kasā chi kateina bhap matāmana.

¹⁷Nana mathālak eina seihā sālala kateiwui vang khikha khangachon maleimana.

¹⁸Nathum saikorali ina tuiyur chungmeida khamatuiwui vang Vareli ningshi.

¹⁹Kha churchwui khokharumliva tuiyurwui eina tuikhur thingthing hāngkhui kajiwui vanga theikhuikapai tuikhur phangāmāng kahāngna phāmei.

²⁰ Ivānaobing nathumwui chukhamja̱li naoshinao mathaalu. Makaphā otli angangnao thada sālu kha chukhamaja̱li khararnao thada sālu.

²¹ Hithada kapihaida lei: “Ngateihang kahai tuiyur khamatuia mibing kala ngalei khangateiwui mibingwui morchai eina ina iwui mibingli matuira, chithālala athumna ili manganāsangmara da Prohona hānga.”

²²Chiwui vang eina tuiyur khamatui hi shitkasangbingwui vang maningla mashitkasangbingwui machutkhui khavaina. Kha Varewui phongkhami hiya mashitkasangbingwui vang maningla shitkasangbingwui machutkhui khavaina.

²³Chithākha church katongana kaziplakha saikorana tuiyur ngatateida matuiakha ayarwui mibingna kala mashitkasangbingna rāyanglaga kapāna majimarala?

²⁴Kha mi kachiva̱na phongsi kaje mashitkasangbingna kala ayarwui mina kashā samphanglaga awui morei phaningkhui ngasakra. Ana shākakhui china ali bichar sāra.

²⁵Awui ngathum kahai kaphaning chi phongyānghaora, kala kui mashungzangda Vareli khorumra kala “Kachangkhat Varena nathumli ngasoda lei” da ana hāngphatra.

²⁶ Ivānaobing, nathumna kakazip chitharan kaikhana laa sai, kaikhana tamchithei, kaikhana phongmi, kaikhana tuiyur matui kala khangatei kaikhana khalatmi jiakha ithumna khi hāngusi! Kha kasāsā kachiva̱ china church ngashim khavai sālu.

²⁷Kachikathāna tuiyur matuiki kaji leiakha khani kathumli malāngaranu, kala ava̱va̱na matuida khangatei akhana meikhaimiranu.

²⁸Kha tui chi meikhaimishapa maleisaakha churchlungli kasaikha pamda a khalattali kala Vareli ngazekranu.

²⁹Varewui pao samkaphanga mi khani kathumna matuiranu kala athumna kahāng chi kateibingna machukranu.

³⁰Kha pamda khaleia akhana Varewui eina pao samphangakha matuikasāpā chi ngasāmhaoranu.

³¹Nathum saikora ngatakta matuisera, chithada tamkhui ngarokta kasatsang ngarokra.

³²Marānbingwui manglā chi marānbingna kasingna.

³³Kaja Vare hi pa̱khangapāwui Vare maningmana, kha chingri kahaiwuina. Katharabingwui church saikorali kasā thada

³⁴ sha̱naobingna khokharumli kasaikha pamranu. Ainli hāngkahai thada athum mamatuipaimana, kha khangachona sāda pamranu.

³⁵Athumna theikhangai leiakha gahara ngarāli shimli ngahānranu. Sha̱naona churchlungli khamatui kakhayak otna.

³⁶Varewui tui chi nathumwui eina kharāla? Chi maningakha nathummāngli kharāla?

³⁷Kachikathā akhana a paokazata akhana kala manglāli khangaphuma mina da phaningakha ina nathumli kakapi hi Varewui ningkhamina da ana theiphalungra.

³⁸Kha ana hi khikha maningmana jiakha alila khikha maningmana jilu.

³⁹Chieina ivānaobing, Varewui pao hākashokli ningsanglu; chithālala tuiyur khamatuibingli mahaphailu.

⁴⁰Ot saikora achei-arei theilak eina kala ayat unglak eina sāphalungra.