Read Tangkhul Naga 1 CORINTHNAO 16 Bible Online

1 CORINTHNAO 16 - Tangkhul Naga bible

1 CORINTHNAO 16

¹ Judea ngaleili khalei katharabingli ngachon khavai pheisā khangashaiwui pongli iwui ngahankakā hina; ina Galatiawui churchbingli kaso kahai chithada nathumla sālu.

² Haptā kachiva̱wui kharethang kachichāwui mikashap chi phaishokhaolu, chithākha I kharā tharan mangashailuimara.

³ I kharā tharan nathumna kapang kahaia mibing chili kachitheiwui chithi kapisangmira kala nathumna ngashaikhui kahai lan chi Jerusalemli khuivāmi khavai chihovāra.

⁴Kala I khavā phāmeira jiakha athum ili ngasovāpaira.

⁵ Ina Macedoniashong vāhailaga nathumwuili rānaora, kaja Macedoniashong vāki kaji leili.

⁶Ina nathumli sangda ngasopamngai, sikachāng peilapai; chieina iwui kha̱ramvātli nathumna ngachonmipaira.

⁷ Ina khamakān atamli kasha̱khamang samkaphang chi masāngaimana. Prohona mayāmiakha sāngmeida ngasopamngai.

⁸ Kha Pentecost phanit eina tangda Ephesusli pamra.

⁹ Hili ili khangasunga mi kachungkha leilala khamathā ot sapai khavai khamong mashālak eina shomihaira.

¹⁰ Nathumwuili Timothy rarasaakha mathānthathup samphangmilu, khikhalajila ina kasā thada ana Prohowui ot sāda lei.

¹¹Khipānakha ali mashitkasang masaalu. Kha awui kazazatli mahapkhano khavai ngachonmida iwuili hanung ngasakmilu, kaja ā avānaobingli ngasoungra da honda lei.

¹² Ivānao Apolloswui vanga, avānao khangateibingli ngasoda nathumwuili rākhavai panglāk eina hānghaira. Kha aruicham khavā maphāmara da phaninga. Atam kachā tharan rārāsāra.

¹³ Ning ngasharlu, shitkasangli nganingtitlu, pingda pangda sālu.

¹⁴Ot saikora leikashi eina sālu.

¹⁵Ara, ivānaobing, nathumna thei kaja Achaiali Stephanas eina awui shimkhur hi shitsangkhareli zanga, ashi hi katharabingli ngachonmikatheia shimkhurna.

¹⁶Ivānaobing, hikathā mibingwui kathān kala athumli ngasoda otsakruma kala otram ngatha̱kharuma athumwui thi shurkhavai kapona.

¹⁷Stephanas, Fortunatus, kala Achaicuslong kharāwui vang ringphālaka. Athumli kathei nathumli kathei thai.

¹⁸Nathumwui ning ringphā khangasak thada ilila ringphā ngasaka; hikathā mibingli songayi.

¹⁹ Asiawui katharabingna nathumli shālam chiphunli. Aquila eina Priscana Khristawui mingli shālam chiphunli

²⁰ Hili khalei ivānao saikoranala shālam chiphunli. Shimkhurwui leikashi thada nathum akha eina akha leishi ngaroklu.

²¹ Ipāng eina hi kagapina: Paulna shālam mili.

²² Proholi maleikashe mi khonkashi ngasāranu! Ithumwui Proho rāmilu!

²³ Proho Jishuwui lukhamashan chi nathumli ngasomiranu.

²⁴Khrista Jishuwui mangā eina iwui leikashi nathum saikorali leichingranu.