Read Tangkhul Naga 1 CORINTHNAO 5 Bible Online

1 CORINTHNAO 5 - Tangkhul Naga bible

1 CORINTHNAO 5

¹ Mashitkasanga miyurbing eina tangdala makasā khamathang-khamarang ot chi nathumwui ngachaili kaikhana sādalei kaji kachangkhat shāhaira. Kaja kachikathā mina ava̱gatuili ngakuma da hānga.

²Laga nathum khalatta langsoli! Chiwui vang nathum sifada khanangphalungra kala chikathā miliva yaruiwui eina kashamhaiphalungra.

³ Iphasāna nathumwui eina katāva̱li leisālala nathumli manglā eina ngasopamda lei kala nathumli ngasokapam thada khangachee khangachā ot kasā mi chiwuitungli ithumwui Proho Jishuwui ming singda ina khak tāmihaira.

⁴ Nathumna Proho Jishuwui mingli kazip khangarum tharan iwui manglāla nathumli kaziprumda ithumwui lungli khalei Proho Jishuwui pangshap eina,

⁵ hikathā mili phasā shimān khavai chipeeli horsangmira, chithākha Prohowui Zimiksholi amanglā huikakhui samphangra.

⁶ Nathum malāngsongayimana. Hithada chānjam hāngkahai nathumna thei, “Khawok kateokha china khamuitang katonga kapchung ngasakshapa.”

⁷Nathumwui kachama morei saikora horhaolu, chithākha nathum tharchaohaora. Na khawok makazangana, kaja ara nathumwui makānkhami phanitwui khangarān kuphaira kala makānkhami yaonao Khristali pha̱phayāmihaira.

⁸ Chiwui vang eina ithumna phanit khamayon tharan, khawok kazanga khamui thada makaphā-makhayā eina mamayonasa, kha khawok makazanga thada ningkathar kala khamashung eina mayonsa.

⁹ Ina kapi kahai chithi chili khamathang-khamarang mibingli mangaso khavai nathumli hānghaira.

¹⁰ Arui ina hāngda khalei hiya shāmkasā, khangamar, phama̱kashao kala ama̱li khokharummabingli mangasoalu kaji maningmana. Athumli kahāngna jisi kaja okathui hili nathum mapanpaisāmara.

¹¹ Kha ina kahāngpāva, chinaongarāwui aming ngakhumlaga shāmsākazat, khangamar, ama̱li kapha̱, khamashāt, khamarip kala phama̱kashao athum chili ot masakrumalu kala phakazāla maphazārumalu kajina.

¹² Khikhalajila ayarli khaleibingli ina bichar sākhavai maleimana; Varena bichar sāra. Kha churchwui alungli khaleibingli nathumna bichar masāngayimalā?

¹³ Hithada kapihaida lei, “Makaphā mi chili nathumwui eina khuishokhaolu.”