Read Tangkhul Naga 1 CORINTHNAO 9 Bible Online

1 CORINTHNAO 9 - Tangkhul Naga bible

1 CORINTHNAO 9

¹ Ningkhānwui mi maningmalā? I paokazata akha maningmalā? Ithumwui Proho Jishuli I matheimalā? Kala nathum hi ina Prohowui vang ot kasā chiwui athei maningmalā?

²Mi khangateibingwui vang paokazata maningsālala, nathumwui vanga I hi paokazatana; khikhalajila nathumna Prohowui mingli kharing china I paokazatana kajiwui machutna.

³Ili mibingna phenphāphā kaji tharan iwui ngahānkakā chi hina.

⁴ Iwui ot kasāwui vang I kashakazā masamphangngayimalā?

⁵ Khangatei paokazatbing kala Prohowui agato ngarā kala Peterlongwui thada ithumla preiva̱ thānkaphungwui mashun maleimalā?

⁶ Maningakha ringkhavaiwui vang ot kasā hi Barnabas inimangmala?

⁷Kachikathāna raimiwui lungli khalattawui lan shichinlaga shipai sālā? Drakhā yāmgui sālaga chiwui athei makashai khipā leikhala? Seikahoma khipāna awui seina̱ makhamang leikhala?

⁸Hi ina mikumowui ningngai eina kahānglā? Ainnala hi tākam eina mahāngmalā?

⁹ Khikhalajila Moseswui Ainli hithada kapihai, “Mukvāna mā naida leilakha akhamor makhalaphaialu.” Varena mukvāmāngli phaningmila?

¹⁰ Ithumwui vangla kahāng maningmalā? Chi ithumwui vang kapi kahaina: lui khavaala, kahātala heithei chi awui yar samphangra da chihānda sāphalungra.

¹¹ Ithumna nathumli manglāwui athā yaosanghaira. Nathumwui eina ithumna phasāwui kankhanā samphangakha chi marnāhaola?

¹² Kateibingna nathumwui eina samphangngayiya da chihānakha ithumna mataimeida masamphang ngayimalā? Chithālala ithumna hikathā samphang khangayi mapolakmana, kha Khristawui paokaphā chiwui pongli mahapkhano khavai ithumna ot saikora phungrāhaira.

¹³ khorumshimli otram khangatha̱ athum china khorumshimwui eina kashakazā samphanga kala hanphutpamli otram khangatha̱ athum chinala kachigat chiwui eina athumwui yar samphanga da nathumna thei.

¹⁴ Chithada sāda, paokaphā hākashok athum china paokaphā chiwui eina kashakazā samphangra da Prohona ningmihai.

¹⁵ Kha ina hikathā samphang khavai masālakmana kala samphang khavai kakapila maningmana. Kaja iwui langsokhangayi khalei chi kachikathāna arema sāngasaki kajiwui vanga thikahai phāmei.

¹⁶Ina paokaphā hāshokhaowa kajiwui vang malangsomana. Chi sākhavai ili ningmi kahaina. Ina paokaphā mahāshokakha kayākha khangachee otkhala!

¹⁷ Ina iwui ningkachāng athishurda ot kasāsi kaja iwui ngalangman samphangra; kha hi iwui sāran otna da kasāna. Khiwui vangkhala kaja Varena ot hi ili horsangmi kahaina.

¹⁸ Thākha, iwui ngalangman khi leikhala? Aman makhuila paokaphā tamkachithei hi iwui khamahaina, paokaphāwui vang iwui yar mapomana.

¹⁹I khipākhawui rao maningla ningkhān mina, kha mi kachungkha yuikhuipai khavai I khalatta mi saikorawui rao sai.

²⁰ Jihudibingli yuikhui khavai athumwui ngachaili Jihudi akha thada sai, ainwui azingli khaleibingli yuikhui khavai I khalatta ainwui azingli maleilala ainwui azingli khalei thada sai.

²¹ Chi tākam eina ina Gentilebingli sakkharum tharan, athumli yuikhui khavai Jihudiwui ain azingli maleila athum tākam eina sai. Hi kasā eina I Varewui ain mamayonmana kaji maningmana; kachangkhat I Khristawui ain azingli lei.

²² Shitkasang khangazanbingwui ngachaili athumli yuikhui khavai ila athum akha thada khangazana ngasāhaowa, chithada sāda apong aning-anangva̱ eina athum kaikhali huikhui khavai ina mi kachiva̱li athum thada ngasotheisera.

²³Ina paokaphāwui sokhami chi mi saikorali mishap khavai ot saikora hi kasāna.

²⁴ Shongzā khangakhuili mi kachungkhana ngasāma, kha mi akhamāngna sāman samphanga kaji nathum matheimalā?

²⁵ Khangareo mi kachiva̱na shimānhaoki kaji wonrui chiwui vang angarak tāzak eina mayona; kha ithumva kashimān kaho mavaiki kaje chiwui vangna.

²⁶Chiwui vang eina ina kharin maleila ngakhuizatphāphā kaji maningmana kala khamasaili shirphāphā kaji maningmana.

²⁷Mi kateili khangahān chili rāzang khavai ngahot kahaia ili makhalanshokhai khavai ina iwui phasā hi makang ngasaka.