Read Tangkhul Naga 2 CORINTHNAO 1 Bible Online

2 CORINTHNAO 1 - Tangkhul Naga bible

2 CORINTHNAO 1

¹ Varivarawui ningkachāng athishurda Khrista Jishuwui paokazata ngasā kahaia Paul eina avānao Timothyna Corinthli khalei Varewui church kala Achaiali khalei Varewui mibing saikorali kagapina.

² Ithumwui Avāva̱ Varivara kala Proho Jishu Khristana nathumli lukhamashan kala chingri kahai tāshungmiranu.

³ Ngachonmiching kaje Vare, lumashankatha Avāva̱ kala ithumwui Proho Jishu Khristawui Avāva̱li ningshisa.

⁴ Ana ithumwui kachotkachāngli ringphā ngasakmi, chiwui vang eina ithumli Varena ringpha khangasak chi tākam eina ithumnala kakhanang samkaphanga athum chili ringpha ngasakmishapa.

⁵Khristawui kakhanang tarākha ithumla phungkhangarum chithada Khristawui mangā eina ringkaphālila kachungkha ringphāruma.

⁶Ithumna kachotkachāng samphangakha chi nathumli ngachon khavai kala kahui samphang khavaina. Ithumli ngachonmihaiakha nathumli ngachonmi kahaina kala ithumna kachotkachāng khāngkahai tākam eina nathumla khāngthei khavai pangshap mihaira.

⁷Ithumna nathumli kachihān chi mangacheilakmana; kaja nathumna ithumli kakhanang phungkharum thada ringkaphālila mathānruma kaji ithumna thei.

⁸Ivānaobing, Asiali ithumna kachotkachāng samkaphang chi nathumli phaningung ngasakngai. Ithumwuitungli parkahai kachotkachāng chi haknai; kala ritnāhaoda ithum ringrada machihānsāmana.

⁹Shaothat khavai hukum mihao-eili da phaningsai; kha otshot chi ithum khalattali machihānla katheli ringkhangasaka Vareli chihānthei khavai ngasāsai.

¹⁰Chiyakha ka̱lākashiwui eina ana kanshokmi, ana kanmiluira kala ana kanmichingra kaji ithumna chihāntitta lei.

¹¹Nathumna ithumwui vang seihāsak eina ngachonmi. Chithada sāda ithumwui vang seihā sāmi kahai saikora ngahānkāmira kala Varena ithumli somira, kala mi kachungkhana ithumwui vang Vareli ningshira.

¹²Mikumowui thangkhameina maningla Varewui lukhamashanwui pangshap eina ithumna okathui hili mataimeikapta nathum eina ithumwui khangashik hi Varena khami ningkhakasā kala ningkathar eina munga kaji hi ithumwui mashun-makhuina chitheikhamiwui vang ithumna langsoi.

¹³Nathumna pākhuishapki kaji kala theishingkhuishapki kajimāng ithumna kagapina

¹⁴Kha nathumna ithumli teomeikha bhap tākahai thada, naoda nathumla bhap tāserhaora da phaninga, chieina ithumwui Proho Jishuwui Zimiksholi ithumna nathumwui vang lāngsokapai thada nathumna ithumwui vang eina lāngsopaira.

¹⁵Ina hi theishingkakhuiwui vang nathumwuili rāri khavai phaningsai, chi nathum ringphāmei mahaimei khavaina.

¹⁶Judea khavāli nathumwui khangachon samphang khavai ina Macedoniali khavāshongla, khaungshongla nathumli rāsamphang khavai phaningda lei.

¹⁷Iwui khangarān hi ngacheizarnai da phaningla? Kala okathui ot kasā thada “Ya” jikhashi “Ngga” jikhashi kaji thada phaningla?

¹⁸Varena khamashung tui khamatui thada, ina nathumli “Ninglapai” “Maninglapai” kaji tui mahānglakmana.

¹⁹ Silvanusna nilala, Timothyna nilala, ina nilala tamchitheida khalei Varewui Naomayara Jishu Khrista hiya “Ninglapai” “Maninglapai” kaji maningmana. Kha awuili Varewui “Ninga” kaji lei.

²⁰ Kaja Varewui ngashit kahahaili “Ninga” kaje chi ana. Chiwui vang eina Vareli tekmatei khavai Jishu Khristawui mingli ithumna “Amen” kajina.

²¹Nathum ithum Khristali okthuirum khavai Varena kasāna.

²²Ana ithumli mahor nammihaira kala naodala sokhami mira kajiwui khudam sāda ithumwui wuklungli Manglā Kathara sangmida ngashitmihaira.

²³Vare iwui shākhina, chiya nathumli masheikhautkhangaiwui vang ina Corinthli makharāna.

²⁴Nathumna khili shitsangrakhala da hāngchithei khavai kasā maningmana; nathumwui shitkasang ngatarda lei kaji thei. Nathumwui ringphā khavai ithumna sakkharumaya.