Read Tangkhul Naga 2 CORINTHNAO 10 Bible Online

2 CORINTHNAO 10 - Tangkhul Naga bible

2 CORINTHNAO 10

¹ Ngasopamlakha nimsorhai, tāda pamakha sāshilak kaje Paul, ina Khristawui khanim kala khangahui eina nathumli kapona.

² Ina nathumli kharā tharan sāshida sākhavai tandi masāmialu; kaja ithumna okathuiwui ningphun-ningrin eina sāda lei da kahāngbing chili ina sāshilak eina sāshapa.

³Mha, ithum okathuili pamda lei kha okathuiwui ningphun-ningrin eina mangararmana.

⁴Khangarar hili ithumna kasing khutlai hi okathuiwui khutlai maningmana; kha raipan sakhaishapa Varewui khutlaina.

⁵Ithumna makhamashung khangayāt, Varewui aworli kahapa saikora chi shimān ngasaka. Mikumowui kaphaning saikora Khristawui kahāng nganā khavai ngakhununga.

⁶ Nathumwui alungli kahāng khanganā chi theishingkhui kahai eina makhanganābing chili tandi mikhavai ngarānpinghaira.

⁷ Nathumna akormāngli yanga. Kachikathāna ā Khristawuina da theishingkakhui leiakha ithumla Khristawuina da phaningkhuiranu.

⁸Nathumli sākhai khavai maningla kha sakā khavai Prohona pangshap khami chiwui vang ina kateokha henda lāngsosālala I makhayakmana.

⁹Nathumli chithi eina hāngkhamachitna da makhui ngasakngaimana.

¹⁰ Kaja athumna hānga, “Awui chithi tui ritlaka kala khālaka, kha ngasokapam tharan ā khalattava akachanga mila maningmana kala akachanga tuila mamatuimana!

¹¹Chithada kaphaninga mibingna bhap tāranu kaja ithumna makapam atamli chithi eina kakapi chithada samkaphanglila chithada hāngpapamra.

¹²Khalatta juilak eina kaphaning athumli ithumna chāng matamlengmana. Athum kayakha mangma̱do! Athum kachicha khalatta retkhuilaga akha eina akha khān tamkhangarok kala athumna retkakhui chieina bichar sangaroka.

¹³Ithumna angarit chili lāngda malāngsomara.

¹⁴Nathum hi luiyam chiwui akai akha sāda kakhui tharan ithumna khikha chonkhamakān maleimana, kaja Khristawui paokaphā rimeikapta rāhākashok chi ithumna.

¹⁵ Ithumna maningla chi khangateina ot kasā chiwui vang ithumna malāngsomana. Kha nathumwui shitkasang mataisangda nathumwui ngachaili Varena mikahai luiyam chi ithumwui kachihāna.

¹⁶Chieina kateina sākahai chiwui vang malāngsola, nathumli kānda ngalei khangateili paokaphā hāshok khavaina.

¹⁷ Hithada kapihaida lei: “Lāngsokhangai china Prohowui vang lāngsoranu.”

¹⁸Khikhalajila Prohona phai da kaphaning mi chili khuisangkapaina, a khalatta phai kaji hi khuisangkapai maningmana.