Read Tangkhul Naga 2 CORINTHNAO 6 Bible Online

2 CORINTHNAO 6 - Tangkhul Naga bible

2 CORINTHNAO 6

¹Vareli otsakruma ngasā kahaiwui vang nathumna samkaphanga lukhamashan chi arema mangasā ngasak khavai kapona.

² Kaja Varena hānga: “Khuisangmikapai atamli nathumwui tui shāmihaira; huimi khavai zimiksho kharā tharan nathumli ngachonmihaira.” Yanglu, arui khuisangmikapai atamna; arui huikhami zimikshona!

³Ithumwui otram khangatha̱li khayon malei khavai khipākhawui shongfali hapkakhano masāmana.

⁴ Kha kakhananglila, kasak chitharānlila kala ka̱lākashi tharānlila, kachotkachāng phungda apong kachiva̱li ithumna Varewui otram mashungrik eina ngatha̱chithei.

⁵ Kashaola, phātop kazangla, khonkazārla, ot kasāla, makapila, kakhumla ithumna khānga.

⁶Kathar eina, theikakhui eina, ja̱khami eina, lukhamashan eina, Manglā Kathara kala kachangkhat leikashiwui lungli

⁷ khamashung tui khamatui kala Varewui pangshaplungli wuiwui-yāyā khamashung khangarongwui khutlai sāda;

⁸maishilala, maiyālala, solala, mashātlala, ithumli kakapik phenlala, khamashung tui matui.

⁹ Mina zeilala ithum mashun eina nganingchinga. Mina matheikhami thālala, theimisera; kathi thālala ringchingda lei, shaolala mashaothatmana;

¹⁰ khananglala ringphāchinga, chāmlala shānglak kahai thai, khikha maleilala, saikora vaisera.

¹¹ Corinthwui mibing, ningtharlak eina kala phongshar eina nathumli kahāngna.

¹²Ithumna nathumli maleikashi maningmana.

¹³Iwui naongarā thada ina nathumli kahāngna; ithumna leikashi chithada nathumla ithumli leishilu.

¹⁴Mashitkasangabingli otrom maphungrumalu. Khamashung eina khayon khi khangarum leikhala? Kahor eina tangkhamang khi khangashik leikhala?

¹⁵Khrista eina Belial khi mayā khangarok leikhala? Shitkasanga mi eina mashitkasanga mi khi ngarumpaikhala?

¹⁶ Varewui khorumshim eina meoma̱ khi mayā khangarok leikhala? Khikhalajila ithum kharinga Varewui shimna. Varena hithada hānga, “Ina iwui mibingli ngasoda pamra kala athumli okthuirumra; I athumwui Vare sāra, kala athum iwui miyur sāra.”

¹⁷ Chiwui vang Prohona hānga, “Athumwui eina yāmshoklu, kala athumwui eina ngateihaolu. Makathar ot masāza̱alu, chithākha ina nathumli khuisangmira.

¹⁸ I nathumwui avāva̱ sāra, nathum iwui naongarā sāra, da sāshapa Prohona hānga.”