Read Tangkhul Naga 2 CORINTHNAO 7 Bible Online

2 CORINTHNAO 7 - Tangkhul Naga bible

2 CORINTHNAO 7

¹Leikashebing ot saikora hi ithumli ngashitmihaira. Chiwui vang eina phasālila, manglālila mamakhao ngasakla Vareli khangachee eina ngasoda tharlak eina okthuisa.

² Nathumwui wuklung ithumli shomilu; ithumna khipālikha masāyonhaimana, khipālikha masāmakhaohaimana, khipālikha makateizāhaimana;

³ ina nathumli khayon mikhavai hi kahāng maningmana, kha ina rida hānghaira kaja thilala thirip, ringlala ringrip jira da ithumwui ningli lei.

⁴Nathumwuitungli iwui shitkasang haklak eina lei, nathumwui vang I langsongaishuna, iningli ringkaphāna pemtinghai, kakhanang kachungkha samphanglala mathānchinga.

⁵ Ithumna Macedoniali kharā tharānla phasā ngasāmkakhui masamphangmana. Kuimareida kakhararmāng, ning sākaza̱mānga.

⁶ Kha khangazanbingli ringphā khangasaka Vare china Titusli chihorāda ithumli ringphā ngasaka.

⁷Kala kharāwui vāngmāng maningmana, kha nathumwui ngachaili leilakha ali nathumna ringphā khangasak chinala ithumli ringphā ngasaka. Nathumna ithumli theingailak eina kahon, nathumwui chapkhangachā, iwui vang nathumna chiyākha ningsangda phaningkhami saikora ana kahāng shālaga I mataimeida ringphāmeihaowa.

⁸ Iwui chithi china nathumli khanang ngasaklala I makhanangmana (ringkaphāva maringphāmana) kaja nathumna khananglala hunakhawui vangmāngmara kaji ina thei.

⁹Nathumli wukkhanang khangasakwui vang ringkaphā maningmana; kha kakhananga nathumli ningngatei khangasakwui vang ringphai.

¹⁰Varewui eina kharā malungkharing china huikhami samphang khavai ningli khangachei khuirai kala ningkakatat maleimana, kha okathuiwui ningkachotna thingasaka.

¹¹Kaja malungkharing chiwui vang Varena kayākha sāmihairakhala kaji theilu, kayākha ningtharda nathumwui mashun chitheihaira! Chiyākha ningkachot, chiyākha khangachee, makaphā kasāli tandi mikida, ningtongda phaning khangasak ot saikorali khangui maleilakla nathumna nganinghaira.

¹² Chieina ina nathumli chithada kapihaisālala, khayon kasāpāwui vang einala maningmana kala khayon maleilala kachot samphang kahaipāwui vang einala maningmana. Kha Varewui miktāli nathumna ithumwui vang sāngairareo kahai khalei chi phongkhavai kagapina.

¹³Chiwui vang ithumli ninglum ngasaka. Ithummāngli maningmana; kha Titusli nathum saikorana kathada ngachonmikhala kaji ana hāngda ithum ringphāshunhaowa.

¹⁴Ina nathumwui maramli lāngsolak eina ali hānghaira kala chiwui vang ili makhayak ngasakmana. Ithumna nathumli khamashung tui hāngchinga, chi tākam eina Titusli kahāng chi ungshunghaira.

¹⁵Chieina nathum saikorawui kahāng khanganā, khangachee eina ngasoda ali samkaphang chi phaningungda ana mataimeida leishi.

¹⁶Nathumli chihamchaokapai hi theida iwui ringkaphā hāngkhavai maleimana.