Read Tangkhul Naga GALATIANAO 1 Bible Online

GALATIANAO 1 - Tangkhul Naga bible

GALATIANAO 1

¹Mikumowui eina maningla kha Jishu Khrista kala ali kathiwui eina ringshok khangasaka Avāva̱ Varivarana paokazata sākhangasaka Paul ina,

²kala ili ngasokapama ivānaobing saikora zangda Galatiawui churchbingli shālam chiphunli.

³ Ithumwui Avā Varivara kala Proho Jishu Khristawui mangā eina nathumli lukhamashan kala chingri kahai miranu.

⁴ Aruihonwui makaphā mithot hiwui eina ithumli ningkhān ngasak khavai, ithumwui Vare kala Avāva̱wui kahāng nganāda Khrista a khalattana ithumwui moreiwui vang thimihaira.

⁵ Mashimānda Vareli tekmateichingranu. Amen.

⁶Khristawui lukhamashan mangā eina nathumli hokakhuia ali nathumna hiyākha thākta hathailaga khangateili paokaphāna da thuikahai theilaga I matakhakhai.

⁷Paokaphā khangatei maleiluimana, kha ina hi kahāngna kaja mi kaikhana nathumli pa̱ngapā ngasakta Khristawui paokaphā hi mashongachei khavai kasāna.

⁸ Ithumna tamchithei kahai chi maningla ngateihang kahai paokaphāna da kazingraona nilala, ithumna nilala tamchitheiakha, chikathā mili kalākashi ngasāranu.

⁹Rida hāngkahai thada aruila hāngluili; nathumna samphang kahai paokaphā chi maningla ngateihang kahai tui tamkachithei mili ka̱lākashi ngasāranu.

¹⁰ Ina miwui mangāli khayākakā kaphā thāhaola? Maningphutmana. Ina ningkachangva Varewui mayākhamimaya! I maho khavai hotnada leila? Ina chi sachingda leiakha I Khristawui otram khangatha̱a masāsamara.

¹¹ Ivānaongarā, ina tamkachithei paokaphā hi miwui maningmana kaji nathumli theishingkhui ngasakngai.

¹²Ina mikumo khipākhawui eina hi samkaphang maningmana kala mina tamkachitheila maningmana, kha Jishu Khrista ā khalattana ili phongkhamina.

¹³ Khare kachāng ina Jihudiwui dharma zatlakha Varewui Church shimān khavai kayākha sakta rekhareksākhala kaji nathumna shāhaira.

¹⁴ Dharmawui pongli iwui tholabingwui ngachaili ina ningsangmeikapta awo-ayiwui khangachā chili phaningsai.

¹⁵ Kha Varewui lukhamashan eina I mapharāranglakhawui eina ali otram ngatha̱ khavai ili hokhui kahaina.

¹⁶Ina Gentilebingli awui paokaphā hi tamchithei khavai Anaomayara hi khipākhala da theingasak kahaiwui thili ina mi khipākhali hiwui apongli mavāngasanluimana.

¹⁷Ili rida paokazata sākasābingli samphang khavai Jerusalemlila mavāmana, kha heng sāda ina Arabiali vāhaowa kala chiwui thili Damascusli hanungluiya.

¹⁸ Kum kathumwui thili Peterli samphang khavai ina Jerusalemli vai kala zimiksho tharāda phangāthang angasopama.

¹⁹Chili Prohowui achinā James maningla paokazata khangatei akhala matheimana.

²⁰Varewui mangāli ina nathumli kapikta kakapi maningmana.

²¹Chiwui thili ina Cilicia eina Syriashong shanga.

²²Chitharan eina tangda Judeali khalei Vareshinaobingna ili matheirangsai.

²³Kha hithada mina khamatui ithumna shai, chiya, “Ithumli rekharekkasāpā china, atam akhali shimān ngasakngaikasā paokaphā chi ana tamchitheida lei.”

²⁴Kala hithada iwui vang eina athumna Vareli sochikata.