Read Tangkhul Naga GALATIANAO 2 Bible Online

GALATIANAO 2 - Tangkhul Naga bible

GALATIANAO 2

¹ Ina Barnabasli ngasoda, Tituslila hokhuilaga kum tharāda matiwui thili Jerusalemli vāluishita.

²Varena I vāphalungra da chitheikhami athishurda ina vai kala kathānabing chili ngathumda vāsamphanglaga ina Gentilebingli hākashoka paokaphā chiwui pongli meikhaimi. Rida ina sākasā otla kala arui sāda khalei hila arema mangasā ngasakngaimana.

³Ili khangaso Titus Greeknaona jilala ali ahui rimshok khavai tandi masāmana.

⁴Ithumna Jishu Khristali khangashikwui eina ningkhān samphang kahaiwui apongli ngathum sāda rāra̱yangkhui khavai mi kaikhana shitkasang khangarumbingna da sāreklaga ithumwui kānglupli rāngathisanga. Athumna ithumli makaphā rao salui ngasakngaiya.

⁵ Kha khamashung paokaphā hi nathumwui vang haimihaisā khavai ithumna athumli mikkhayip akha eina tangda mahamsangmana.

⁶ Themrekabing china chiyākha ngamda matuilala ina makhuisangmana; kaja Vare mimai mayangmana. Ina kahāngna kaja kathema athumna ili mathākhamei kadhara apong mahāngmirarmana.

⁷Jihudibingli paokaphā hāshok khavai Varena Peterli khami thada Gentilebingli paokaphā hāshok khavai Varena ili chisinhaira kaji hi athumna ngateihang eina theikhuisai.

⁸Kaja Peterli Jihudibingwui vang paokazata sākhangasak thada Varewui pangshap eina ilila Gentilebingwui paokazata sāngasaka.

⁹Varena ili khamataia otsin mihaira kaji theilaga kathāna kasaa James, Peter kala John athumna Barnabas inili ithum saikora otsakrumabingna kaji kachithei sāda pāng rāngasinkhui. Barnabas inina Gentilebingli kala athumna Jihudibingli otram ngatha̱mi khavai mayāngaroka.

¹⁰Athumna athumwui kānglupli khalei kachāmabing chili phaningungmi khavai poi, chi ina sāngaikasā otphalunga.

¹¹ Peterna Antiochli kashang tharan awui tharlak kahai khayon leihaoda ina maingatlak eina hānga.

¹²Kaja Jameswui eina mi machihorāranglakha ana Gentilewui Vareshinaobingli phazāngaruma, kha athum kharā eina ahui rimkashokwui mijang kasābingli ngacheehaoda Gentilebingli maphazāngarumluithuwa.

¹³Jihudi khangteibingla Peterwui thada athumwui malung makaping otsak chili shurthuihaowa.

¹⁴Kha ina athumwui kasākhavā chi paokaphāwui khamashungli mangaraikachā chi kathei tharan yarui mangāli ina Peterli maingātlak eina hānga, “Nava Jihudini ji, kha Jihudinao mathāla Gentile thada okthuirāhaira. Chithākha kathada nana Gentilebingli Jihudinao thada okthuiphalungra jipairakhala?”

¹⁵Ithum Jihudi sāda pharai, “Morei kaphunga Gentilebing” da kaho athum kathā maningmana.

¹⁶ Thalala ithumna thei kaja ainwui otsakna khipalikha mamashungmirarmana, kha Jishu Khristali shitkasang manga einana, ainwui otsakna maningla Jishu Khristali shitkasang manga eina mashungmi khavai ithumna Jishu Khristali shitkasangna, kaja ainwui otsakna khipalikha mamashungmirarmana.

¹⁷Chithākha ithumna Khristawui lungli mashungkhui khavai kasāli Gentilebingna morei khalei thada ithumlila morei leiching kaji hi Khristana sākhangasakna jirala? Maningphutmana.

¹⁸Ina horkahai ain chi ina singluishitakha ain kakaiana kaji I khalatta kachitheina.

¹⁹Varewui vang ringkhavai iya ainwui pongli kathina. Ain khalattana sākathatna. I Khristali ngasoda krushli thihaira,

²⁰ chieina ringda khalei hi I maningluimana, kha Khristana ili kharingna. Arui ina ringda khalei hi Varewui Naomayara ili leishida amanglā chihokhame chili shitkasang mangā eina kharingna.

²¹Varewui lukhamashanli ina makhamayā maningmana, kha kachikathā mi akhali ainwui mangā eina mashungkhuimipaisi kaja Khristana thikhami hiya aremana.