Read Tangkhul Naga GALATIANAO 5 Bible Online

GALATIANAO 5 - Tangkhul Naga bible

GALATIANAO 5

¹Ithum ningkhānhaira— Khristana ithumli chihomihaira! Chieina ningkhān kahai mibing mara̱sa̱sa̱da nganingtitlu, laga na khalatta raonao mangasaluilu.

²Nganālu! Paul ina kahāngna kaja nathum khalatta ahui rimshok khavai mayākha Khrista hi nathumwui vang khikha kānkhanā maleimana.

³Kachikathāna a khalatta ahui rimshok khavai mayākha, ana ain katonga chi mayonphalungki kajina da ina machinluishit kajina.

⁴Ain mayonlaga mashungkhuira da kasā athum chiya khalatta Khristawui eina shokkahaina. Nathum Varewui lukhamashanwui eina ayarli shokhaira.

⁵Shitkasangwui vang manglāwui pangshap eina Varena mashungmira kaji hi ithumwui kachihānna; kala chiwui vang khangaraina.

⁶ Kaja ithumna Khrista Jishuli ngarum kahai tharan, ahui rimkashoknala, marimkashoknala ngatei khangasak khikha maleimana. Leikashi mangā eina ot sākhangasaka shitkasang china khamataina.

⁷Nathum phālak eina sāsai! Khipāna khamashung chili mashur khavai nathumli khāmhaokhala? Khipāna suithuihaokhala?

⁸Hi nathumli hokakhui Varena maningmana.

⁹ Athumna kahāng thada, “Khamui khongsaikhali khawok kateokhana kapchung ngasakshapa.”

¹⁰Kha arui eina tangda nathumli iwui shitkasang lei. Ithum Proho mingli khangarumwui vang nathumna ngateithuihaora kaji mashitsangmana, kala khipā khipākharanu nathumli ning yaoyā khangasakpā chili Varena tandi minaora.

¹¹Kha iwui vanga, ivānaongarā, ahui rimshokphalungra da ina pao hāshokakha ili khiwui vang eina aruila rekharekchingda khaleikhala? Chi mashungsāsi kaja ina Khristawui krushwui pao hākashok hina khikha kahap maleimara.

¹²Nathumli pa̱ngapā khangasakbing chi ahui rimkashokmāng majila athum khalatta akhāla sāchaohaoranu.

¹³Ivānaongarā, nathumlila ningkhān khavai hokhuihaira. Kha ningkhān hina nathum phasāwui ningkachāngwui khutlai sāda nathumli mamung ngasakalu. Kha leishida akha eina akha ngachon ngaroklu,

¹⁴ kaja “Khongnainaoli na khalatta leikashi thada leishilu” kaji ningkhami hili ain saikora kharupserhaira.

¹⁵Kha sāyur thada akha eina akha makei ngarokta chotngasakakha, ning ngasharlu, chi maningakha nathum saikora shimān ngarokra.

¹⁶Ina kahāng chi hina: nathumwui mirin Manglāli thānngasaklu, chithākha phasawui ningkachang chili nathumna ningyang maung ngasakmara.

¹⁷ Kaja mikumowui khangachāna ningkachāng chi Manglāna maningchāngmana, kala Manglāna ningkachāng chi mikumowui khangachā china maningchāngmana: khani hi mamayāngarokmana. Chieina nathumna sākhangangai chi masāpaimana.

¹⁸Manglāna thānmiakha nathum ainwui azingli maleiluimana.

¹⁹ Mikumowui khangachā china sākhangai chi theipailaka: chiya shuikhangarui, makathar, mitun makhangatun;

²⁰meoma̱li khokharum, kala meowor kashon, yangshi khangarok, khangama̱, mikpaikashi, malungkhavāt, kākharām, mijang kakhom, kaikhangarok,

²¹yuikashi, khamarip, khamang-kazāli akachang kasā hikathāthā, rida hāngkahai thada aruila hāngluishitli: hikathāthā ot kasābingwuili Vare wungram maleimana.

²²Kha Manglāna leikashi, khamathān, chingri kahai, ja̱khami, lumashankathei, kaphā ot, ningkatong,

²³malungkhanim kala khalatta khangarin hikathā shokngasaka. Hikathāwui vang ain mavaimana.

²⁴Jishu Khristawui ngasa kahaibing chiya mikumowui khangachā khamathang kala ningkachāng saikora chi chithithaira.

²⁵Manglāna ithumli ringngasaka; ana ithumwui mirin khayaiphalungra.

²⁶Ithum malāngsophalungmara, akha eina akha maningrāk ngarok ngasakphalungmara kala akha eina akha mamikpaishi ngarokphalungmara.