Read Tangkhul Naga GALATIANAO 6 Bible Online

GALATIANAO 6 - Tangkhul Naga bible

GALATIANAO 6

¹Ivānaongarā, kachikathāna khalāng ot kasā theiakha manglārinli khangaphumbing nathumna ali mashungkhuimiphalungra, kha chi malungkhanim eina sāphalungra. Nathum khalatta kasuili matāzang khavai ning ngasharlu.

²Akhana akhawui khangazanli ngachonmi ngaroklu, chithākha nathum Khristawui kakaso khanganāna.

³Kachikathā mi akhana ava khikha maninglaga khikha akhana da phaningakha ā khalatta kachipatna.

⁴Kachichāna kachichāwui otsakli bichar sāki kajina. Sākahai ot chi phākha mi kateina sākahai chili mapāndamla a khalatta penlakhaira da lāngsopai.

⁵Kaja mi kachiva̱na kachichāwui otphun chi phungki kajina.

⁶Varewui tui tamkhui kahaia china kaphā ot chi awui ojali sakrumphalungra.

⁷Khalatta machipatalu. Vareli mangashansāpaimana. Kachichāna khayao chi kachichāna hātra.

⁸Khalatawui nigkachāng athishurda lingsangakha kashui hātkhuira, Manglāwui lungli lingsangakha makashimān mirin hātkhuira.

⁹Chieina kaphā kasāli ngachāng machathaiasa kaja chi sāchingakha kahāt atam kharā eina hātkakhui samphangra.

¹⁰Chiwui vang eina ithumna sāpaida leilakha mi saikorali kaphā sāmisersa, mataimeikapta shitkasang khangarumbingli sāmisa.

¹¹ Ipang eina kakapi maraokhao kahai chithi hili yanglā!

¹²Nathumli ahui rimshokphalungra da tandi kasābing chiya akorli maikhayā chitheikhangaibingna. Athumna kasā hiya Khristawui krushwui vang eina athumli marekharek khavaina.

¹³Ahui rimkashokbingla ain mamayonmana, kha phasāwui khangachā ahui rimkashok chili nathumla mayāhaira da athumna kayāng khareili maikhayā samphang khavai kasāna.

¹⁴Iwui vanga, ithumwui Proho Jishu Khristawui krush maningla lāngso khavai maleimana, kaja krushwui vang eina okathui hi iwui vanga khikha masāvaimana kala okathuiwui vang ila khikha masāvaimana.

¹⁵Ahui rimkashoknala lah marimkashoknala maningmana; kha midhar khangasā hina akachangana.

¹⁶ Hikathā ayin hi mirinli mayonrā kahai athumli chingri kahai kala phaningkhami chi leichingranu.

¹⁷Naomeikapta, khipākha ili makhananglui ngasakalu, khiwui vangkhala kaja iphasāli khangakhai hina I Jishuwui rao akhana kaji shākhina.

¹⁸Ivānaongarā, ithumwui Proho Jishu Khristawui lukhamashan nathum saikorali ngasomichingranu. Amen.