Read Tangkhul Naga EPHESIANAO 1 Bible Online

EPHESIANAO 1 - Tangkhul Naga bible

EPHESIANAO 1

¹Varena mayāmida Jishu Khristawui paokazata Paul ina Ephesusli khalei Jishu Khristali ningtongda shitkasangbingli kagapina.

²Ithumwui Avā Vare kala Proho Jishu Khristana nathumli lukhamashan kala chingri kahai miranu.

³ Ithumwui Proho Jishu Khristawui Vare kala Avāva̱li ningshisa! Kaja ithumna Khristali khangarumwui vang kazingram katha apuk-apaga hili ithumwuitungli manglāwui sokhami kachungkha heirormihaira.

⁴Okathui masāranglakhala Khristali khangashikwui vang Varena ithumli awui ngasā khavai kapangkhui. Chieina ithum awui mangāli khamakhao maleila kathara ngasāra.

⁵Leikashiwui vang Khristawui mangā eina ithumli awui nao sākhavai Varena ngarānping kahaina, hi awui sākhangai ningkachāng kharin china.

⁶ Ithumna awui tekhamatei lukhamashanwui vang Vareli sochikatsa, kaja lemmet chi awui khaluma Naomayarawui lungli ithumli mihaira.

⁷ Kaja Khristawui asheena ithumli ningkhānmi, chiya ithumwui morei pheomihaira. Varewui lukhamashan kayākha hakmahākhala,

⁸ana ithumli chiyakha ngashomrorkhami! Awui thangmei kala ningthei eina

⁹Varena awui kharin chi sai kala Khristawui mangā eina tongda ungshung ngasakki kaji ngathum kahai khangarān chi ithumli theingasakhaira.

¹⁰ Retkahai atamli Varena pongngasaki kaji khangarān hi Khristana akuia sāda kazinglila, okathuilila khalei manglākapai saikora kharupkhui khavaina.

¹¹Ot saikora Varewui khangarān kala kaphaning athishurda kashokna, kala awui kharin haokaphokwui eina ana ngarānping kahai chili pheisin sāda ithum Khristali khangashiklungli awui mibing sākhavai Varena kapangkhui kahaina.

¹²Chiwui vang eina Khristali chihānkhare saki kaje ithumna Varewui tekhamateili sochikatsa.

¹³Nathumli huikhami khuirākhami khamashungwui paokaphā chi nathumna kashā eina nathumla Varewui mibing ngasāhaowa. Nathumna Khristali shitkasangwui vang awuina da theikhavai ngashitmi kahai Manglā Kathara chi mida nathumwuitungli mahor namhaira.

¹⁴ Varena awui mibingli ngashit kahai ithumna samphangki kaji shimlui chi masamphangranglakha eina tangda Manglā hina shākhina. Awui tekhamatei chili sochikatsa.

¹⁵ Nathumna Proho Jishuli shitkasang kala Varewui mi saikorali leikashiwui pao kashā eina thuida

¹⁶ ina nathumwui vang Vareli ningkashi khami mathāhailakmana. Iwui seihā kasāli nathumli phaningungchinga,

¹⁷kala ithumwui Proho Jishu Khristawui Varivara, tekhamatei Avāva̱, china Manglā chi nathumli mikhavai ina pomi. China nathumli theithangmei ngasakra kala Vareli theingasakta nathumna ali mathāmeida theikhuihaora.

¹⁸ Nathumwui ning shoda awui kahor theikhavai ina pomi, china nathumli hokakhuiwui kachihān chi khikhala kala awui mibingli kayākha tekhamatei lan ngashitmihaikhala da nathumna mathingrik theira,

¹⁹kala ali shitkasanga ithumwuitungli awui hakkhamahā pangshap china kathada ot sāda leilikhala kajila theira. Ithumwui lungli ot sāda khalei pangshap chi sāshap pangshapa chi eina ngaraichai;

²⁰ chi ana Khristali kathiwui eina ringngasakta kazingramli awui yāshong kachipam chili shichina.

²¹ Kazingramli khalei akhavā kasābing pangshap khalei, khangam-kharei saikorawuitungli Khristana munga; kala aruihon khalei, naoda rāki kaji okathuiwui mingpho saikorawuitungli reikhamei mingpho chi awuili lei.

²² Ot saikora Varena Khristawui pheizingli haimi, kala churchwui vang ot saikorawuitungli akhavā sāngasaka.

²³ Church hi Khristawui phasāna, kala chi ana khavāt maleila pong ngasaka.