Read Tangkhul Naga EPHESIANAO 4 Bible Online

EPHESIANAO 4 - Tangkhul Naga bible

EPHESIANAO 4

¹Chiwui vang eina Prohowui vang narkahaia ina kapona kaja, nathumli hokakhui tharan Varena ngarānmi kahai mirin chi tāzakta okthui khavai ngarānlu.

² Atam kachiva̱li ngahuilu, tākuihailu kala ningzinghāringhailu. Akha eina akha khāngmi ngarokta nathumwui leikashi chitheilu.

³Makaikapai chingri kahai chieina ngasoda manglāna khami ningkha kasā chi leiching khavai ngarānlu.

⁴Varena nathumli hokakhui chili kachihān akhamāng kaji thada phasā akhamanga kala manglā akhamānga.

⁵Prohola akha, shitkasangla akha kala ra̱kahikla akhamānga.

⁶Vare akha kala mikumo saikorawui Avāva̱ akhamānga, ā saikorawui Prohona, saikorawui atungli saikorawui mangā eina saikorawui alungli lei.

⁷Khristawui lemmet athishurda ithum kachiva̱la khamataia lemmet chi samphangsera.

⁸ Hithada hānghaida lei: “Ana kajuiya chili kakā tharan, narkahaiya kachungkhali thānkai, ana mikumoli lemmet mi.”

⁹Ara, “Ana kai” kajiwui kakhalat khikhala? Hiwui kakhalatva, rida ana nemmeikap kaji okathuili tai kajina.

¹⁰Chipem khavai azingli katā ā chi kazingli juikhameili kakā chipapama.

¹¹Kala “Mikumoli lemmet khame” chi ana. Ana kaikhali paokazata, kaikhali marān, kaikhali evangelist, khangatei kaikhali yaokahoma kala ojā sāngasaka.

¹²Khristawui phasā chi sākā khavai ana Varewui mibingli Vareshiwui otram khangatha̱wui ot sākhavai ngarān kahaina.

¹³Chieina ithum saikora ithumwui shitkasangli kala Varewui naomayarawui pongli ithumna kathei chili khokkha sāphalungra. Khristawui kāshungchao kahai chili kāngaphan khavai ithum mapungkaphā mi ngasāphalungra.

¹⁴Chithākha ithum marei-marā awor eina kateibingli khanguili thānkasang mikhanamabingwui tamkachithei, chiwui masi china phanung-phanvāda yuiung-yuivā kaje naoshinaobing chikathā mangasāmara.

¹⁵ Kha leikashiwui ningngai lungli khamashung tui matuida apong kachiva̱li akuia Khristawuili ithum rarsangra.

¹⁶ Awui khayaikhamilungli phasākai saikora ngashik ngarokta lei kala phasā atonga chi aliklak kachiva̱wui eina ngasunkhui. Chithada sāda phasākai kachiva̱na kachichāwui ot sāda leikashiwui lungli phasā katonga reisang ngasaka.

¹⁷Mashitkasangbingna wuklung mararda chukmaja̱phāphā kaji thada maokthui khavai ina Prohowui ming singda nathumli saklāk eina kahāngna.

¹⁸Athum mangkhama̱wui vang ning makanghaoda Varena khami mirin chili athum mazangmana.

¹⁹Athum kakhayak mavaimana, morei kasāli mangacheemana, kala khayākhamala ot saikorali khangaring maleila sai.

²⁰Nathumna Khristawui pongli chithada matamkhuimana.

²¹Nathumna awui tui shākachangkhathaira, kala awui thi kashura sāda Jishuwui mashun nathumli tamchitheihaira.

²²Chieina kharewui mirin ringching khangasaka, minama khamathangna shimān khangasaka kachama khangachā chi horhaolu.

²³Nathumwui ningla, wuklungla kadhar onphalungra,

²⁴kala Varewui sakrin khuida sākahai chi khangarong kala katharwui lungli khamashunga mirin phongmi kahai kadhara khangachā chi nathumna ngavaikhuiphalungra.

²⁵ Chiwui vang eina, makapikluialu; mi kachiva̱na okthuikharumabingli mashun tui matuiphalungra, kaja ithum Khristawui phasākaisera.

²⁶Malungvāt ngaroklala morei masaalu kala langpongda malungmavātalu.

²⁷Chipeeli apong maphāmialu.

²⁸Khalena maleeluila khamashung ot sāphokta awui ringkhavai kala kachāmbingli ngachonmi khavai pharānu.

²⁹Ramkai tui mamatuialu, kha kānnakapai reisangkapai tui matuida kashābingwui vang phākhavai sālu.

³⁰Kala ngatangkhami zimikshowui vang nathumli mahor namkahai Varewui Manglā Kathara chili makhanang ngasakalu.

³¹Ningkakhā, ningkachot, malungkhavāt, khonkazār, khamashāt, kala yangkharing khangarok saikora chi horserhaolu.

³²Chiwui mahutliva Khristawui mangā eina Varena nathumli pheokhami chithada, nathum akha eina akha pheomi ngarokta malungkhanim eina ningngaishi ngaroklu.